នៅព្រឹកថ្ងៃទី៤ ខែវិច្ឆិកា ឆ្នាំ២០២១ ឯកឧត្តមបណ្ឌិត សុខ ប្រសិទ្ធិ រដ្ឋលេខាធិការ និងជាប្រធានគណៈកម្មាធិការសម្របសម្រួលពង្រឹង និងពង្រីក កិច្ចសហប្រតិបត្តិការអន្តរជាតិ បានដឹកនាំគណៈប្រតិភូ ក្រសួងព័ត៌មាន ចូលរួម កិច្ចប្រជុំគណៈកម្មការអន្តរក្រសួង ដើម្បីរៀបចំទទួលធ្វើជាម្ចាស់ផ្ទះនៃកិច្ចប្រជុំ រដ្ឋមន្ត្រីការពារជាតិអាស៊ាន និងកិច្ចប្រជុំពាក់ព័ន្ធនៅព្រះរាជាណាចក្រកម្ពុជា ឆ្នាំ ២០២២ (ASEAN Defense Minister Meeting-ADMM 2022) តាមរយៈប្រព័ន្ធ Zoom ក្រោមអធិបតីភាព សម្តេចពិជ័យសេនា ទៀ បាញ់ ឧបនាយក រដ្ឋមន្ត្រី រដ្ឋមន្ត្រី ក្រសួងការពារជាតិ ។
អង្គប្រជុំ បានស្តាប់របាយការណ៍បច្ចុប្បន្នភាពការងាររបស់ អនុគណៈកម្ម ការខ្លឹមសារ និងឯកសារ របាយការណ៍ការងារឯកសារសម្រាប់កិច្ចប្រជុំ A D M M 2022 របាយការណ៍ប្រុងប្រៀបសម្រាប់ A D M M Retreat និងពិធីប្រគល់-ទទួលជាប្រធានកិច្ចប្រជុំ A D M M 2022 ទស្សនាវីដេអូ ក្នុងពិធីប្រគល់-ទទួល ជាប្រធានកិច្ចប្រជុំ ADMM 2022 និងពិភាក្សាការងារផ្សេងៗ ។
នៅក្នុងឱកាសនៃកិច្ចប្រជុំនេះដែរ ឯកឧត្តមបណ្ឌិត សុខ ប្រសិទ្ធិ មាន ប្រសាន៏ថា ក្រសួងព័ត៌មាន ក្នុងនាមប្រធានអនុគណៈកម្មការទី៥ សារព័ត៌មាន និង ផ្សព្វផ្សាយ នៃគណៈកម្មការជាតិរៀបចំកិច្ចប្រជុំកំពូល និងកិច្ចប្រជុំពាក់ព័ន្ធ នៅឆ្នាំ២០២២ សូមបង្ហាញនូវក្តីបារម្ភចំពោះបញ្ហាបច្ចេកទេស សម្រាប់កិច្ចប្រជុំ តាមអនឡាញ ព្រោះជាបទពិសោធន៍កន្លងមកសង្កេតឃើញបញ្ហាខ្លះលើ បច្ចេកទេស ក្នុងការរៀបចំកិច្ចប្រជុំតាមប្រព័ន្ធ វីដេអូ ហើយក្រសួងព័ត៌មាន នឹងចូលរួមសហការជានិច្ចជាមួយគណៈកម្មការ ADMM ដើម្បីធានាការរៀបចំកិច្ចប្រជុំ ខាងមុខនេះឱ្យប្រព្រឹត្តទៅបានល្អជាប្រក្រតី និងទទួលបានជោគជ័យ។
សម្តេចសម្តេចពិជ័យសេនា ទៀ បាញ់ មានប្រសាន៏លើកឡើងថា នេះ គឺជាកិច្ចប្រជុំលើកទី៣ ហើយក៏ជាកិច្ចប្រជុំចុងក្រោយ ក្នុងការពិភាក្សាដើម្បីប្រុង ប្រៀបរៀបចំកិច្ចប្រជុំ ADMM 2022 និងកិច្ចប្រជុំពាក់ព័ន្ធ ដែលកម្ពុជានឹងធ្វើជា ម្ចាស់ផ្ទះឱ្យបានគ្រប់ជ្រុងជ្រោយ និងសមស្របតាមផែនការដែលរៀបចំ។
សម្តេចពិជ័យសេនា ឧបនាយករដ្ឋមន្ត្រី បានធ្វើការបូកសរុបកិច្ចប្រជុំ និងផ្តល់អនុសាសន៍ណែនាំដល់ អនុប្រធាន សមាជិក សមាជិកា គណៈកម្មការ អន្តរក្រសួងបន្តកិច្ចសហការ និងអនុវត្តតួនាទីភារកិច្ច ដែលបានកំណត់ ដើម្បី សម្រេច ឱ្យបានលទ្ធផលជាវិជ្ជមានជូនជាតិមាតុភូមិ និងកិត្តិយសជាតិ លើឆាក អន្តរជាតិ ។
សម្តេចពិជ័យសេនា បានថ្លែងអំណរគុណចំពោះវត្តមានរបស់ ឯកឧត្តម លោកជំទាវ លោក លោកស្រី ដែលបានចូលរួមកិច្ចប្រជុំនេះ និងជូន ពរសុខភាពល្អ និងសម្រេចបានគ្រប់ភារកិច្ច៕
អត្តបទនិងរូបភាព៖ទូរទស្សន៍ជាតិកម្ពុជា
