នៅថ្ងៃទី២៦ ខែកញ្ញា ឆ្នាំ២០២១ នៅសាលាខេត្តសៀមរាប លោក នាក់ ណេរ៉ុន អភិបាលរងខេត្ត តំណាងឯកឧត្តម ទៀ សីហា អភិបាលនៃគណៈអភិបាលខេត្ត បានទទួលអំណោយពី ក្រុមហ៊ុន Khmer Times Media Group នូវ៖ អង្ករ ២តោន និងមី ៥០កេះ ដើម្បីផ្តល់ជូនបងប្អូនប្រជាពលរដ្ឋដែលមានជីវភាពខ្វះខាតក្នុងវិបត្តិកូវីដ-១៩។
លោក នាក់ ណេរ៉ុន មានប្រសាសន៍ថា ការផ្តល់ជាអំណោយទាំងនេះ គឺជាវប្បធម៌ចែករំលែកក៏ដូចជាការចូលរួមចំណែកជាមួយរាជរដ្ឋាភិបាល និងរដ្ឋបាលខេត្តសៀមរាបក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងឆ្លងក្នុងសហគមន៍នាពេលបច្ចុប្បន្ន។ ចំពោះអំណោយទាំងនេះដែរ រដ្ឋបាលខេត្តនឹងធ្វើការបែងចែកដល់ប្រជាពលរដ្ឋដែលមានការខ្វះខាតនៅតាមបណ្តាក្រុង ស្រុកដែលជាតំបន់ក្រហម។
លោកអភិបាលរងខេត្ត មានប្រសាសន៍ទៀតថា ទន្ទឹមនឹងនេះ រដ្ឋបាលខេត្តក៏សូមការយោគយល់ និងសូមបងប្អូនប្រជាពលរដ្ឋធ្វើការអត់ធ្មត់ និងចូលរួមទាំងអស់គ្នាក្នុងការប្រយុទ្ធប្រឆាំងនឹងជំងឺកូវីដ-១៩ក្នុងដំណាក់កាលដ៏លំបាកនេះ។ បន្ទាប់ពីយើងឆ្លងផុតគ្រាលំបាកនេះ យើងនឹងអាចដំណើរការអាជីវកម្មរបស់យើង ដើម្បីឱ្យសេដ្ឋកិច្ចគ្រួសារ ព្រមទាំងសេដ្ឋកិច្ចជាតិឱ្យកាន់តែប្រសើរឡើងវិញ។ ក្នុងនោះរដ្ឋបាលខេត្តសង្ឃឹមយ៉ាងមុតមាំថា បងប្អូននឹងចូលរួមសហការជាមួយនឹងក្រសួង និងអាជ្ញាធរមានសមត្ថកិច្ចពាក់ព័ន្ធ ដើម្បីរួមចំណែកក្នុងការប្រយុទ្ធប្រឆាំង ទប់ស្កាត់ និងកាត់ផ្តាច់ការចម្លងជំងឺកូវីដ-១៩ ចេញពីសហគមន៍យើង ពិសេសចូលរួមអនុវត្ត ៣ការពារ និង៣កុំឱ្យបានខ្ជាប់ខ្ជួន៕
អត្ថបទ និងរូប៖ រដ្ឋបាលខេត្តសៀមរាប
