ដោយមើលឃើញពីទុក្ខលំបាក របស់កុមារាក្រីក្រក្នុងស្រុកបន្ទាយស្រីម្នាក់ ឈ្មោះ គង់ សីហា ដែលល្បីល្បាញដោយសារតែការមកសាលា ដើម្បីចូលរៀនថ្ងៃដំបូងរបស់គាត់ គ្មានស្បែកជើងពាក់ និងពាក់កាតចាក់វ៉ាក់សាំងបង្ការជំងឺកូវីដ-១៩ ដោយប្រើថង់ប្លាស្ទិកនោះ ប្រមុខរាជរដ្ឋាភិបាលកម្ពុជា បានសម្រេចផ្តល់ជូននូវថវិកាចំនួន ២០លានរៀល និងផ្ទះមួយខ្នង តាមរយៈឯកឧត្តម ទៀ សីហា អភិបាលខេត្តសៀមរាប នៅថ្ងៃទី០៣ ខែវិច្ឆិកា ឆ្នាំ២០២១នេះ នៅលំនៅដ្ឋានកុមារាខាងលើផ្ទាល់ស្ថិតក្នុងភូមិត្មាតពង ឃុំរុនតាឯក ស្រុកបន្ទាយស្រី។
ឯកឧត្តម ទៀ សីហា អភិបាលខេត្តសៀមរាប បានមានប្រសាសន៍ថា បន្ទាប់ពីឃើញនូវរូបភាពរបស់ក្មួយប្រុស គង់ សីហា ដែលទៅសាលារៀនគ្មានស្បែកជើងពាក់ រីឯប័ណ្ណចាក់វ៉ាក់សាំងបានច្រកចូលក្នុងថង់ប្លាស្ទិក ពាក់ជាប់នឹងក ត្រូវបានបង្ហោះនៅលើបណ្តាញសង្គមរបស់អង្គការមួយ សម្តេចប្រមុខរាជរដ្ឋាភិបាល បានចាត់តាំងឲ្យឯកឧត្តម នាំយកជំនួយថវិកាចំនួន ២០លានរៀន ដែលថវិកានេះ សម្រាប់ដោះស្រាយជីវភាព និងផ្គត់ផ្គង់ការរៀនសូត្ររបស់ក្មួយប្រុស និងក្រុមគ្រួសារ។ ក្រៅពីថវិកា សម្តេចតេជោ ក៏បានចាត់តាំងឲ្យសាងសង់ផ្ទះមួយខ្នងសមរម្យជូនដល់ក្រុមគ្រួសារកុមារា សីហា ផងដែរ។ ឯកឧត្តម ក៏បានជម្រុញឲ្យរដ្ឋបាលស្រុកបន្ទាយស្រី ត្រូវខិតខំធ្វើយ៉ាងណាដើម្បីជួយស្វះស្វែងរកមុខរបរណាសម្រាប់ឪពុកម្តាយ កុមារាគង់ សីហា បានប្រកបចិញ្ចឹមជីវិត និងបានផ្គង់កូនរៀនបន្តទៀត។
ជាមួយនឹងរូបភាពដ៏កម្សត់នេះ សប្បុរសជននានា ក៏បានផ្តល់ជូននូវជំនួយឧបត្ថម្ភជាបន្តបន្ទាប់ដល់ក្រុមគ្រួសារក្មួយប្រុសផងដែរ។ ក្នុងនោះព្រះគ្រូ ហាក់ សៀងហៃ ប្រធានអង្គការពុទ្ធសាសនា ដើម្បីការអប់រំនៃកម្ពុជា បានមានដីកាថា កាលពីនៅវ័យកុមារ ជីវិតព្រះអង្គបានជួបការលំបាកច្រើនទាំងការតស៊ូ និងការគេចពីសង្គ្រាម តែក៏មិនលំបាកដូចកុមារា គង់ សីហា នេះដែរ។ ព្រះអង្គបន្តថា ដោយមើលឃើញពីការលំបាកនេះ សប្បុរសនានា តាមរយៈព្រះអង្គ ក៏បានផ្តល់ជូននូវថវិកា និងសម្ភារៈប្រើប្រាស់មួយចំនួនដល់គ្រួសារកុមារាសីហា សម្រាប់ដោះស្រាយជីវភាព និងអាចបន្តឲ្យរូបគេបានរៀនបន្តទៀត។
សូមជម្រាបដែរថា នៅព្រឹកដដែលនេះ ឯកឧត្តម ជា ច័ន្ទបរិបូរណ៍ រដ្ឋលេខាធិការក្រសួងព័ត៌មាន និងជាសមាជិកក្រុមការងាររាជរដ្ឋាភិបាល ចុះមូលដ្ឋានខេត្តសៀមរាប បានចាត់ក្រុមការងារនាំយកនូវអំណោយជាសម្ភារសិក្សា និងថវិកាមួយចំនួន ប្រគល់ជូន កុមារា គង់ សីហា និងប្រគល់ជូននាយិកាសាលានូវខ្សែដាក់សម្រាប់កាតពាក់ក ១០០សម្រាប់ចែកសិស្ស និងឧបករណ៌តេសកូវិដរហ័ស១ប្រអប់ស្មើនឹង២៥តេស្ត សម្រាប់ប្រើប្រាស់ក្នុងពេលចាំបាច់ដើម្បីរួមគ្នាការពារ និងទប់ស្កាត់ការរីករាលដាលនៃជម្ងឺកូវីដ-១៩ ផងដែរ៕
អត្ថបទ និង រូបភាព៖ លោក ជា ស្រស់ លោក យូ វង្ស
