អភិបាលរងខេត្តសៀមរាប លោកស្រី យូ សុភា បានទូលប្រគេនស្នើដល់ព្រះអនុគណក្រុងសៀមរាប ក្នុងអំឡុងពេលនៃពិធីបុណ្យភ្ជុំបិណ្ឌនិងកាន់បិណ្ឌ សូមពិនិត្យឱ្យបានច្បាស់លាស់ចំពោះវត្តអារាមនានានៅទូទាំងក្រុងសៀមរាបជាពិសេសវត្តដែលស្ថិតក្នុងតំបន់ក្រហមថាតើវត្តណាខ្លះខ្វះខាតចង្ហាន់ជាក់ស្តែងពិតប្រាកដ ជាពិសេសផ្តល់អាទិភាពដល់វត្តដែលកំពុងស្ថិតនៅក្នុងតំបន់ក្រហមដជាតំបន់ឆ្លងជំងឺកូវីដ-១៩ច្រើន ហើយប្រជាពុទ្ឋបរិស័ទមិនអាចចេញចូលយកចង្ហាន់ទៅប្រគេនបាន ដើម្បីរដ្ឋបាលខេត្តនឹងរៀបចំទេយ្យវត្ថុនិងគ្រឿងឧបភោគបរិភោគយកទៅប្រគេនបានទាន់ពេលវេលា។
លោកស្រី យូ សុភា មានប្រសាសន៍ដូច្នេះក្នុងឱកាស នាំយកថវិកា និងស្បៀងអាហារ ដើម្បីផ្គត់ផ្គង់ព្រះសង្ឃក្នុងពិធីកាន់បិណ្ឌនិងភ្ជុំបិណ្ឌ នៅទេពពោធិវង្ស ហៅវត្តថ្មីស្ថិតក្នុងក្រុងសៀមរាបខេត្តសៀមរាបកាលពីព្រឹកថ្ងៃទី២៥ខែកញ្ញាឆ្នាំ២០២១។លោកស្រី អភិបាលរងខេត្តមានប្រសាសន៍ថា៖ក្នុងគ្រាលំបាក ដោយសារតែមេរោកូវីដ-១៩បន្តរីករាលដាល បានបណ្តាលឱ្យប៉ះពាល់ដល់ជីវភាពបងប្អូនប្រជាពុទ្ធបរិស័ទទូទៅ និងមួយផ្នែកដល់សហគមន៍វត្តអារាមព្រះពុទ្ធសាសនាផងដែរ ហេតុនេះអាជ្ញាធរខេត្ត ក្រោមការដឹកនាំរបស់ឯកឧត្តម ទៀ សីហា ជាអភិបាលនៃគណៈអភិបាលខេត្ត និងឯកឧត្តម អ៊ាន ឃុន ប្រធានក្រុមប្រឹក្សាខេត្ត តែងតែគិតគូរគ្រប់ពេលវេលាអំពីសុខទុក្ខដល់បងប្អូនប្រជាពលរដ្ឋនិងព្រះសង្ឃនៅតាមទីអារាមនានា ។លោកស្រីបានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ថ្នាក់ដឹកនាំខេត្ត ថ្វាយប្រគេនចំពោះព្រះអនុគណក្រុង ដែលជាព្រះចៅអធិការ ព្រមទាំងព្រះសង្ឃគ្រប់អង្គក្នុងវត្តទេពពោធិវង្ស សូមមានការយោគយល់ និងជួយជម្រុញឱ្យចូលរួមទាំងអស់អង្គទាំងអស់គ្នា ដើម្បីរួមគ្នាទប់ស្កាត់ការឆ្លងរាលដាលជំងឺកូវីដ-១៩ នៅក្នុងសហមន៍របស់យើង ក្នុងអំឡុងពេលនេះ ជាពិសេសត្រូវអនុវត្តឲ្យបានជាប់ជាប្រចាំតាមសេចក្តីណែនាំរបស់រដ្ឋបាលខេត្ត ,វិធានការនានារបស់ក្រសួងសុខាភិបាល និង វិធានការរបស់រាជរដ្ឋាភិបាល ៣កុំ និង ៣ការពារ ឲ្យបានខ្ជាប់ខ្ជួន ហើយ លោកស្រី ក៍បានស្នដល់ព្រះអនុគណក្រុង សូមពិនិត្យមើលវត្តអារាមនានាក្នុងក្រុងសៀមរាប បើមានការខ្វះខាតផ្នែកចង្ហាន់សូមរាយការណ៍ជាបន្ទាន់ទៅរដ្ឋបាលខេត្តដើម្បីក្រុមការងាររៀបចំដោះស្រាយ ចៀសវាងការបង្ហោះរូបភាពមិនសមរម្យតាមបណ្តាញសង្គមដែលមិនបានរាយការណ៍និងមិនបានពិនិត្យឱ្យបានច្បាស់លាស់ជាមុន ចៀសវាងការយល់ច្រឡំថារដ្ឋបាលនិងអាជ្ញាធរខេត្ត មិនបានគិតគូរដល់ព្រះសង្ឃ។
លោកស្រី យូ សុភា មានប្រសាសន៍បញ្ជាក់ថា៖ ជារៀងរាល់ឆ្នាំឱ្យតែដល់រដូវភ្ជុំបិណ្ឌ រដ្ឋបាលខេត្តតែងតែរៀបចំពិធីកាន់បិណ្ឌ នៅវត្តមួយក្នុងក្រុងសៀមរាប និង ស្រុកមួយចំនួន ប៉ុន្តែសម្រាប់ឆ្នាំនេះ ដោយសារតែមានការព្រួយបារម្ភពីការឆ្លងរីករាលដាលនៃជំងឺកូវីដ-១៩ រាជរដ្ឋាភិបាល និង រដ្ឋបាលខេត្ត សម្រេចផ្អាកការរៀបចំពិធីបុណ្យកាន់បិណ្ឌ និងភ្ជុំបិណ្ឌ ដើម្បីទប់ស្កាត់ការឆ្លងរាលដាលនៃជំងឺកូវីដ-១៩ ចាប់ពីបិណ្ឌ៤ រហូតដល់ថ្ងៃភ្ជុំបិណ្ឌ ដូច្នេះរដ្ឋបាលខេត្តមិនអាចប្រារព្ធពិធីកាន់បិណ្ឌតាមបែបទំនៀមទម្លាប់បានឡើយ ហើយការនាំយកថវិកា និងស្បៀងអាហារ ប្រគេនដល់ព្រះសង្ឃគង់នៅវត្តនេះក៍ដូចជាវត្តចំនួន៧ទៀតគឺ ដើម្បីផ្គត់ផ្គង់ព្រះសង្ឃក្នុងពិធីកាន់បិណ្ឌ ជាលក្ខណៈបង្រ្គប់កិច្ចផង និងតាមការកំណត់ដែលរដ្ឋបាលខេត្តធ្លាប់បានប្រតិបត្តិតាមវត្តមួយចំនួននាឆ្នាំកន្លងមកដែរ។
សូមជំរាបថា៖នៅព្រឹកថ្ងៃទី២៥ ខែកញ្ញា ឆ្នាំ២០២១ លោកស្រីយូ សុភា អភិបាលរងខេត្តនិងជាតំណាងដ៍ខ្ពង់ខ្ពស់ឯកឧត្តម ទៀ សីហា អភិបាលនៃគណៈអភិបាលខេត្ត និងលោកជំទាវ ស៊ិន ណម សមាជិកក្រុមប្រឹក្សាខេត្ត ជាតំណាងដ៍ខ្ពង់ខ្ពស់ឯកឧត្តម អ៊ាន ឃុន ប្រធានក្រុមប្រឹក្សាខេត្ត រួមជាមួយលោក វណ្ណប៊ុនណាប្រធានមន្ទីរធម្មការនិងសាសនាខេត្តនិងសហការី បាននាំយកថវិកា និងគ្រឿងឧបភោគបរិភោគ ស្បៀងអាហារ យកទៅប្រគេនដល់ព្រះសង្ឃគង់នៅវត្តទេពពោធិវង្ស ហៅវត្តថ្មី ក្នុងសង្កាត់គោកចក ក្រុងសៀមរាប ដើម្បីផ្គត់ផ្គង់ព្រះសង្ឃក្នុងពិធីបុណ្យកាន់បិណ្ឌនិងភ្ជុំបិណ្ឌ ខណៈពិធីសម្រាប់ឆ្នាំនេះត្រូវបានផ្អាកដោយសារវិបត្តិជំងឺកូវី-១៩ឆ្លងរីករាលដាល ។
ថវិកា និងស្បៀងអាហារ ដែលបានប្រគេនសម្រាប់រៀបចំក្នុងពិធីកាន់បិណ្ឌនាពេលនោះ មាន៖ អង្ករចំនួន២៥០គីឡូក្រាម , មី៥កេស , ទឹកសុទ្ឋ១០កេស , ទឹកក្រូច១០កេស , ទឹកត្រី៤យួរ , ទឹកស៊ីអ៊ីវ៤យួរ , ត្រីខ ១កេស , ទឹកដោះគោ១កេស , តែ៥កញ្ចប់ , ស្ករស១០គីឡូក្រាម , សាដក់៣ ព្រមទាំងធូបទៀន និង ប្រគេនថវិកាសម្រាប់វត្តចំនួន២លានរៀល , ប្រគេនព្រះចៅអធិការចំនួន១០ម៉ឺនរៀល និងគ្រូសូត្រឆ្វេងស្តាំ ក្នុងមួយអង្គៗចំនួន៥ម៉ឺនរៀល។សម្រាប់ភ្ជុំបិណ្យឆ្នាំនេះរដ្ឋបាលខេត្តគ្រោងនឹងនាំទេយ្យវត្ថុ និងថវិកាទៅប្រគេនវត្តចំនួន៨នៅក្នុងខេត្តសៀមរាបក្នុងនោះបានប្រគេនរួចវត្តចំនួន៤ រួមមាន៖វត្តព្រះព្រហ្មរ័ត្ន វត្តកេសរារាម វត្តប្រាសាទគោកចក វត្តទេពពោធិវង្ស ។
អត្ថបទ និងរូបភាព លោកយូ វង្ស
