អាជ្ញាធរខេត្តសៀមរាបថ្ងៃទី១៦ ខែកញ្ញា ឆ្នាំ២០២១ បានសម្រេចបិទជាលើកទី២ នូវផ្សារកំពង់ក្តី ស្ថិតនៅភូមិកំពង់ក្តី២ ឃុំកំពង់ក្តី ស្រុកជីក្រែង ខេត្តសៀមរាប ដែលជាទីតាំងមាន ការឆ្លងរាលដាលនៃជំងឺកូវីដ-១៩ ជាបណ្ដោះអាសន្នរយៈពេល០២សប្ដាហ៍ គិតចាប់ពីថ្ងៃទី១៦ ខែកញ្ញា ដល់ថ្ងៃទី២៩ ខែកញ្ញា ឆ្នាំ២០២១ ក្នុងគោលបំណង ធានាដល់ប្រសិទ្ធភាពនៃការគ្រប់គ្រងការឆ្លងរាលដាលនៃជំងឺកូវីដ-១៩ នៅក្នុងភូមិសាស្ត្រទីតាំងដែលត្រូវបិទ និងទប់ស្កាត់ជំងឺនេះ មិនឱ្យឆ្លងរាលដាលទៅតំបន់ផ្សេងទៀត។
បើតាមលោក ពៅ ប៊ុនធឿន អភិបាលស្រុកជីក្រែង ខេត្តសៀមរាប បានឱ្យដឹងនៅព្រឹកថ្ងៃទី១៦ ខែកញ្ញានេះថា ការសម្រេចបិទផ្សារកំពង់ក្ដីនេះ គឺបន្ទាប់ពីអាជ្ញាធរបានរកឃើញអាជីវកជាអ្នកលក់ត្រី លក់បបរ លក់គុយទាវ លក់បន្លែរ និងអាជីវផ្សេងៗ ចំនួន១៥នាក់ ដែរមានវិជ្ជមានកូវីដ-១៩ ទើបបានជាអាជ្ញាធរសម្រេចបិទផ្សារជាបណ្តោះអាសន្នសិន។
លោកបានបន្តថា បើតាមអាជ្ញាធររកឃើញអ្នកវិជ្ជមានជំងឺកូវីដ-១៩ និងអ្នកចម្លងភាគច្រើន គឺកើតចេញពីទីផ្សារ មិនថាផ្សារតូច ឬផ្សារធំនោះទេ
ដូចនេះលោកអភិបាលស្រុកក៏បានអំពាវនាវឱ្យប្រជាពលរដ្ឋ សូមបង្កើនការប្រុងប្រយ័ត្នឱ្យបានខ្ពស់បន្ថែមទៀត ជាពិសេសនៅពេលទៅផ្សាតត្រូវពាក់ម៉ាស់ រក្សាគម្លាត លាងដៃ និងអាកុល ឬជែល ឱ្យបានត្រឹមត្រូវ នឹងត្រូវអនុវត្តឲ្យបានម៉ឺងម៉ាត់តាមសេចក្ដីណែនាំផ្សេងៗ របស់ក្រសួងសុខាភិបាល ក៏ដូចជាអាជ្ញាធរខេត្តសៀមរាប ដើម្បីកាត់ផ្ដាច់នូវការចម្លងជមងឺកូវីដ-១៩ បានឆាប់រហ័ស៕
អត្ថបទ និង រូបភាព៖ លោក ឃុត សៅ
