យុទ្ធនាការ សៀមរាបផ្ទះខ្ញុំ ក្រោមប្រធានបទ “កីឡា ដើម្បីសុខភាព ការប្រកួតបាល់ទាត់ពានរង្វាន់បាល់ទាត់សប្បុរសធម៌វ័យចំណាស់ អាយុលើស ៣៥ឆ្នាំ ២០១៩ រដូវកាលទី២” បង្កើតឡើងក្នុងគោលបំណងកៀងគររកថវិកា សម្រាប់បម្រើដល់ការងារមនុស្សធម៌ និងប្រកួតជាលក្ខណៈមិត្តភាព ដើម្បីបង្កើតភាពស្និតស្នាល និងសុខភាព។
លោក ពៅ ពិសិដ្ឋ អភិបាលរងខេត្តសៀមរាប មានប្រសាសន៍ថា ការប្រកួតក្នុងរដូវកាលទី២នេះ គឺជាការចូលរួមចំណែកមួយក្នុងការធ្វើឲ្យវិស័យកីឡារបស់កម្ពុជា ក៏ដូចជាវិស័យអប់រំនៅខេត្តសៀមរាប មានការរីកចម្រើន និងឈានឆ្ពោះទៅមុខជាលំដាប់ ។ ហើយរាជរដ្ឋាភិបាលកម្ពុជា ដែលមាន សម្ដេចតេជោ ហ៊ុន សែន ជានាយករដ្ឋមន្ត្រីនៃកម្ពុជា បានធ្វើកំណែទម្រង់យ៉ាងស៊ីជម្រៅ ចំនួន ៨ចំណុច ចំណុចរបស់ក្រសួងអប់រំ យុវជន និងកីឡា គឺមានកំណែទម្រង់ការងារអប់រំកាយ និងកីឡា ដើម្បីលើកកម្ពស់សុខភាព សមត្ថភាពជំនាញ បច្ចេកទេស អប់រំកាយ កីឡារបស់សិស្ស និស្សិត យុវជន និងមហាជនប្រកបដោយគុណភាព និងប្រសិទ្ធិភាពខ្ពស់ និងឈានឆ្ពោះទៅកាន់ការប្រកួតជាលក្ខណៈជាតិ និងអន្តរជាតិ ផងដែរ ។
លោក សំកុល សុចិត្រា អនុប្រធាន សហភាពសហព័ន្ធយុជនកម្ពុជា ខេត្តសៀមរាប បានអោយដឹងថា ការប្រកួតពានរង្វាន់នេះ បានប្រកួតវិលជុំ នៅទីលានបាលទាត់ សហភាពសហព័ន្ធយុជនកម្ពុជា ក្រុងសៀមរាប ។ ការប្រកួត គឺនៅថ្ងៃសៅរ៍ និងអាទិត្យ រៀងរាល់ចុងសប្ដាហ៍ ដែលក្នុងមួយថ្ងៃត្រូវប្រកួតពីរគូរ ក្នុងមួយគូរៗ មានរយ:ពេល ៩០នាទី ដោយចាប់ផ្ដើមពីរសៀលម៉ោង ១៥ និង ០០នាទី ដល់ម៉ោង ២១ និង ០០នាទី។ ក្រុមកីឡាដែលបានចូលរួមប្រកួតមានចំនួន ១២ក្រុម ។
ព័ត៌មានជាតិ ថ្មីៗ
សូមបម្រាបថា ការប្រកួតបាល់ទាត់ ក្រោមប្រធានដដែលនេះ នៅក្នុងក្រុងសៀមរាប កាលពីថ្ងៃទី០៦ ខែមករា ឆ្នាំ២០១៨ មានក្រុមចូលរួមប្រកួតត្រឹមតែ ០៨ក្រុមប៉ុណ្ណោះ។
សូមបញ្ជាក់ផងដែរថា ក្រោមការដឹកនាំរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា បានគាំទ្រ និងលើកទឹកចិត្តដល់កីឡាករ កីឡាការិនីកម្ពុជា ខិតខំប្រឹងប្រែងហ្វឹកហាត់ឲ្យអស់ពីលទ្ធភាព ខណៈកម្ពុជានឹងទទួលធ្វើជាម្ចាស់ផ្ទះ ក្នុងការប្រកួតកីឡាស៊ីហ្គេម នៅឆ្នាំ២០២៣។
អត្ថបទ និង រូបថត ៖ លោក អ៊ិន សីហរិទ្ធ និង លោក យូ វង្ស
កែសម្រួលអត្ថបទ ៖ លោក សេង ផល្លី
