ក្នុងឆ្នាំ២០១៨ កន្លងទៅនេះ នាយកដ្ឋានអភិវឌ្ឍន៍ទេសចរណ៍អង្គរ របស់អាជ្ញាធរជាតិអប្សរា បានបង្ហាញថា មន្ត្រីរបស់ខ្លួនបាន ជួយសង្គ្រោះបឋមដល់ភ្ញៀវទេសចរជាតិនិងអន្តរជាតិ ដែលមានគ្រោះថ្នាក់អំឡុងពេលទស្សនាក្នុងតំបន់ប្រាសាទសរុបចំនួន២០៥ករណី ក្នុងនោះក៏មានបានរកឃើញ និងប្រគល់ វត្ថុសម្ភារៈដែលភ្ញៀវទេសចរបានជ្រុះ និងភ្លេចដល់ម្ចាស់ដើមវិញ ចំនួន ២៤៥ករណី។
ដើម្បីបង្ហាញពីការយកចិត្តទុកដាក់ ផ្ដល់ទំនុកចិត្តខ្ពស់ដល់ភ្ញៀវទេសចរជាតិ និងអន្តរជាតិក្នុងពេលចូលទស្សនាតំបន់រមណីយដ្ឋានអង្គរ មន្ត្រីរបស់អាជ្ញាធរជាតិអប្សរា មិនមែនមានកាតព្វកិច្ចត្រឹមតែថែរក្សាសណ្ដាប់ធ្នាប់ ការពារថែរក្សា និងអភិរក្សបេតិភណ្ឌជាតិប៉ុណ្ណោះទេ ប៉ុន្តែក្រុមការងារអភិវឌ្ឍន៍ទេសចរណ៍អង្គរ ក៏ដូចជាមន្ត្រីអាជ្ញាធរជាតិអប្សរាមួយចំនួនទៀត ក៏ត្រូវបានបណ្ដុះបណ្ដាលនូវជំនាញសង្គ្រោះបឋម ផ្ដល់កិច្ចសហការ និងឆ្លើយតបទៅកាន់ភ្ញៀវទេសចរជាតិនិងអន្តរជាតិក្នុងករណីមានបញ្ហាណាមួយកើតឡើងក្នុងតំបន់រមណីដ្ឋានអង្គរផងដែរ។
នាយកដ្ឋានអភិវឌ្ឍន៍ទេសចរណ៍អង្គរ បានបញ្ជាក់ថា ក្រុមការងាររបស់ខ្លួន ធ្វើការផ្ដោតសំខាន់ទៅលើ ការណែនាំដល់ភ្ញៀវទេសចរជាតិ និងអន្តរជាតិឱ្យយល់ដឹងពីក្រមប្រតិបត្តិអង្គរមានដូចជា ត្រូវស្លៀកសម្លៀកបំពាក់ឱ្យបានសមរម្យ ហាមប៉ះពាល់រូបចម្លាក់តាមបណ្តាជញ្ជាំងប្រាសាទ ត្រូវរក្សាភាពស្ងៀមស្ងាត់មិនមានឱ្យការស្រែកឡូឡារំខានដល់អ្នកដទៃ ហាមឱ្យស្ករគ្រាប់ ឬថវិកាដល់កុមារ ហាមពិសារបារី ហាមផឹកគ្រឿងស្រវឹង ហាមចោលសំរាមពាសវាលពាសកាល ហាមឡើងលើគំនរថ្ម និងហាមស្ត្រីប៉ះព្រះសង្ឃ និងថតរូបកៀកព្រះសង្ឃ។ អំពើទាំងនេះ គឺជាការចូលរួមអភិរក្សថែរក្សា និងផ្តល់តម្លៃដល់តំបន់រមណីយដ្ឋានអង្គរជាសម្បត្តិបេតិកភណ្ឌពិភពលោក។
ព័ត៌មានជាតិ ថ្មីៗ
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
