កាលថ្ងៃទី១៨ ខែតុលា ឆ្នាំ២០២១ម្សិលមិញនេះ លោក ឃុត សំអាត ប្រធានកិត្តិយសអនុសាខាកាកបាទក្រហមកម្ពុជា ស្រុកក្រឡាញ់ និង លោកស្រី ម៉ននី រង្សី ប្រធានគណៈកម្មាធិការអនុសាខាកាកបាទក្រហមកម្ពុជា ស្រុកក្រឡាញ់ ព្រមទាំងសហការី បានចុះជួបសួសុខទុក្ខ និងនាំយកអំណោយមនុស្សធម៌មួយចំនួន ប្រគល់ជូនគ្រួសារប្រជាពលរដ្ឋឈ្មោះ រឿ សូត្រ ភេទ ប្រុស និងប្រពន្ធឈ្មោះ ឃួម ត្រា ដែលរងគ្រោះដោយសារអគ្គីភ័យបណ្តាលឱ្យឆេះផ្ទះទាំងស្រុង កាលពីព្រឹកថ្ងៃទី១៧ ខែតុលា ឆ្នាំ២០២១កន្លងទៅ ស្ថិតនៅភូមិដំណាក់ខ្ចាស់ ឃុំសំបួរ ស្រុកក្រឡាញ់ ខេត្តសៀមរាប។
មានប្រសាសន៍ក្នុងឱកាសនោះ លោកស្រី ម៉ននី រង្សី បានពាំនាំមតិផ្តាំផ្ញើសួសុខទុក្ខពីសម្តេចកិត្តិព្រឹតបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត និងឯកឧត្តមអ្នកឧកញ៉ា សៀង ណាំ ប្រធានគណៈកិត្តិយស សាខាកាកបាទក្រហមកម្ពុជាខេត្តសៀមរាប ដែលថ្នាក់ដឹកនាំទាំងអស់តែងតែយកចិត្តទុកដាក់គិតគូរចំពោះសុខទុក្ខបងប្អូនប្រជាពលរដ្ឋគ្រប់រូប ដោយមិនប្រកាន់វណ្ណៈ ជំនឿ សាសនា និន្នាការនយោបាយណាមួយឡើយ ដូចដែលលើកឡើងថា កាកបាទក្រហមមានគ្រប់ទីកន្លែង សម្រាប់គ្រប់ៗគ្នា-មិនទុកណាម្នាក់ចោល។ ជាមួយនោះលោកស្រី និងក្រុមការងារ ក៏សូមចូលរួមសោកស្តាយជាខ្លាំង ចំពោះការខូចខាតផ្ទះសំបែង ទ្រព្យសម្បត្តិដែលនេះ ជាគ្រោះមហន្តរាយដោយធម្មជាតិ គ្មាននរណាម្នាក់ចង់ជួបប្រទះឡើយ។
លោកស្រី ម៉ននី រង្សី មានប្រសាសន៍ទៀតថា ចំពោះអំណោយមនុស្សធម៌ដែលដែលបាននាំយកមកប្រគល់ជូននាពេលនេះ ថ្វីត្បិតតែមានចំនួនតិចតួចក្ដី មិនសមល្មមនឹងការខាតបង់របស់បងប្អូន តែក៏អាចជួយសម្រាលទុក្ខបាករបស់បងប្អូនបានមួយកម្រិត ហើយក៏ជាការបង្ហាញនូវការយកចិត្តទុកដាក់ ចំពោះប្រជាពលរដ្ឋគ្រប់រូប ពីសំណាក់ថ្នាក់ដឹកនាំ ពិសេសគឺកាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដូចដែលបានលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល” និង “ទីណាមានទុក្ខលំបាក ទីនោះមានកាកបាទក្រហមកម្ពុជា” ។ ជាមួយគ្នានោះលោកស្រី សូមអំពាវនាវសូមឱ្យបងប្អូនប្រជាពលរដ្ឋទាំងអស់ ត្រូវចូលរួមអនុវត្តឲ្យបានខ្ជាប់ខ្ជួន តាមការណែនាំរបស់រាជរដ្ឋាភិបាល និងក្រសួងសុខាភិបាលនូវវិធាន ៣កុំ ៣ការពារ ឲ្យបានជាប់ជានិច្ច ដើម្បីកាត់ផ្ដាច់ជំងឺកូវីដ-១៩ ផុតពីមូលដ្ឋានភូមិស្រុករបស់យើង ក៏ដូចជាខេត្តសៀមរាប និងប្រទេសកម្ពុជាទាំងមូល។
សូមជ្រាបថា អំណោយមនុស្សធម៌ផ្ដល់ជូនគ្រួសារប្រជាពលរដ្ឋរងគ្រោះ រួមមាន៖ អង្ករ ២៥គីឡូក្រាម, មុង១, ភួយ១, សារុង១, ក្រមា១, ខ្នើយ១, ត្រីខ ១យួរ, មី ១កេស, សាប៊ូ ៤ដុំ, កន្ទេល១, ទឹកបរិសុទ្ធ ៥យួរ, ទឹកត្រី ១យួរ, ទឹកស៊ីអ៊ីវ ១យួរ, ស័ង្កសី១០សន្លឹក, ថវិការ ចំនួន ១.៦៤០.០០០រៀល និង ១០០ដុល្លា ផងដែរ៕
អត្តបទនិងរូបភាព៖សាខាកាកបាទក្រហមកម្ពុជាខេត្តសៀមរាប
