នៅព្រឹកថ្ងៃទី២៤ ខែកញ្ញា ឆ្នាំ២០២១នេះ លោក គាំ គឿន និងក្រុមគ្រួសារ រស់នៅភូមិជ្រាវ សង្កាត់ជ្រាវ ក្រុងសៀមរាប បាននាំយកនូវអង្ករចំនួន១.១០០គីឡូក្រាម , ត្រីខ ២កេសធំ , ប្រេងឆា១១០ដប , ប៊ីចេង១១០កញ្ចប់ និងពងទា៦៦០ពង មកប្រគល់ជូនដល់រដ្ឋបាលសង្កាត់ជ្រាវ ក្រោមវត្តមានលោក ក្អោប រ៉ន ចៅសង្កាត់ជ្រាវ សម្រាប់សកម្មភាពប្រយុទ្ធប្រឆាំងជំងឺកូវីដ១៩ នៅក្នុងមូលដ្ឋាន ។
មានប្រសាសន៍ក្នុងឱកាសនោះ លោក ក្អោប រ៉ន ចៅសង្កាត់ជ្រាវ បានថ្លែងនូវអំណរគុណយ៉ាងជ្រាលជ្រៅចំពោះទឹកចិត្តសប្បុរសធម៌របស់ចំពោះ លោក គាំ គឿន និងក្រុមគ្រួសារ ដែលបានបរិច្ចាគធនធានផ្ទាល់ខ្លួន ឧបត្ថម្ភជូនដល់រដ្ឋបាលសង្កាត់ ដើម្បីចែកជូនដល់ប្រជាពលរដ្ឋក្រីក្រ ដែលនៅក្នុងតំបន់បិទខ្ទប់ ក៏ដូចជាពលរដ្ឋដែលកំពុងធ្វើចត្តាឡីស័ក ឬកំពុងព្យាបាលនៅតាមផ្ទះក្នុងមូលដ្ឋានសង្កាត់ជ្រាវ ហើយអំណោយទាំងអស់នេះ អាជ្ញាធរសង្កាត់ នឹងប្រើប្រាស់ឲ្យចំគោលដៅ និងស្មើភាពដោយមិនរើសអើង ឬប្រកាន់និន្នាការអ្វីឡើយ។
ជាមួយគ្នានោះដែរលោកចៅសង្កាត់ជ្រាវ បានអំពាវនាវដល់បងប្អូនប្រជាពលរដ្ឋទាំងអស់ក្នុងសង្កាត់ ត្រូវមានការអត់ធ្មត់ចំពោះការបិទខ្ទប់នេះ នឹងចូលរួមសហការជាមួយនឹងរាជរដ្ឋាភិបាល ក្រសួងសុខាភិបាល និងអាជ្ញាធរខេត្ត ក្រុង ដើម្បីរួមចំណែកក្នុងការប្រយុទ្ធប្រឆាំង ទប់ស្កាត់ និងកាត់ផ្តាច់ជំងឺកូវីដ-១៩ចេញពីសហគមន៍យើង ពិសេសចូលរួមអនុវត្តនូវវិធានការរបស់រាជរដ្ឋាភិបាល ៣ការពារ និង៣កុំ ឱ្យបានខ្ជាប់ខ្ជួន៕
គួររំលឹកថា កាលពីថ្ងៃទី១៧ ខែកញ្ញា ឆ្នាំ២០២១ សង្កាត់ជ្រាវ រួមជាមួយសង្កាត់៣ផ្សេងទៀត ក្នុងក្រុងសៀមរាប ត្រូវបានរដ្ឋបាលខេត្តសៀមរាប ដាក់បញ្ចូលក្នុងតំបន់”ក្រហម” ជាកន្លែងដែលមានហានីភ័យខ្ពស់ក្នុងការឆ្លងរីករាលដាលនៃមេរោគកូវីដ១៩ ប៉ុន្តែនៅថ្ងៃទី២៣ ខែកញ្ញានេះ រដ្ឋបាលខេត្តសៀមរាប បានសម្រេចបង្រួមតំបន់ក្រហមក្នុងសង្កាត់ជ្រាវ ដោយទុកតែភូមិខ្នារមួយប៉ុណ្ណោះ ចំណែកភូមិដទៃទៀត ត្រូវដាក់ជាតំបន់”លឿងទុំ”វិញ ៕
អត្ថបទ និងរូបភាព ៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
