អាជ្ញាធរខេត្ដសៀមរាប នៅថ្ងៃទី៣០ ខែកញ្ញា ឆ្នាំ២០២១នេះ បានសម្រេចបិទបញ្ចប់ការកំណត់ជា តំបន់ក្រហម និងតំបន់លឿងទុំ ព្រមទាំងប៉ុស្ដិ៍ពិនិត្យសុខភាពបឋមនៅតាមព្រំប្រទល់ខេត្ដ ក្នុងគោលបំណង ដើម្បីឱ្យប្រជាពលរដ្ឋធ្វើដំណើរ ប្រកបរបររកស៊ីចិញ្ចឹមជីវិត និងដើម្បីលើកស្ទួយជីវភាពគ្រួសារ ជាពិសេសជួយសម្រួលដល់ទុកលំបាកប្រជាពលរដ្ឋ ប៉ុន្ដែក្នុងនោះវិធានការនានា រដ្ឋបាលខេត្ដក៏នៅបន្តអនុវត្តដដែល។
បើតាមលោក សុខ ថុល នាយករដ្ឋបាលខេត្ដសៀមរាប បានឲ្យដឹងថា ការសម្រេចបិទបញ្ចប់កំណត់ជា តំបន់ក្រហម និងលឿងទុំ នៅក្នុងភូមិសាស្ដ្រខេត្ដនេះ ធ្វើឡើងតាមប្រសាសន៍ណែនាំដ៏ខ្ពង់ខ្ពស់របស់សម្តេចតេជោនាយករដ្ឋមន្ត្រី ដែលសម្ដេចបានយល់ច្បាស់ពីទុក្ខលំបាករបស់បងប្អូនប្រជាពលរដ្ឋ ក្នុងតំបន់បិទខ្ទប់ ដោយសម្ដេចបានសម្រេចរំសាយរាល់ការកំណត់ជា តំបន់ក្រហម តំបន់លឿងទុំ នៅទូទាំងប្រទេស ដើម្បីទុកលទ្ធភាពអោយបងប្អូនប្រជាពលរដ្ឋ អាចចេញមករកស៊ីទទួលទានឡើងវិញ។ ជាមួយគ្នានោះសម្រាប់ខេត្តសៀមរាប ប៉ុស្ដិ៍ត្រួតពិនិត្យសុខភាពបឋម នៅតាមព្រំប្រទល់ខេត្ដចំនួនបីរួមមាន៖ ព្រំប្រទល់ខេត្ដសៀមរាប-កំពុងធំ, ព្រំប្រទល់ខេត្ដសៀមរាប-បន្ទាយមានជ័យ និងព្រំប្រទល់ខេត្ដសៀមរាប-ឧត្ដរមានជ័យ ក៍ត្រូវបានដកចេញឡើងវិញដែរ ដើម្បីជួយសម្រួលដល់ការធ្វើចរាចរណ៍ចេញចូលរបស់អ្នកទេសចរណ៍ ក៏ដូចជាប្រជាពលរដ្ឋទូទៅផងដែរ។
លោក សុខ ថុល បានឲ្យដឹងទៀតថា ក្នុងនោះចំពោះបំរាមគោចរ ឬវិធានការរដ្ឋបាលខេត្ដ ដែលបានបិទការធ្វើចរាចរណ៍នៅពេលយប់ ចាប់ពីម៉ោង០៩យប់ ដល់ម៉ោង០៣ទៀបភ្លឺ គឺអាជ្ញាធរនៅបន្ដដដែល។ ជាមួយគ្នានោះចំពោះផ្សាររដ្ឋ និងផ្សារឯកជនទូទាំងខេត្ត អាជ្ញាធរនឹងបើកឱ្យដំណើរការឡើងវិញផងដែរ ប៉ុន្ដែត្រូវពិនិត្យ និងរៀបចំឱ្យបានល្អជាមុនសិន ដោយមានការរៀបចំឲ្យមានការលក់ដូររក្សាគម្លាតពីគ្នាជាដើម។ ក្នុងនោះអាជ្ញាធរខេត្តក៍នៅតែបន្ដធ្វើការណែនាំដល់ប្រជាពលរដ្ឋ ត្រូវបន្តអនុវត្តឲ្យបានចាប្រចាំនូវវិធានការ “៣ការពារ ៣កុំ” របស់ប្រមុខរាជរដ្ឋាភិបាលកម្ពុជា និងសេចក្ដីណែនាំផ្សេងរបស់ក្រសួងសុខាភិបាល។
សូមជម្រាបថា បើតាម ឯកឧត្ដម ទៀ សីហា អភិបាលខេត្តសៀមរាប មានប្រសាសន៍ថា បច្ចុប្បន្នរដ្ឋបាលខេត្ត ក៏ដូចជាមន្ទីរសុខាភិបាល បានបន្តបើកមណ្ឌលព្យាបាល មណ្ឌលចត្តាឡីស័កជាបន្តបន្ទាប់ និងសូមអំពាវនាវដល់បងប្អូនប្រជាពលរដ្ឋ នៅពេលដែលមានអាការសង្ស័យ សូមឆាប់ទៅយកសំណាក និងព្យាបាលបានតាមការស្ម័គ្រចិត្ត ជៀសវាងទៅចម្លងដល់អ្នកដ៏ទៃទៀត។ ជាមួយនោះ ឯកឧត្ដមអភិបាលខេត្ត ក៍បាបស្នើដល់ប្រជាពលរដ្ឋទាំងអស់ ត្រូវតែចេះ “រៀនរស់តាមបែបគន្លងថ្មី” ត្រូវកែហេដ្ឋារចនាសម្ព័ន្ធ និងបំពាក់ឧបករណ៍ សម្ភារ ដែលអាចរក្សាគម្លាតបាន ចំពោះទីតាំងទាំងអស់ក្នុងខេត្តសៀមរាប ដូចជា៖ វត្តអារាម,ផ្សាររដ្ឋឯកជនតូចធំ, រមណីយដ្ឋាន ភោជនីយដ្ឋាន, សហគមន៍ទេសចរ, តំបន់ទេសចរក្នុងប្រាសាទ និងក្រៅប្រាសាទ, សាលារៀនរដ្ឋ និងទីប្រជុំជនមួយចំនួន។ល។ ហើយសង្ឃឹម និងជឿជាក់ថា ប្រជាពលរដ្ឋខ្មែរគ្រប់រូបអាចធ្វើបាន និងចូលរួមទាំងអស់គ្នាឱ្យបានជោគជ័យ នាពេលខ្លីខាងមុខនេះ៕
អត្ថបទ៖ លោក ឈិត សាវី
រូបភាព៖ លោក ជា ស្រស់ ,ងិន គីមឡេង
