នៅថ្ងៃទី២២ ខែកញ្ញា ឆ្នាំ២០២១ លោក ប្រាក់ លំអង សមាជិកគណ:កម្មាធិការអនុសាខាកាកបាទក្រហមកម្ពុជា ស្រុកប្រាសាទបាគង និងសហការី បានអញ្ជើញសួរសុខទុក្ខ និងនាំយកអំណោយមនុស្សធម៌ប្រគល់ជូនគ្រួសារលោកស្រីឈ្មោះ ជួន សេដា អាយុ ៦៤ឆ្នាំ ជាស្ត្រីមេម៉ាយ មានកូន ០២នាក់ ដែរត្រូវបានអគ្គីភ័យឆេះផ្ទះ១ខ្នង កាលពីយប់ថ្ងៃទី២០ ខែកញ្ញា ឆ្នាំ២០២១ នៅភូមិតាអី ឃុំត្រពាំងធំ ស្រុកប្រាសាទបាគង ខេត្តសៀមរាប។ អំណោយមនុស្សធម៌រួមមាន៖ អង្ករ ២០គីឡូក្រាម, ត្រីខ១យួរ, ទឹកបរិសុទ្ធ១កេស, មី១កេស, តង់១, ធុង១, កន្ទេល១, មុង១, ឆ្នាំបាយ១, ភួយ១, ខ្នើយ១, ចានសម្ល៥, ចានបាយ៥, ស្លាបព្រា៥, វែកបាយ១, ចានស្រាក់១ និងថវិកា ២សែន ៧ម៉ឺនរៀល។
ក្នុងឱកាសនោះដែរ លោក ប្រាក់ លំអង បានពាំនាំនូវការផ្ដាំផ្ញើសួរសុខទុក្ខពីឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត និងលោក សូរ ប្លាតុង ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកប្រាសាទបាគង ដែលតែងគិតគូរចំពោះសុខទុក្ខបងប្អូនប្រជាពលរដ្ឋ ដោយប្រកាន់ខ្ជាប់នូវគោលការណ៍គ្រឹះទាំង៧ របស់ចលនាអន្តរជាតិកាកបាទក្រហម អឌ្ឍចន្ទក្រហម។ ជាមួយនោះលោក និងក្រុមការងារ ក៏សូមចូលរួមសោកស្តាយជាខ្លាំង ចំពោះឧបទ្ទវហេតុអគ្គីភ័យឆេះផ្ទះនេះ និងបានលើកទឹកចិត្តបងស្រីឲ្យរឹងពឹងឡើង ដើម្បីប្រកបរបរចិញ្ចឹមជីវិតក្នុងគ្រួសារឲ្យប្រសើរឡើង ពិសេសថែទាំកូន០២នាក់ឲ្យបានល្អ ដែលកំពុងនៅក្នុងបន្ទុកនៅឡើយ។
ជាមួយគ្នានោះដែរលោក ប្រាក់ លំអង ក៏បានក្រើនរំលឹកដល់បងប្អូនប្រជាពលរដ្ឋ ពិសេសម្ចាស់ផ្ទះផ្ទាល់ សូមមានការប្រុងប្រយ័ត្នខ្ពស់នៅពេលអុជធូប ទៀនកុំដើរចោលផ្ទះ ហើយមុនចាកចេញពីផ្ទះសូមមើលចាំភ្លើងធូប ទៀនរលត់សិន និងម្យ៉ាងទៀតសូមពិនិត្យ និងបិទចរន្តភ្លើងអគ្គិសនី ព្រោះវាក៏ជាហេតុគ្រោះភ័យមួយ ដែលបណ្តាលឲ្យមានអគ្គីភ័យឆេះឡើង។ បន្ថែមពីនោះ លោកក៏ក្រើនរំលឹកដល់អាជ្ញាធរភូមិឃុំ បន្តចូលរួមការពារផ្សព្វផ្សាយអំពីការឆ្លងរីករាលដាលនៃជំងឺកូវីដ-១៩ និងកូវីដបំលែងប្រភេទថ្មី ឌែលតា ឲ្យបានទូលំទូលាយមិនត្រូវធ្វេសប្រហែសឲ្យសោះ ខណៈក្នុងស្រុកប្រាសាទបាគង ក៏មានភូមិមួយចំនួនកំពុងស្ថិតក្នុងតំបន់ក្រហមផងដែរ ក្នុងនោះក៏សូមឲ្យប្រចាំពលរដ្ឋទាំងអស់ ត្រូវចូលរួមអនុវត្តឲ្យបានខ្ជាប់ខ្ជួន តាមការណែនាំរបស់រាជរដ្ឋាភិបាល និងក្រសួងសុខាភិបាលនូវវិធាន ៣កុំ ៣ការពារឲ្យបានជាប់ជានិច្ច ដើម្បីកាត់ផ្ដាច់ជំងឺកូវីដ-១៩ ផុតពីមូលដ្ឋានភូមិស្រុករបស់យើង ក៏ដូចជាខេត្តសៀមរាប និងប្រទេសកម្ពុជាទាងមូលផងដែរ៕
ព័ត៌មានជាតិ ថ្មីៗ
អត្តបទនិងរូបភាព៖កាកបាទក្រហមកម្ពុជា
