កាលពីព្រឹកថ្ងៃទី២៣ ខែ កញ្ញា ឆ្នាំ២០២១ម្សិលមិញនេះ ក្រុមហ៊ុន JET’S EXPRESS CAMBODIA របស់ លោកឧកញ៉ា ស្រី ចាន់ថន នាំយកមកនូវអំណោយជាអង្ករចំនួន ៧តោន . មី . ត្រីខ . ទឹកត្រី . ទឹកសុទ្ធ សរុប៧០០កេស ,សហភាពសហព័ន្ធស្រូវអង្ករកម្ពុជា នាំយកមកនូវអំណោយជាអង្ករចំនួន ៤តោនកន្លះ និង ក្រុមហ៊ុន គឹម ផល្លី គ្រុប ផ្តល់តាមរយៈសមាគមចលនាយុវជនកម្ពុជា ១៥៧ នាំយកមកនូវអំណោយជាអង្ករចំនួន ១តោន . មី១២កេសតូច និងទឹកសុទ្ធ១០០យួរ ជូនដល់រដ្ឋបាលខេត្តសៀមរាប សម្រាប់ប្រើប្រាស់ក្នុងការប្រយុទ្ធប្រឆាំងនឹងជំងឺកូវីដ-១៩ ក្នុងភូមិសាស្ត្រខេត្តសៀមរាប ។
ពិធីប្រគល់នេះ បានប្រព្រឹត្តទៅសាលាខេត្តសៀមរាប ក្រោមអធិបតីភាពខ្ពង់ខ្ពស់របស់ឯកឧត្តម ទៀ សីហា អភិបាលនៃគណៈអភិបាលខេត្ត និង លោក ពិន ប្រាកដ អភិបាលរងខេត្ត ដោយមានការចូលរួមពីសំណាក់លោក លោកស្រី ជាមន្ត្រីអ្នកមុខអ្នកការនៃសាលាខេត្តសៀមរាប ជាច្រើនរូបទៀត ។
មានប្រសាសន៍នោះដែរឯកឧត្តម ទៀ សីហា បានថ្លែងនូវអំណរគុណដល់ទឹកចិត្តដ៏ប្បុរសធម៌របស់ ក្រុមហ៊ុន JET’S EXPRESS CAMBODIA របស់ លោកឧកញ៉ា ស្រី ចាន់ថន , សហភាព សហព័ន្ធ ស្រូវ អង្ករកម្ពុជា និង ក្រុមហ៊ុន គឹម ផល្លី គ្រុប ដែលបានផ្តល់អំណោយជាគ្រឿងបរិភោគជូនដល់រដ្ឋបាលខេត្តសៀមរាបនាពេលនេះ ក្នុងកិច្ចបម្រើដល់យុទ្ធនាការ ប្រយុទ្ធប្រឆាំងបង្ការ ទប់ស្កាត់ជំងឺកូវីដ-១៩ ដែលសកម្មភាពនេះ បង្ហាញឲ្យឃើញពីការចូលរួមជាមួយរាជរដ្ឋាភិបាល ជាពិសេសរដ្ឋបាលខេត្តតែម្តង ក្នុងអំឡុងពេលប្រយុទ្ឋទប់ស្កាត់នៅការពារការឆ្លងរីករាលដាលដោយជំងឺកូវីដ-១៩នេះ ។
ឯកឧត្តម ទៀ សីហា មានប្រសាសន៍ទៀតថា អំណោយជាគ្រឿងឧបភោគបរិភោគទាំងអស់នេះ រដ្ឋបាលខេត្ត នឹងធ្វើការបែងចែកជូនទៅអាជ្ញាធរក្រុង ស្រុក ដើម្បីចែកជូន ដល់បងប្អូនប្រជាពលរដ្ឋជាគ្រូសារក្រ១,ក្រ២ នៅក្នុងមូលដ្ឋានខ្លួន ខនៈក្នុងរយៈពេលធ្វើការបិទខ្ទប់ នៅតំបន់ក្រហមកន្លងមកនេះ រដ្ឋបាលខេត្តផ្តល់នូវស្បៀង តាមរយៈអាជ្ញាធរមូលដ្ឋានយកទៅផ្តល់ជូននៅតាមលំនៅដ្ឋាន ចំពោះប្រជាពលរដ្ឋ ប្រភេទក្រ១ , ក្រ២ ដែលនៅទូទាំងក្រុងសៀមរាបមានប្រមាណ៧ពាន់គ្រួសារ ដែលបានវចែកជូនជាបន្តបន្ទាប់ផងដែរ ។
ក្នុងឱកាសនៈដែរឯកឧត្តមអភិបាលខេត្ត បានធ្វើការអំពាវនាវដល់បងប្អូនប្រជាពលរដ្ឋក្នុងខេត្តសៀមរាប ក៏ដូចទូទាំងប្រទេស សូមចូលរួមជាមួយអាជ្ញាធរ ក្នុងការអនុវត្តវិធានការឲ្យមានប្រសិទ្ធភាពខ្ពស់ ក្នុងការកាត់ផ្តាច់ការចម្លងមេរោគដ៏កាច សាហាវនេះ កុំឲ្យរីករាលដាលចូលក្នុងសហគមន៍ ដល់គ្រួសារ និង ញាតិមិត្តរបស់ខ្លួន ដែលធ្វើឲ្យយើងបាត់បង់នូវពេលវេលា ក្នុងកិច្ចការប្រកបរបរចិញ្ចឹមជីវិត នៅពេលធ្វើការបិទខ្ទប់ និងត្រូវបន្តចូលរួមសហការអនុវត្តវិធានការរបស់រាជរដ្ឋាភិបាល ៣កុំ ៣ការពារ ឲ្យមានប្រសិទ្ធភាពខ្ពស់បំផុត ព្រមទាំងបន្តប្រកាន់នូវវិធានសុខាភិបាលឲ្យបានខ្ជាប់ខ្ជួនបើទោះបីបងប្អូនបានធ្វើការចាក់វ៉ាក់សាំងបានគ្រប់ដូសក៏ដោយ ៕
អត្ថបទ និង រូបតថត ៖ លោ ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
