ក្រុមហ៊ុនចៅ សាំងហុក នាំយកអំណោយជាគ្រឿងឧបភោគបរិភោគមួយចំនួន រួមមាន: អង្ករ ៥០០គ.ក្រ និងត្រីខ ៥កេស ប្រគល់ជូនដល់សាលាខេត្តសៀមរាប ដើម្បីផ្តល់ជូនបងប្អូនប្រជាពលរដ្ឋ ដែលកំពុងជួបការខ្វះខាតផ្នែកជីវភាពប្រចាំថ្ងៃ ក្នុងវិបត្តកូវីដ-១៩ ។
នាថ្ងៃទី២៦ ខែកញ្ញា ឆ្នាំ២០២១ នៅសាលាខេត្តសៀមរាប ក្រោមវត្តមានលោក សុខ ថុល នាយករដ្ឋបាលសាលាខេត្ត តំណាងដ៏ខ្ពង់ខ្ពស់ឯកឧត្តម ទៀ សីហា អភិបាល នៃគណ:អភិបាលខេត្តសៀមរាប បានទទួលអំណោយពីក្រុមហ៊ុន ចៅ សាំងហុក រួមមានជា: អង្ករ ៥០០គ.ក្រ និងត្រីខ ៥កេស ដើម្បីផ្តល់ជូនបងប្អូនប្រជាពលរដ្ឋ ដែលកំពុងជួបការខ្វះខាតផ្នែកជីវភាពប្រចាំថ្ងៃ ដែលជារងគ្រោះដោយសារវិបត្តកូវីដ-១៩ ជាពិសេសផ្គត់ផ្គង់ ក្នុងតំបន់ក្រហម នៃក្រុងសៀមរាប។
លោក សុខ ថុល នាយករដ្ឋបាលសាលាខេត្ត បានមានប្រសាសន៍ថា ការផ្តល់ជាអំណោយទាំងនេះ គឺជាវប្បធម៌ចែករំលែកដល់បងប្អូនប្រជាពលរដ្ឋ ដែលកំពុងជួបការខ្វះខាតដោយសារវិបត្តិជំងឺកូវីដ-១៩ ក៏ដូចជាការចូលរួមចំណែកជាមួយរាជរដ្ឋាភិបាល និងរដ្ឋបាលខេត្តសៀមរាប ដើម្បីរដ្ឋបាលខេត្តមានលទ្ធភាព ក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងឆ្លងក្នុងសហគមន៍នាពេលបច្ចុប្បន្ន។ អំណោយទាំងនេះរដ្ឋបាលខេត្តនឹងធ្វើការបែងចែកដល់ប្រជាពលរដ្ឋ ដែលកំពុងមានការខ្វះខាតជាក់ស្ដែង នៅតាមបណ្តាក្រុង ស្រុកដែលជាតំបន់ក្រហម។
ទន្ទឹមនឹងនេះ រដ្ឋបាលខេត្ត ក៏សូមការយោគយល់ និងសូមបងប្អូនប្រជាពលរដ្ឋធ្វើការអត់ធ្មត់ និងចូលរួមទាំងអស់គ្នាក្នុងការប្រយុទ្ធប្រឆាំងនឹងជំងឺកូវីដ-១៩ ក្នុងដំណាក់កាលដ៏លំបាកនេះមែន ប៉ុន្តែ សហគមន៍យើងនឹងមានសេចក្តីសុខសុវត្ថិភាពនាពេលខាងមុខឆាប់ៗនេះ។ បន្ទាប់ពីយើងឆ្លងផុតគ្រាលំបាកនេះ យើងនឹងអាចដំណើរការអាជីវកម្មរបស់យើង ដើម្បីឱ្យសេដ្ឋកិច្ចគ្រួសារ ព្រមទាំងសេដ្ឋកិច្ចជាតិឱ្យកាន់តែប្រសើរឡើងវិញ។
លោកសុខថុល បន្តថា រដ្ឋបាលខេត្តសង្ឃឹមយ៉ាងមុតមាំថា បងប្អូននឹងចូលរួមសហការជាមួយនឹងក្រសួងសុខាភិបាល និងអាជ្ញាធរមានសមត្ថកិច្ចពាក់ព័ន្ធ ដើម្បីរួមចំណែកក្នុងការប្រយុទ្ធប្រឆាំង ទប់ស្កាត់ និងកាត់ផ្តាច់ខ្សែចម្លងជំងឺកូវីដ-១៩ ចេញពីសហគមន៍យើង ពិសេសត្រូវចូលរួមអនុវត្តវិធានការរបស់រាជរដ្ឋាភិបាល ៣ការពារ និង៣កុំ ឱ្យបានខ្ជាប់ខ្ជួន៕
ប្រភព: រដ្ឋបាលខេត្តសៀមរាប
កែសម្រួលដោយ លីវ សុខុន!!!
