បន្ទាប់ពីបានដំណើរការរយៈពេល ២ថ្ងៃរួចមក អង្គវេទិកាតុមូល និពន្ធនាយកសារព័ត៌មានអាស៊ី-អឺរ៉ុបលើកទី១០ ដែលរៀបចំឡើងដោយក្រសួងព័ត៌មានកម្ពុជា សហការជាមួយមូនធិអាស៊ី-អឺរ៉ុប តាមប្រព័ន្ធអនឡាញ បានប្រារព្ធពិធីបិទ នារសៀលថ្ងៃទី២៤ ខែវិច្ឆិកា ឆ្នាំ២០២១ ក្រោមអធិបតីភាព ឯកឧត្តម ខៀវ កាញ្ញារីទ្ធ រដ្ឋមន្ត្រីក្រសួងព័ត៌មាន។ វេទិកានេះដែរ មានការអញ្ជើញចូលរួមពីសំណាក់និពន្ធនាយក និងអ្នកសារព័ត៌មានជាន់ខ្ពស់ ដែលជាតំណាងទីភ្នាក់ងារសារព័ត៌មាន បោះពុម្ភ ឬផ្សព្វផ្សាយធំៗ នៅតាមបណ្ដារប្រទេសអាស៊ី និងអ៊ឺរ៉ុប ដើម្បីផ្លាសប្តូរទស្សនៈ ស្ដីពីកិច្ចការបច្ចុប្បន្នទាក់ទងនឹងអាស៊ី-អឺរ៉ុប ។
វេទិកាតុមូលនេះ គឺជាវេទិកាអមនៃកិច្ចប្រជុំកំពូល អាស៊ី-អឺរ៉ុប លើកទី១៣ ហើយសម្រាប់វេទិកានេះដែរ គឺជាការបង្កើតអោយមានការផ្លាស់ប្តូរ និងទំនាក់ទំនងយ៉ាងជិតស្និត រវាងតំណាងនិពន្ធនាយក និងអ្នកសារព័ត៌មានក្នុងតំបន់ អាស៊ី-អឺរ៉ុប។ សម្រាប់ប្រធានបទក្នុងវេទិកាឆ្នាំនេះ ផ្តោតទៅលើការពង្រឹងកិច្ចសហប្រតិបត្តិការណ៍ របស់អ្នកសារពត៌មាន ក្នុងការប្រឆាំង និងលុបបំបាត់ព័ត៌មានក្លែងក្លាយ។ វេទិកាតុមូល និពន្ធនាយកសារព័ត៌មាន ត្រូវបានរៀបចំធ្វើឡើងរៀងរាល ២ឆ្នាំម្ដង ជាព្រឹត្តិការណ៍អមនៃកិច្ចប្រជុំកំពូល ASEM ដែលជាវេទិកាដ៏សំខាន់មួយ នៅក្នុងកិច្ចខិតខំប្រឹងប្រែង ដើម្បីពង្រឹងនូវកិច្ចសហប្រតិបត្តិការនេះ តួនាទីរបស់ប្រព័ន្ធផ្សព្វផ្សាយ និងអ្នកសារព័ត៌មាន គឺមានសារៈសំខាន់ជាងពេលណាៗទាំងអស់។
