គិតចាប់ពីវេនទី១ មកដល់វេនទី៣ នៃពិធីបុណ្យកាន់បិណ្ឌក្នុងឆ្នាំ២០២១នេះ ទីវត្ដអារាមស្ទើរទាំងស្រុងក្នុងក្រុងសៀមរាប មិនមានរៀបចំពិធីបុណ្យកាន់បិណ្ឌ បោះបាយបិណ្ឌ ឬជួបជុំគ្នាដាក់បាតព្រះសង្ឃដូចឆ្នាំមុនៗនោះទេ ដោយសារមានការរីករាលដាលនូវជំងឺកូវីដ-១៩ធ្ងន់ធ្ងរ និងដាក់ក្រុងសៀមរាបជាតំបន់លឿងទុំ និងតំបន់ក្រហម ។
តាមសង្ឃដីកា ព្រះតេជគុណ ឡាច លាង ព្រះអនុគណក្រុងសៀមរាប និងជាព្រះចៅអធិការវត្ដពោធិវង្ស ហៅវត្ដថ្មី ស្ថិតនៅសង្កាត់គោកចក ក្រុងសៀមរាប បង្ហាញថា ការមិនបានរៀបចំពិធីកាន់បិណ្ឌកុះករនេះ គឹស្របតាមសេចក្ដី ណែនាំរបស់រាជរដ្ឋាភិបាល ក៏ដូចជាក្រសួងសុខាភិបាល ពីការប្រយុទ្ធប្រឆាំងនឹងជំងឹឆ្លងកូវីដ-១៩ ខណ:ដែលប្រជាពលរដ្ឋមានការព្រួយបារម្ភខ្លាចឆ្លងជំងឺកូវីដ-១៩។ ព្រះអង្គបានបន្ថែមថា វត្ដអារាម ស្ទើរទាំងអស់ ដែលមិនមានប្រជាពលរដ្ឋទៅធ្វើបុណ្យកាន់បិណ្ឌ ជួបជុំគ្នារាប់បាត បោះបាយបិណ្ឌ សូត្រមន្ដ ឱ្យមានភាពអ៊ូអរ ដូចរាល់ឆ្នាំនោះទេ ដោយគ្រាន់តែប្រជាពលរដ្ឋខ្លះ ដែលបានដាក់វេន ហើយបានយកចង្ហាន់ និងទេយ្យទាន ទៅជូនចុងភៅ ដើម្បីធ្វើចង្ហាន់ប្រគេនព្រះសង្ឃធម្មតា ហើយត្រឡប់ទៅវិញដោយប្រញាប់ប្រញាល់ ។ ការអនុវត្ដបែបនេះ ដើម្បីចូលទប់ស្កាត់ការឆ្លងជំងឺនេះផងដែរ ខណ:ដែលវត្ដខ្លះនៅតំបន់ក្រហម និងតំបន់លឿងទុំ ដែលពលរដ្ឋមិនត្រូវបានអនុញ្ញាតឱ្យចេញពីផ្ទះ។ ព្រះអង្គបន្ថែមទៀតថា ទីវត្ដអារាមខ្លះ ស្ថិតនៅក្នុងតំបន់លឿងទុំ និងតំបន់ក្រហម តែនៅជាយក្រុងសៀមរាប អាចសូត្រមន្ដ ឬរាប់បាត ដាក់បិណ្ឌធម្ម ប៉ុន្ដែមិនឱ្យមានចំនួនច្រើនឡើយ។
ព្រះចៅអធិការវត្ដ ព្រះឥន្ទកោសីយ៍ ព្រះអង្គ តាត មហាទី ព្រះអង្គបានគាំទ្រលើការមិនរៀបចំមានពិធីកាន់បិណ្ឌនេះ ដោយព្រះអង្គមានសង្ឃដីកាថា ការអត់មានពុទ្ធបរិសទ្ធទៅធ្វើបុណ្យ ឬអត់ចង្ហាន់មួយរយ:ខ្លី ប្រសើរជាងការបាត់បង់ជីវិត។ព្រះអង្គបានបន្ដថា ទីវត្ដអារាមនៅក្នុងក្រុងសៀមរាប នេះ មានជាង៤០វត្ដ ភាគច្រើនគឺមិនមានពុទ្ធបរិស័ទ្ធទៅធ្វើពិធីកាន់បិណ្ឌនោះទេ លើកលែងតែវត្ដនៅតាមណ្ដាស្រុកក្នុងភូមិសាស្ដ្រខេត្ដសៀមរាប។ ព្រះអង្គអំពាវនាវឱ្យពុទ្ធបរិសទ្ធចូលរួមទប់ស្កាត់ការឆ្លងជំងឺកូវីដ-១៩នេះ ទាំងអស់គ្នា ដើម្បីខេត្ដសៀមរាបសំបូរទេសចរណ៍ជាតិនិងអន្ដរជាតិឡើងវិញ។
គួរបញ្ជាក់ថា កាលពីថ្ងៃទី២៣ ខែកញ្ញា ឆ្នាំ២០២១នេះ រាជរដ្ឋាភិបាលបានចេញសេចក្តីសម្រេច ស្ដីពីផ្អាកការរៀបចំ ពិធីកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាល នៃជំងឺកូវីដ-១៩ ជាផ្លុវការ ចាប់ពីបិណ្ឌ៤ រហូតដល់ថ្ងៃភ្ជុំបិណ្ឌ បន្ទាប់ពីរកឃើញអ្នកមាន វិជ្ជមានមរោគកូវីដ-១៩ នៅតាមវត្តអារាមអំឡុងពិធីកាន់បិណ្ឌវេនទី១ និងទី២ជាច្រើននាក់។ ក្នុងនោះសម្ដេចតេជោ ក៏បានណែនាំដល់គណៈអភិបាលរាជធានី-ខេត្ត ត្រូវធ្វើការសម្របសម្រួល ជាមួយយន្តការដែលមានការពាក់ព័ន្ធទាំងអស់ ដើម្បីធានាដល់ការនាំយកចង្ហាន់ និងទេយ្យវត្ថុចាំបាច់នានា ប្រគេនដល់ព្រះសង្ឃនៅតាមបណ្តាវត្តអារាមនានា ដែលស្ថិតក្នុងសមត្ថកិច្ចដែនដីរបស់ខ្លួន៕
អត្ថបទ និងរូបភាព៖ លោកបូ សាវី
កែសម្រួល៖ លោក លីវ សុខុន
