ឯកឧត្តម ទៀ សីហា អភិបាលខេត្តសៀមរាប មានប្រសាសន៍ថា ការរំសាយមិនឲ្យមានតំបន់ក្រហម និងតំបន់លឿងទុំ គឺជាអានុសាសន៍ដ៏មានតម្លៃ នៃសម្តេចតេជោប្រមុខនៃរាជរដ្ឋាភិបាល ដើម្បីផ្តល់ឱកាសសម្រាប់ប្រជាពលរដ្ឋ អាចប្រកបមុខរបរ ទ្រទ្រង់ជីវភាពរស់នៅប្រចាំថ្ងៃ ក៏ប៉ុន្តែមិនមែនមានន័យថា យើងបានបញ្ចប់ស្ថានភាពរាតត្បាតនៃជំងឺកូវីដ-១៩នោះឡើយ ហើយវិធានការទប់ស្កាត់ចាំបាច់នានា រួមទាំងវិធានការរដ្ឋបាល និងវិធានការច្បាប់ផងដែរ នឹងត្រូវអនុវត្តបន្តទៀត យ៉ាងណាក៏ដោយ ក្រោយពីការបញ្ចប់ការដាក់ជាតំបន់ក្រហម និងលឿងទុំនេះ វិធានការ៣កុំ ៣ការពារ វិធានការសុខាភិបាល ត្រូវបន្តអនុវត្តឲ្យបានខ្ជាប់ខ្ជួន ហើយអ្វីដែលត្រូវតែជាទម្លាប់ក្នុងគន្លងនៃការរស់នៅថ្មី គឺការពាក់ម៉ាស មិនអាចធ្វេសប្រហែលបាននោះឡើយ។
ឯកឧត្តម អភិបាលខេត្តសៀមរាប លើកឡើងយ៉ាងដូច្នេះ នាព្រឹកថ្ងៃទី០១ ខែតុលា ឆ្នាំ២០២១ ក្នុងឱកាសនៃការប្រគល់យានយន្តជូនម្ចាស់ដើមវិញ បន្ទាប់ពីត្រូវបានកម្លាំងសមត្ថកិច្ចចម្រុះឃាត់ទុក ដោយសារតែម្ចាស់យានយន្តទាំងនោះ បានប្រព្រឹត្តិល្មើសនឹងបំរាម ហាមការធ្វើដំណើរក្នុងពេលដែលក្រុងសៀមរាបត្រូវបិទខ្ទប់ ដាក់ជាតំបន់ក្រហម និងជាតំបន់លឿង រយៈពេល២សប្តាហ៍កន្លងទៅ ដែលយានយន្តទាំងនោះរួមមាន ៖ ម៉ូតូចំនួន១៦៦គ្រឿង , រថយន្តចំនួន៤គ្រឿង និងម៉ូតូសណ្តោងរ៉ឺម៉កចំនួន២គ្រឿង។
ឯកឧត្តម ទៀ សីហា មានប្រសាសន៍ទៀតថា ការប្រគល់ជូន នូវយានយន្តដល់ម្ចាស់ដើមវិញដែលបានប្រព្រឹត្តល្មើសបំរាមបិទខ្ទប់កន្លងមក គឺជាការយោគយល់ មិនមានការបង់ប្រាក់ផាកពិន័យនោះឡើយ ដោយសារតែរដ្ឋបាលខេត្តយល់ឃើញថា ក្នុងរយៈពេលបិទខ្ទប់កន្លងមកនេះ មានផលប៉ះពាល់យ៉ាងខ្លាំងដល់ជីវភាពរស់នៅរបស់ប្រជាជន តែមិនមែនមានន័យ វិធានការរដ្ឋបាលត្រូវបានលើកលែងនោះទេ ក៏ប៉ុន្តែ ក៏ត្រូវអនុវត្តបន្តទៀតផងដែរ ក្នុងស្ថានភាពដែលកូវីដ-១៩ នៅតែបន្តរាតត្បាតក្នុងសហគមន៍។
ឯកឧត្តម អភិបាលខេត្តសៀមរាប មានប្រសាសន៍បន្ថែមថា ក្នុងករណីបុគ្គលណា ឬម្ចាស់ ឬអ្នកគ្រប់គ្រងក្រុមហ៊ុន សហគ្រាស ដេប៉ូចែកចាយ សណ្ឋាគារ ផ្ទះសំណាក់ ភោជនីយដ្ឋាន រមណីយដ្ឋានទេសចរណ៍ អាហារដ្ឋាន ផ្សាររដ្ឋ-ឯកជន ផ្សារទំនើប ផ្សារម៉ាត ហាងលក់ភេសជ្ជៈ តូបអាហារ ហាងកាហ្វេ អាជីវកម្មដ្ឋាន សេវាកម្មដ្ឋាន និងកន្លែង លក់ទំនិញគ្រប់ប្រភេទ បងប្អូនអាជីវករ ប្រជាពលរដ្ឋ និងសាធារណជន ដែលប្រព្រឹត្តល្មើស និងមិនអនុវត្តតាមការណែនាំរបស់រដ្ឋបាលខេត្ត អាជ្ញាធរមានសមត្ថកិច្ចនឹងចាត់វិធានការពិន័យអន្តរការណ៍ និងកសាងសំណុំរឿងបញ្ជូនទៅស្ថាប័នតុលាការ ដើម្បីផ្តន្ទាទោស ស្របតាមមាត្រា១០ និង មាត្រា១១ នៃច្បាប់ស្តីពីវិធានការទប់ស្កាត់ការឆ្លងរាលដាលនៃជំងឺកូវីដ-១៩ ជំងឺឆ្លងកាចសាហាវប្រកបដោយគ្រោះថ្នាក់ធ្ងន់ធ្ងរផ្សេងទៀត និងស្របតាមលិខិតបទដ្ឋានគតិយុត្តពាក់ព័ន្ធ ជាធរមាន៕
អត្ថបទ និងរូបភាព ៖ លោក ងិន គឹមឡេង
កែសម្រួលអត្ថបទ ៖ លោក លីវ សាន្ត
