អាជ្ញាធរជាតិអប្សរា កំពុងរៀបចំតម្លើងផ្ទាំងព័ត៌មាន រួមនឹងឈ្មោះប្រាសាទជាង១១៨ផ្ទាំង ដាក់នៅតាមប្រាសាទសំខាន់ៗ នៅក្នុងតំបន់រមណីយដ្ឋានអង្គរ ដើម្បីផ្ដល់ភាពងាយស្រួលដល់ភ្ញៀវទេសចរក្នុងការស្វែងយល់ពីប្រាសាទនីមួយៗ។
ក្នុងដំណើរចុះពិនិត្យការដ្ឋានធ្វើស្លាកសញ្ញានៅ រោងសិប្បកម្ម អាទីសង់ អង្គរ (Artisans Angkor) នារសៀលថ្ងៃទី១៤ ខែកុម្ភៈ ឆ្នាំ២០១៩ ឯកឧត្តម សុខ សង្វារ អគ្គនាយករងទទួលបន្ទុកនាយកដ្ឋានអភិវឌ្ឍន៍ទេសចរណ៍អង្គរ បានឲ្យដឹងថា មកដល់ពេលនេះ ផ្ទាំងស្លាកឈ្មោះរបស់ប្រាសាទ ធ្វើបានប្រហែល២៥%ហើយនៃចំនួនសរុប ខណៈដែលផ្ទាំងខ្លះទៀតកំពុងស្ថិតនៅក្នុងការឆ្លាក់អក្សរ លាបពណ៌បេតិកភណ្ឌ មានពណ៌ឈាមជ្រូក និងខ្លះទៀតកំពុងឆ្លាក់ក្បាច់លម្អ។
ឯកឧត្តម សុខ សង្វារ បានឲ្យដឹងទៀតថា ផ្ទាំងស្លាកសញ្ញាឈ្មោះប្រាសាទនេះ ធ្វើពីថ្មភក់ ដែលមាន ០៣ទំហំផ្សេងគ្នា ដោយគិតទៅតាមទីតាំងជាក់ស្តែងនៃច្រកចូលប្រាសាទ ដែលដំឡើងបាន គឺទំហំធំចំនួន ១៦ផ្ទាំង កម្ពស់១.៥០០មមx បណ្ដោយ ៩១៤មមxកម្រាស់៤៦៤មម។ ទំហំមធ្យមចំនួន ៥២ផ្ទាំង កម្ពស់១,២០០មមxបណ្ដោយ៧៣១មមx កម្រាស់៣៧១មម។ ទំហំតូចចំនួន ៥០ផ្ទាំង កម្ពស់១,០០០មមxបណ្ដោយ៦១៣មមxកម្រាស់៣១១មម។
ហើយផ្ទាំងស្លាកទាំងនោះ បង្ហាញជូននូវព័ត៌មានសំខាន់ៗ មួយចំនួនពាក់ព័ន្ធនឹងប្រាសាទ ដែលមានជាអក្សរខ្មែរ និងអក្សរអង់គ្លេស ដូចជា ឈ្មោះប្រាសាទ អាយុកាលសាងសង់ប្រាសាទ ទិសច្រកចូលប្រាសាទ និងអមដោយស្លាកសញ្ញា (Logo) ចំនួន៤គឺ ស្លាកសញ្ញាអាជ្ញាធរជាតិអប្សរានៅចំកណ្តាលខាងលើឈ្មោះប្រាសាទ និងស្លាកសញ្ញា៣ផ្សេងទៀត ដែលនៅខាងក្រោមគឺ ស្លាកសញ្ញាយូណេស្កូ ស្លាកសញ្ញាបេតិកភណ្ឌពិភពលោក និងស្លាកសញ្ញាអនុសញ្ញាក្រុងឡាអេឆ្នាំ១៩៥៤ សម្រាប់ការការពារសម្បត្តិវប្បធម៌ក្នុងគ្រាមានជម្លោះប្រដាប់អាវុធ។
ឯកឧត្តម បានបញ្ជាក់ថា ការតម្លើងផ្ទាំងស្លាកឈ្មោះប្រាសាទនេះ គឺអាជ្ញាធរជាតិអប្សរា អនុវត្តន៍ ស្របតាមអនុសាសន៍ របស់គណៈកម្មាធិការ ICC-Angkor បានណែនាំ។ ប៉ុន្តែ ចំនួនផ្ទាំងស្លាកនេះ គឺមិនបានតម្លើងគ្រប់ប្រាសាទទាំងអស់ក្នុងតំបន់រមណីយដ្ឋានអង្គរឡើយ ដោយហេតុថា ប្រាសាទខ្លះនៅជ្រៅក្នុងព្រៃមិនមានទីតាំងដាក់បាន។ ចំពោះទីតាំងដែលតម្លើងស្លាកឈ្មោះប្រាសាទនេះដែរ ក្រុមការងារបានគិតទៅចំណុច៣គឺ នៅក្បែរច្រកចូលទស្សនាប្រាសាទ ទីតាំងងាយមើលឃើញរបស់ភ្ញៀវទេសចរ និងទីតាំងដែលមិនប៉ះពាល់ដល់ទិដ្ឋភាពប្រាសាទទាំងមូល។
តាមរយៈការតម្លើង ផ្ទាំងស្លាកឈ្មោះប្រាសាទ អមដោយព័ត៌មានប្រាសាទសំខាន់ៗនាពេលខាងមុខនេះ អាជ្ញាធរជាតិអប្សរា សង្ឃឹមថា វានឹងជួយផ្ដល់ភាពងាយស្រួល និងបទពិសោធន៍ល្អសម្រាប់ភ្ញៀវទេសចរ ក្នុងការទស្សនាតំបន់អង្គរ ឆ្លើយតបតាមតម្រូវការចាំបាច់របស់ភ្ញៀវទេសចរ លើកតម្លៃប្រាសាទនិងកិត្យានុភាពជាតិ និងទទួលបាននូវព័ត៌មានមួយចំនួនដែលធ្វើឲ្យដំណើរកម្សាន្ត កាន់តែមានភាពងាយស្រួល និងច្បាស់លាស់បន្ថែមទៀត៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក សេង ផល្លី
