នៅព្រឹកថ្ងៃទី ៣០ កញ្ញានេះ ឯកឧត្តមនាយឧត្តមសេនីយ៍ ឃឹម ប៊ុនសុង រដ្ឋលេខាធិការក្រសួងការពារជាតិ និង ជាអនុប្រធានក្រុមការងាររាជរដ្ឋាភិបាល ចុះជួយមូលដ្ឋានក្រុងសៀមរាប បាននាំយកអង្ករចំនួន ៥តោន ប្រគល់ជូនដល់រដ្ឋបាលក្រុង សម្រាប់ចែកជូនបន្តដល់បងប្អូនប្រជាពលរដ្ឋក្នុងក្រុង ដែលកំពុងខ្វះខាតជីវភាពប្រចាំថ្ងៃ ។
មានប្រសាសន៍ក្នុងឱកាសនោះ លោក នួន ពុទ្ធារ៉ា អភិបាលក្រុងសៀមរាប បានថ្លែងនូវអំណរគុណចំពោះក្រុមការងាររាជរដ្ឋាភិបាលចុះជួយមូលដ្ឋានក្រុងសៀមរាប ពិសេសឯកឧត្តមនាយឧត្តមសេនីយ៍ ឃឹម ប៊ុនសុង និង ក្រុមគ្រួសារ ដែលបានផ្តល់ជូននូវអង្ករ ចំនួន៥តោន សម្រាប់ប្រើប្រាស់ដល់យុទ្ធនាការណ៏ប្រយុទ្ធប្រឆាំងបង្ការ ទប់ស្កាត់ជំងឺកូវីដ-១៩ ដែលក្រុងសៀមរាបកំពុងតែជួបប្រទះនាពេលនេះ ពិសេស គឺសម្រាប់យកទៅផ្តល់ជូនប្រជាពលរដ្ឋដែលកំពុងជួបការខ្វះខាតស្បៀងអាហារ ហើយចំពោះអំណោយអង្ករចំនួន៥តោននេះ រដ្ឋបាលក្រុង នឹងធ្វើការបែងចែកជូនទៅអាជ្ញាធរសង្កាត់ដើម្បីចែកជូនដល់បងប្អូននៅក្នុងមូលដ្ឋានខ្លួន ។
មានប្រសាសន៍ក្នុងឱកាសនោះដែរ ឯកឧត្តមនាយឧត្តមសេនីយ៍ ឃឹម ប៊ុនសុង បានពាំនាំនូវការផ្តាំផ្ញើពីសំណាក់ប្រមុខរាជរដ្ឋាភិបាល និង សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និង ជាប្រធានក្រុមការងាររាជរដ្ឋាភិបាលចុះជួយមូលដ្ឋានខេត្តសៀមរាប អំពីសុខទុក្ខលំបាករបស់ប្រជាពលរដ្ឋដែលបាននឹងកំពុងជួបការខ្វះខាតនូវស្បៀងអាហារទៀតផង ដូច្នេះ ដោយមើលឃើញភាពចាំបាច់បំផុតក្នុងការដោះស្រាយនូវទុក្ខលំបាករបស់រដ្ឋបាលក្រុងសៀមរាប ឯកឧត្តម និង ក្រុមគ្រួសារ រួមទាំងក្រុមការងាររាជរដ្ឋាភិបាលចុះជួយក្រុង បាននាំយកនូវស្បៀង ដើមី្បចូលរួមទ្រទ្រង់ជីវភាពរបស់បងប្អូន ប្រជាពលរដ្ឋ កំពុងជួបនូវការលំបាកនេះ ។
ជាមួយគ្នានេះដែរ ឯកឧត្តមនាយឧត្តមសេនីយ៍ ឃឹម ប៊ុនសុង បានអំពាវនាវដល់បងប្អូនប្រជាពលរដ្ឋទាំងអស់ សូមចូលរួមទាំងអស់គ្នា និង រួមគ្នាទប់ស្កាត់ការឆ្លងរាលដាលជំងឺកូវីដ-១៩ នៅក្នុងសហមន៍របស់យើង ជាពិសេសត្រូវអនុវត្តឲ្យបានជាប់ជាប្រចាំតាមសេចក្តីណែនាំរបស់រដ្ឋបាលខេត្ត , វិធានការនានារបស់ក្រសួងសុខាភិបាល និង វិធានការរបស់រាជរដ្ឋាភិបាល ៣កុំ និង ៣ការពារ ឲ្យបានខ្ជាប់ខ្ជួន ដើម្បីកាត់ផ្តាច់ការចម្លងមេរោគដ៏កាចសាហាវនេះ ៕
អត្ថបទ និងរូបភាព ៖ លោក ម៉ី សុខារិទ្ធ
កែសម្រួលអត្ថបទ ៖ លោក លីវ សាន្ត
