សម្រាប់អាណត្តិទី៥នេះ សាខាកាកបាទក្រហមកម្ពុជា ខេត្តសៀមរាប បានរៀបចំសន្និបាតលើកទី១ របស់ខ្លួន និងបានបោះឆ្នោតជ្រើសរើសឯកឧត្តម ទៀ សីហា ជាប្រធាន នៃគណៈកម្មាធិការ សាខាកាកបាទក្រហមកម្ពុជា ខេត្តសៀមរាប ។
កាលពីថ្ងៃទី១៦ខែកុម្ភៈឆ្នាំ២០១៩ ក្រោមអធិបតីភាព លោក ជំទាវ ពុំចន្ទីនី អគ្គលេខាធិការ កាកបាទក្រហមកម្ពុជា អង្គសន្និបាត នៃសាខាកាកបាទក្រហមកម្ពុជា ខេត្តសៀមរាប បានប្រកាសបញ្ចប់តួនាទីគណៈកម្មាធិការសាខាកាកបាទក្រហមចាស់ពេញសិទ្ធចំនួន ១៣រូប និងបំរ៉ុង ២រូប និងបានបោះឆ្នោតជ្រើសរើសប្រធាន អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប អាណត្តិទី៥ និងសមាសភាព សមាជិកគណៈកម្មាធិការពេញសិទ្ឋ តាមរបៀបវារៈ អនុម័តដោយលើកព័ណ្ណនូវសមាសភាពគណៈលេខាកត់ត្រា ឆ្លងនិងអនុម័តដោយលើកប័ណ្ណនូវសេចក្តីព្រាងរបាយការណ៍អាណត្តិទី៤និងទិសដៅការងារសម្រាប់អនុវត្តក្នុងអាណត្តិទី៥(២០១៩ដល់២០២៥) ឆ្លងនិងអនុម័តសមាសភាណបេក្ខជនគណៈកម្មាធិការសាខាសម្រាប់អាណត្តិទី៥ ឆ្លងនិងអនុម័តសមាសភាពប្រធាន អនុប្រធានហិរញ្ញិកនិងលេខាធិការ សម្រាប់អាណត្តិទី៥។ ជាមួយគ្នានោះដែរ ឯកឧត្តម អ្នកឧកញ្ញា សៀង ណាំ ត្រូវបានបោះឆ្នោត ក្លាយជាប្រធានកិត្តិយសសាខាកាកបាទក្រហមកម្ពុជា ខេត្តសៀមរាបផងដែរ។
ឯកឧត្តមទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត សម្រាប់អាណត្តិទី៥ មានប្រសាសន៍ថាក្នុងរយៈពេល៦ឆ្នាំ នៃអាណត្តិទី៥នេះ គឺជារយៈពេល ដែលសាខាកាកបាទក្រហមកម្ពុជាខេត្ត ត្រូវខិតខំប្រឹងប្រែងរិះរកនូវវិធីសាស្ត្រថ្មីៗថែមទៀត រួមជាមួយក្រុមប្រតិបត្តិសាខា ដើម្បីបំពេញបេសកកម្មមនុស្សធម៌ឲ្យសម្រេចបានជោគជ័យ។
ឯកឧត្តមប្រធាន បានប្តេជ្ញាចិត្តថានឹងប្រកាន់ខ្ជាប់ នូវគោលការណ៍គ្រឺះទាំង៧ នៃចលនាអន្តរជាតិកាកបាទក្រហម អឌ្ឍច័ន្ទក្រហម រួមមាន ភាពមនុស្សធម៌ ភាពមិនលំអៀង អព្យាក្រិត ឯករាជ្យភាព សេវាកម្មស្ម័គ្រចិត្ត ឯកភាពនិងសាកលភាព។ លើសពីនេះ ក៏នឹងយកចិត្តទុកដាក់ប្រតិបត្តិតាមគោលការណ៍ណែនាំរបស់កាកបាទក្រហមកម្ពុជាដើម្បីបំពេញភារកិច្ចមនុស្សធម៌បានជោគជ័យ ព្រមទាំងរក្សាសាមគ្គីភាពក្នុងជួរគណៈកម្មាធិការ និងទទួលយកការប្រឹក្សា និងឯកភាពរួមគ្នាដោះស្រាយបញ្ហាប្រឈម ស្របតាមយុទ្ឋសាស្ត្រកាកបាទក្រហមកម្ពុជា នូវវិស័យស្នូលទាំង៤គឺការគ្រប់គ្រងគ្រោះមហន្តរាយ សុខភាពនិងការថែទាំសុខភាពសហគមន៍ លើកកម្ពស់គោលការណ៍គ្រឺះ និងតម្លៃមនុស្សធម៌របស់ចលនាអភិវឌ្ឍស្ថាប័ននិងអភិវឌ្ឍធនធាន បង្កើនគំនិតក្នុងការកៀរគររកមូលនិធិពីសប្បុរសជនគ្រប់មជ្ឈដ្ឋាន ដើម្បីបំរើការងារមនុស្សធម៌របស់សាខា និងយកចិត្តទុកដាក់ណែនាំដល់អនុសាខាឱ្យបំពេញភារកិច្ចមនុស្សធម៌ឲ្យបានល្អប្រសើរ។
សូមជម្រាបថា សន្និបាតលើកទី១ នៃអាណត្តិទី៥នេះ មានការចូលរួមពី ប្រធាន អនុប្រធានសាខា ប្រធាន អនុប្រធានកិត្តិយសសាខា តំណាងគណៈកម្មាធិការសាខាខេត្តកំពង់ធំ ,បាត់ដំបង និងខេត្តបន្ទាយមានជ័យ ភ្ញៀវវកិត្តិយសជាតិ អន្តរជាតិ សមាជិក សមាជិកាគណៈកម្មាធិការសាខា គណៈកិត្តយសសាខា សមាជិកពេញសិទ្ធ និងបំរ៉ុង សរុបចំនួនជាង ១៨០នាក់ ។
អត្ថបទ ៖ លោក យូ វង្ស
កែសម្រួលអត្ថបទ ៖ លោក សេង ផល្លី
