នៅព្រឹកថ្ងៃទី២៧ ខែកញ្ញា ឆ្នាំ២០២១នេះ លោក ឡំ សុខាក់ នាយករដ្ឋបាលសាលាក្រុងតំណាងលោក នួន ពុទ្ធារ៉ា អភិបាលក្រុងសៀមរាប បានទទួលអំណោយជាអង្ករចំនួន ១តោន ពីក្រុមហ៊ុនសហគ្រាស ចុង ជៀន ថុង អ៊ិចប្រេស ១៦៨ សម្រាប់ចែកជូនដល់គ្រួសារប្រជាពលរដ្ឋ ដែលមានជីវភាពខ្វះខាត និងងាយរងគ្រោះ ដោយសារវិបត្តិជំងឺកូវីដ-១៩ ដែលបាននឹងកំពុងមានការឆ្លងរាលនៅឡើយ ក្នុងភូមិសាស្ត្រខេត្តសៀមរាប ។
មានប្រសាសន៍ក្នុងឱកាសនោះ លោក ឡំ សុខាក់ បានថ្លែងនូវអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ប្រធាន និងក្រុមការងារនៃក្រុមហ៊ុនសហគ្រាស ចុង ជៀន ថុង អ៊ិចប្រេស ១៦៨ ដែលបានចូលរួមចំណែកជាមួយរដ្ឋបាលខេត្តក្នុងគ្រាំបាកគ្រប់កាលៈទេសៈ ដែលកាយវិការនេះ គឺជាវប្បធម៌មួយក្នុងការចែករំលែករវាងសប្បុរសជនជាមួយរាជរដ្ឋាភិបាល ក្នុងការជួយសង្គ្រោះពលរដ្ឋក្នុងគ្រាលំបាក ពិសេសជាការចូលរួមចំណែកជាមួយរាជរដ្ឋាភិបាលនិងរដ្ឋបាលខេត្ត ក្រុង ក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងឆ្លងក្នុងសហគមន៍នាពេលបច្ចុប្បន្ន ហើយអំណោយទាំងនេះរដ្ឋបាលក្រុងនឹងធ្វើការផ្គត់ផ្គង់ដល់ប្រជាពលរដ្ឋដែលមានការខ្វះខាតនៅតាមភូមិសង្កាត់ ដែលបានកំណត់ជាតំបន់ក្រហម។
លោក ឡំ សុខាក់ បានឲ្យដឹងទៀតថា កន្លងមករដ្ឋបាលក្រុងសៀមរាប បានផ្តោតសំខាន់ចំពោះបងប្អូនគ្រួសារក្រ១,ក្រ២ ដែលជាគ្ឬួសារងាយរងគ្រោះបំផុត ដោយត្រូវធ្វើការផ្តល់ជូនដល់បងប្អូនជាគ្រឿងឧបឧបភោគបរិភោគនៅតាមខ្នងផ្ទះផ្ទាល់តែម្តង ហើយមុនវិបត្តិជំងឺកូវីដ-១៩ ស្ថិតិប្រជាពលរដ្ឋប្រភេទក្រ១-ក្រ២ នៃក្រុងសៀមរាបមានប្រហែលជា៦ពាន់គ្រួសារ ប៉ុន្តែបច្ចុប្បន្នមានរហូតដល់ជាង១ម៉ឺនគ្រួសារហើយ ដូច្នេះនៅក្នុងចំនួននេះ ការស្រង់ស្ថិតិក្នុងយុទ្ធនាការផ្តល់ការឧបត្ថម្ភជាអង្ករ ដល់គ្រួសារក្រ១-ក្រ២ និងគ្រួសារប្រជាពលរដ្ឋធ្លាក់ខ្លួនក្រដោយសារវិបត្តិកូវីដ-១៩ សម្រាប់តែក្នុងតំបន់ក្រហម មានប្រមាណជិត៧ពាន់គ្រួសារ ។
ក្នុងឱកាសនោះដែរលោកនាយករដ្ឋបាលសាលាក្រុងសៀមរាប បានសង្ឃឹមយ៉ាងមុតមាំថា បងប្អូនប្រជាពលរដ្ឋទាំងអស់ក្នុងក្រុងសៀមរាប នឹងចូលរួមសហការជាមួយនឹងរាជរដ្ឋាភិបាល ក្រសួងសុខាភិបាល និងអាជ្ញាធរខេត្ត ក្រុង ដើម្បីរួមចំណែកក្នុងការប្រយុទ្ធប្រឆាំង ទប់ស្កាត់ និងកាត់ផ្តាច់ជំងឺកូវីដ-១៩ចេញពីសហគមន៍យើង ពិសេសចូលរួមអនុវត្តនូវវិធានការរបស់រាជរដ្ឋាភិបាល ៣ការពារ និង៣កុំ ឱ្យបានខ្ជាប់ខ្ជួន៕
អត្ថបទ និងរូបភាព ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
