នារសៀលថ្ងៃទី១៨ ខែតុលា ឆ្នាំ២០២១នេះ ក្រុងសម្ព័ន្ធមេត្រី លីសួយ ដឹកនាំដោយលោក WU XIAODONG អភិបាលក្រុងលីសួយ នៃសាធារណរដ្ឋប្រជាមានិតចិន អមដំណើរដោយលោក Liu Zhijie ប្រធានការិយាល័យកុងស៊ុលចិន ប្រចាំខេត្តសៀមរាប បាននាំយកអំណោយជាថ្នាំព្យាបាលកូវីដ-១៩ ចំនួន ១០កេស និងឧបករណ៍ធ្វើតេស្តរហ័សចំនួន ១,៨០០តេស្ត ប្រគល់ជូនរដ្ឋបាលខេត្តសៀមរាប ព្រមទាំងបានជួបសម្តែងការគួរសមជាមួយលោក ពិន ប្រាកដ អភិបាលរងខេត្ត តំណាងឯកឧត្តម ទៀ សីហា អភិបាល នៃគណ:អភិបាលខេត្ត នៅសាលាខេត្តសៀមរាប ។
លោក WU XIAODONG អភិបាលក្រុងលីសួយ ក៏បានលើកឡើងថា ដោយស្ថានភាពនៅលើពិភពលោកកំពុងជួបនូវវិបត្តិជម្ងឺកូវិដ-១៩ ក្នុងនាមក្រុងសម្ព័ន្ធមេត្រី លីសួយ មានជួយឈឺឆ្អាល និងបន្តការគាំទ្រឥតងាករេ ក្នុងសកម្មភាពប្រយុទ្ធប្រឆាំងនឹងជំងឺដ៏កាចសាហាវនេះ។ ក្រុងសម្ព័ន្ធមេត្រី លីសួយ នៃសាធារណរដ្ឋប្រជាមានិតចិន និងខេត្តសៀមរាប នៃព្រះរាជាណាចក្រកម្ពុជា មានកិច្ចទំនាក់ទនងយ៉ាងល្អប្រសើរ។ ប៉ុន្តែមិនបានធ្វើការផ្លាស់ប្តូរប្រតិភូ ក្នុងការសិក្សាស្វែងយល់អំពីការងារពាណិជ្ជកម្ម កសិកម្មដោយផ្ទាល់ទេ គឺបានត្រឹមតែតាមរយ:អនឡាញតែប៉ុណ្ណោះ ។ លោកបាន បន្តទៀតថា ដើមី្បចូលរួមជាមួយរាជរដ្ឋាភិបាលកម្ពុជា ក្នុងនាមខេត្តសម្ព័ន្ធមេត្រីភាព សូមនាំយកនូវឱសថសម្រាប់ ព្យាបាលជម្ងឺកូវីដ-១៩ និងឧបករណ៍ធ្វើតេស្តរហ័ស ជូនដល់រដ្ឋបាលខេត្តសៀមរាប ក្នុងការចូលរួមប្រយុទ្ធប្រឆាំងទប់ស្កាត់ និងកាត់ផ្តាច់ខ្សែចម្លងវីរ៉ុសកូវីដ-១៩ កុំឲ្យមានឆ្លងរាលដាលចូលសហគមន៍ ។
ក្នុងជំនួបពិភាក្សានោះក្នុងនាមឯកឧត្តម ទៀ សីហា អភិបាលខេត្ត លោក ពិន ប្រាកដ បានថ្លែងអំណរគុណ យ៉ាងជ្រាលជ្រៅ ចំពោះសាធារណរដ្ឋប្រជាមានិតចិន ជាពិសេសដល់រដ្ឋបាល ក្រុង និងប្រជាជនទីក្រុងលីសួយ ដែលតែងតែគាំទ្រដល់ខេត្តសៀមរាប។ ក្នុងនោះដែរ លោកក៏បានលើកឡើង អំពីស្ថានភាព នៃការឆ្លងជម្ងឺកូវីដ-១៩ នៅខេត្តសៀមរាបថា នៅមិនទាន់បានធូរស្រាលនៅឡើយទេ ដោយពីមួយថ្ងៃទៅមួយថ្ងៃ គឺស្ថិតក្នុងស្ថានភាពគួរឲ្យព្រួយបារម្ភ ។ ដោយករណីឆ្លងនេះហើយ នាពេលកន្លងមក រដ្ឋបាលខេត្តសៀមរាប ក៏បានធ្វើការបិទខ្ទប់ ឃុំ សង្កាត់ ភូមិមួយចំនួន ដោយកំណត់ជាតំបន់ក្រហម ក្នុងការទប់ស្កាត់ និងកាត់ផ្តាច់ខ្សែចម្លងនៃជម្ងឺកូវីដ-១៩ ។ ក្នុងនាមរដ្ឋបាលខេត្តសៀមរាប សូមថ្លែងអំណរគុណដល់អាជ្ញាធរ និងប្រជាជនទីក្រុងលីសួយ ដែលបានបរិច្ចាកនូវឧបករណ៍ធ្វើតេស្តអង់ទីហ្សែនកូវីដ-១៩ យ៉ាងរហ័ស និងឱសថសម្រាប់ព្យាបាលកូវីដ-១៩ ដល់រដ្ឋបាលខេត្តសៀមរាប ដើម្បីទប់ស្កាត់ការរីករាលដាលនៃជម្ងឺកូវីដ-១៩ នៅខេត្តសៀមរាប ។
ព័ត៌មានជាតិ ថ្មីៗ
លោកអភិបាលរងខេត្តសង្ឃឹមថា នឹងបង្កើនទំនាក់ទំនងរវាងខេត្តសៀមរាប និងទីក្រុងលីសួយឱ្យកាន់តែរឹងមាំ ឋិតស្ថេរថែមទៀត ក្នុងកិច្ចសហប្រតិបត្តិការប្រកបដោយប្រសិទ្ធភាព និងកក់ក្តៅបំផុត។ ម៉្យាងទៀត ក្រោមការយកចិត្តទុកដាក់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រី បានដាក់ចេញនូវវិធានការ ៣កុំ ៣ការពារ និងធ្វើការផ្សព្វផ្សាយដល់ប្រជាពលរដ្ឋឲ្យសម្របខ្លួន រស់នៅទៅតាម គន្លងបែបថ្មី នៃកូវីដ-១៩ ។ លោកអភិបាលរងខេត្ត ក៏បានបញ្ជាក់ថា សម្ភារ: ឧបករណ៍ធ្វើតេស្ត និងឱសថព្យាបាលទាំងនេះ និងធ្វើការបែងចែកផ្តល់ជូនដល់តាមមណ្ឌលចត្តាឡីស័ក តាមក្រុង ស្រុក យកទៅប្រើប្រាស់ឱ្យបានសមស្រប និងចំគោលដៅ៕
អត្ថបទ និងរូបភាព: លោកម៉ី សុខារិទ្ធ កែសម្រួលដោយ លីវ សុខុន!!!
