ស្រូវប្រមាណ ៦៥ហិចតា ក្នុងឃុំចំនួន២ ស្ថិតក្នុងស្រុកជីក្រែង ខេត្តសៀមរាប កំពុងរងការបំផ្លាញពីសត្វមមាចត្នោត នេះបើតាមការឲ្យដឹងពីក្រុមការងារជំនាញ របស់មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប។
លោក ទា គឹមសុទ្ធ ប្រធានមន្ទីរកសិកម្ម រុក្ខា ប្រមាញ់ និងនេសាទ បានបញ្ជាក់ថាសត្វមមាចត្នោត ដែលបានបំផ្លាញស្រែក្នុងស្រុកជីក្រែងនេះ បានឆ្លងមកពីស្រុកស្ទោង ខេត្តកំពង់ធំ បច្ចុប្បន្នមន្ទីរបានធ្វើសេចក្តីជូនដំណឹងទៅដល់កសិករនៅក្នុងស្រុកជីក្រែង និងស្រុកសូទ្រនិគមដែលនៅជាប់គ្នានោះរួចរាល់ហើយ សេចក្តីជូនដំណឹងនោះបង្ហាញអំពីវិធីសាស្ត្រកំចាត់សត្វមមាចត្នោត និងវិធីសាស្ត្រពិនិត្យរកមូលហេតុ ដែលបង្កសត្វមមាចត្នោត។
កាលពីថ្ងៃទី១៧ ខែកុម្ភៈ ឆ្នាំ២០១៩ លោក ហៃ វាសនា ប្រធានការិយាល័យក្សេត្រសាស្ត្រ និងផលិតភាពកសិកម្ម នៃមន្ទីរកសិកម្មរុក្ខាប្រមាញ់ និងនេសាទ ខេត្តសៀមរាបបានបញ្ជាក់ថា ក្រុមមន្ត្រីជំនាញរបស់មន្ទីរ រួមនឹងក្រុមហ៊ុនឯកជន បានធ្វើការបានចុះផ្សព្វផ្សាយ និងកម្ចាត់សត្វមមាចត្នោត ដែលកំពុងបំផ្លាញស្រែរបស់ប្រជាកសិករនៅស្រុកជីក្រែង។ តាមការវាយតម្លៃបឋម ឃុំចំនួន២ ត្រូវរងការបំផ្លាញ លើផ្ទៃដី ៦៥ហិចតា ក្នុងនោះ ឃុំស្ពានត្នោត ៣៥ ហិចតា និងឃុំអន្លង់សំណរ ៣០ហិចតា ដែលភាគច្រើនស្រូវស្ថិត នៅដំណាក់កាល ហាលផ្កា និងដាក់ម្ស៉ៅ ហើយភាគច្រើន ស្រែគ្មានទឹក ។
លោក ហៃ វាសនា បានបន្ថែមថា ក្រុមការងារ ក៏បានប្រជុំផ្សព្វផ្សាយណែនាំ បច្ចេកទេសនៃការកំចាត់សត្វ មមាចត្នោត បង្ហាញពីសញ្ញាណនៃការបំផ្លាញរបស់ សត្វមមាចត្នោត ចាប់មមាចត្នោតបង្ហាញឲ្យកសិករស្គាល់ និង ផ្តល់ថ្នាំសម្លាប់សត្វមមាចត្នោតមួយចំនួន ជូនដល់កសិករសម្រាប់បាញ់កំចាត់ភ្លាមៗបានចំនួន ៣ ហិចតា ផងដែរ ជាមួយគ្នានោះ ក្រុមការងារបានណែនាំកសិករត្រូវពាក់ម៉ាស ស្រោមដៃ ការពារឲ្យបានត្រឹមត្រូវអំឡុងពេលលាយថ្នាំ និងបាញ់ក្នុងស្រែ ព្រោះថ្នាំសម្លាប់សត្វល្អិតទាំងនេះ នឹងបង្កឲ្យប៉ះពាល់ដល់សុខភាពប្រសិនបើមិនបានការពារ និងប្រើប្រាស់ឲ្យបានត្រឹមត្រូវ។
ក្នុងឱកាសនោះដែរ ប្រជាកសិករ ក៏បានសំណូមពរទៅដល់ មន្ទីរកសិកម្ម រុក្ខាប្រមាញ់ និងនេសាទ ខេត្តសៀមរាប ស្នើសុំមន្ត្រីជំនាញ ចុះមកជួយកសិករឲ្យបានទាន់ពេលវេលា ក្នុងករណីមានការកើតឡើងនូវការបំផ្លិចបំផ្លាញរបស់សត្វចង្រៃផ្សេងៗ។
អត្ថបទ និង រូបថត ៖ មន្ទីរកសិកម្មខេត្ត
កែសម្រួលអត្ថបទ ៖ លោក សេង ផល្លី
