នៅព្រឹកថ្ងៃទី ១៨ ខែតុលា ឆ្នាំ២០២១នេះ លោកស្រី ទ្រី ដាណា សប្បុរសជនមកពីរាជធានីភ្នំពេញ បាននាំយកអំណោយជាអង្ករចំនួន ៥តោន , ត្រីខចំនួន ៣០កេស , មី ចំនួន៥០ កេស និង ទឹកសុទ្ធចំនួន ១០០កេស ប្រគល់ជូនរដ្ឋបាលខេត្តសៀមរាប សម្រាប់ជួយសម្រាលដល់ជីវភាពរស់នៅប្រចាំថ្ងៃប្រជាពលរដ្ឋក្រីក្រ ក្នុងខេត្តទេសចរណ៍មួយនេះ ក្នុងគ្រាដែលពួកគាត់រងផលប៉ះពាល់ដោយសារវិបត្តិជំងឺកូវីដ-១៩ ក្រោមវត្តមានលោក ពិន ប្រាកដ អភិបាលរងខេត្ត តំណាងដ៏ខ្ពង់ខ្ពស់ឯកឧត្ដម ទៀ សីហា អភិបាលនៃគណៈអភិបាលខេត្ត ។
លោកស្រី ទ្រី ដាណា បានមានប្រសាសន៍ថា លោកស្រីមានចិត្តរំភើបនិងរីករាយក្រៃ លែង ដែលបានចូលរួមជាមួយរាជរដ្ឋាភិបាលកម្ពុជា ក៏ជារដ្ឋបាលខេត្តសៀមរាប នៅក្នុងជួយដល់ពលរដ្ឋដែលងាយរងគ្រោះ ដែលពួកគាត់បានទទួលរងនូវផលប៉ះពាល់ពីការរាតត្បាតនៃជំងឺកូវីដ-១៩ ហើយលោកស្រីរំពឹងថា ជំនួយបន្តិចបន្តួចទាំងនេះ នឹងជួយសម្រាលការលំបាករបស់រដ្ឋបាលខេត្តសៀមរាបបានខ្លះៗ នៅក្នុងសកម្មភាពមនុស្សធម៌ ក៏ដូចជាការសកម្មភាពប្រយុទ្ធប្រឆាំងការរាលដាលជំងឺកូវីដ-១៩ ។
ក្នុងនាមឯកឧត្តម ទៀ សីហា អភិបាលខេត្តសៀមរាប លោក ពិន ប្រាកដ បានថ្លែងនូវការអរគុណចំពោះលោកស្រី ទ្រី ដាណា ដែលបានផ្តល់នូវគ្រឿងបរិភោគទាំងនេះដល់រដ្ឋបាលខេត្តសៀមរាប សម្រាប់ប្រើប្រាស់ក្នុងគ្រាដ៏លំបាកនៃបរិបទកូវីដ-១៩ នេះ ដែលកាយវិការនេះ គឺជាវប្បធម៌នៃការចែករំលែក ក៏ដូចជាការចូលរួមចំណែកជាមួយរាជរដ្ឋាភិបាលនិងរដ្ឋបាលខេត្តក្នុងការប្រយុទ្ធប្រឆាំងនឹងជំងឺកូវីដ-១៩ ដែលកំពុងឆ្លងក្នុងសហគមន៍នាពេលបច្ចុប្បន្ន ហើយអំណោយទាំងនេះរដ្ឋបាលខេត្តនឹងធ្វើការផ្គត់ផ្គង់ដល់ប្រជាពលរដ្ឋដែលមានការខ្វះខាតនៅតាមបណ្តាក្រុង ស្រុក ។
លោក ពិន ប្រាកដ មានប្រសាសន៍ទៀតថារដ្ឋបាលខេត្តសៀមរាប បានយកចិត្តទុកដាក់ និងគិតគូរពីសុខទុក្ខរបស់បងប្អូនប្រជាពលរដ្ឋគ្រប់ទីកន្លែង សំខាន់បញ្ហាសុខមាលភាពសាធារណៈ និង ខិតខំប្រឹងប្រែង ពន្យល់ណែនាំអប់រំជារឿយៗ នូវវិធីសាស្ត្រនិងការណែនាំនានារបស់ក្រសួងសុខាភិបាល ក៏ដូចជាវិធានការផ្សេងៗ របស់រាជរដ្ឋាភិបាលក្នុងការប្រយុទ្ឋ ប្រឆាំងបង្កាទប់ស្កាត់ និង កាត់ផ្តាច់ខ្សែចម្លងនៃជំងឺកូវីដ-១៩ ៕
អត្ថបទ និងរូបភាព៖ លោក ជា ស្រស់
កែសម្រួលអត្ថបទ ៖ លោក លីវ សាន្ត
