នៅព្រឹកថ្ងៃ៣០ ខែកញ្ញ ឆ្នាំ២០២១ ម្ចាស់ផ្សារទំនើប ចៅ សាំងហុក ក្នុងក្រុងសៀមរាបយកអំណោយជាគ្រឿងបរិភោគរួមមាន៖ អង្ករចំនួន ៥០០គីឡូក្រាម និងត្រីខចំនួន ៥០យួ ប្រគល់ជូនសាខាកាកបាទក្រហមកម្ពុជាខេត្តសៀមរាប ក្រោមវត្តមានលោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប នៅទីស្នាក់ការសាខា ។
ក្នុងឱកាសនោះ តំណាងម្ចាស់ផ្សារទំនើប ចៅ សាំងហុក បានឱ្យដឹងថា អំណោយ ដែលប្រគល់ជូនសាខាកាកបាទក្រហមកម្ពុជា ខេត្តសៀមរាប នាពេលនេះ គឺជាទឹកចិត្តសប្បុរសរបស់យើងខ្ញុំ ក្នុងការរួមចំណែកជាមួយសកម្មភាពមនុស្សធម៌របស់កាកបាទក្រហមកម្ពុជា ការបរិច្ចាគនេះគឺដោយសទ្ធាជ្រះថ្លា ក្នុងការចែករំលែក ការជួយគ្នា ទោះតិចក្ដីច្រើនក្ដី តែជាទឹកចិត្តជួយគ្នាក្នុងគ្រាក្រ គ្រាលំបាក។
មានប្រសាសន៍ក្នុងឱកាសនោះ លោក ស៊ុ សំអន បានថ្លែងអំណរគុណយ៉ាងជ្រាលជ្រៅចំពោះទឹកចិត្តដ៏សប្បុរសធម៌របស់លោក លោកស្រី ជាម្ចាស់ផ្សារទំនើប ចៅ សាំងហុក ដែលបានយកចិត្តទុកដាក់ចូលរួមចំណែកក្នុងសកម្មភាពមនុស្សធម៌ គឺសបញ្ជាក់ពីទឹកចិត្តដ៏ប្បុរសធម៌ចំពោះបងប្អូនប្រជាពលរដ្ឋរងគ្រោះ និងងាយរងគ្រោះបំផុតនៅក្នុងសហគមន៍ ក្នុងបរិបទជំងឺកូវីដ-១៩ ដែលខេត្តយើងកំពុងរីករាលដាលខ្លាំង ពិសេសក្នុងក្រុងសៀមរាប រហូតដល់មានការបិទខ្ទប់ភូមិសាសន៍ក្រុងផងដែរ ដែលសកម្មភាពនេះគឺជាទឹកចិត្តសប្បុរស ក្នុងការរួមចំណែកជាមួយសកម្មភាពមនុស្សធម៌ របស់កាកបាទក្រហមកម្ពុជា ក្នុងការចែករំលែក ការជួយគ្នា ក្នុងគ្រាលំបាក។
លោក ស៊ុ សំអន មានប្រសាសន៍ទៀតថា ក្នុងកាយវិកាដ៏មនុស្សធម៌នេះ គឺជាការចូលរួមរបស់សប្បុរសជនជាមួយសកម្មភាពមនុស្សធម៌របស់កាកបាទក្រហមកម្ពុជា ដែលមានសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធានហើយសាខាកាកបាទក្រហមកម្ពុជាខេត្តសៀមរាប នឹងប្រើប្រាស់នូវអំណោយទាំងនេះ ឱ្យចំគោលដៅមនុស្សធម៌ ដោយមិនប្រកាន់ ពូជសាសន៍ ពណ៌សម្បុរ និងនិន្នាការនយោបាយណាមួយឡើយ ស្របតាមគោលការណ៍គ្រឹះទាំង៧ប្រការរបស់ចលនាអន្តរជាតិកាកបាទក្រហម អឌ្ឍចន្ទក្រហម ៕
អត្ថបទ និងរូបភាព ៖ លោក ខេង ឧត្ដម
កែសម្រួលអត្ថបទ ៖ លោក លីវ សាន្ត
