បើតាមលោកវរសេនីយ៍ឯក ជី បេងជន អធិការនគរបាលស្រុកក្រឡាញ់ បានឲ្យដឹងថា កាលពីវេលាម៉ោង ០៩ និង៣០នាទី ថ្ងៃទី១៧ ខែតុលា ឆ្នាំ២០២១ម្សិលមិញនេះ មានករណីអគ្គិភ័យឆេះផ្ទះមួយបានកើតឡើង នៅភូមិដំណាក់ខ្ចាស់ ឃុំសំបួរ ស្រុកក្រឡាញ់ ខេត្តសៀមរាប ដែលផ្ទះនេះជាប្រភេទផ្ទះឈើលើ ប្រក់ស័ង្កសី មានទំហំទំហំ ៨ គុណ ៩ម៉េត្រ ជារបស់ឈ្មោះ រឿ សូត្រ ភេទប្រុស អាយុ៤២ឆ្នាំ និងប្រពន្ធឈ្មោះ ហួម ចន្ត្រា អាយុ៤២ឆ្នាំ។
លោកវរសេនីយ៍ឯក ជី បេងជន បានឲ្យដឹងទៀតថា ក្នុងករណីអគ្គីភ័យនេះ បានបណ្ដាលឲ្យផ្ទះ១ខ្នងត្រូវបានឆេះអស់ទាំងស្រុក និងឆេះទ្រព្យសម្បត្តិមានតម្លៃមួយចំនួនទៀតមាន៖ ឆេះលុយអស់ជាង ៤លានរៀល, អង្ករ ២ការ៉ុង, ម៉ាស៊ីនកាណូត ១គ្រឿង, ម៉ាស៊ីនកិនស្រូវ ១គ្រឿង, ម៉ាស៊ីនកិនម្សៅ ១គ្រឿង, អីវ៉ាន់ចាប់ហួយឆេះអស់ទាំងអស់ រួមនឹងសម្ភារៈប្រើប្រាស់ និងេកសារគ្រួសារមួយចំនួនទៀតត្រូវបានឆេះអស់ទាំងស្រុង តែពុំបានប៉ះពាល់ដល់មនុស្សឡើយ។
លោកវរៈសេនីយ៍ឯក បានឲ្យដឹងទៀតថា មូលហេតុដែលនាំឲ្យអគ្គិភ័យនេះ គឺបណ្ដាលមកពីទុសេខ្សែភ្លើង។ ក្នុងករណីអគ្គិភ័យនេះ កម្លាំងសមត្ថកិច្ច បានចេញអន្តរាគមន៍ដោយប្រើប្រាស់រថយន្តពន្លត់អគ្គិភ័យចំនួន ១គ្រឿងតែប៉ុណ្ណោះ ដោយសារតែផ្លូវមានសភាពតូចចង្អៀត ប៉ុន្តែដោយមានការចូលរួមពីកម្លាំងនគរបាល កម្លាំងប្រជាការពារ និងប្រជាពលរដ្ឋនៅក្នុងតំបន់នោះ ទើបអាចគ្រប់គ្រង់ស្ថានភាពអគ្គិភ័យខាងលើនេះបាន៕
អត្ថបទ និង រូបភាព៖ លោគ ខេង ឧត្តម
