នៅព្រឹកថ្ងៃទី២៦ ខែវិច្ឆិកា ឆ្នាំ២០២១ លោកជំទាវ ទាង អេង ទៀ សីហា អនុប្រធានគណៈ កម្មាធិការ សាខាកាកបាទក្រហមកម្ពុជាខេត្តសៀមរាប តំណាងដ៍ខ្ពង់ខ្ពស់ឯកឧត្តម ទៀ សីហា ប្រធានគណៈកម្មាធិការសាខា និងសហការី បានអញ្ជើញ ជួបសំណេះសំណាល និងប្រគល់ផ្ទះមនុស្សធម៌ ១ខ្នង ជាផ្ទះទី៧៨ មានទំហំ៦ម៉ែត្រគុណនឹង៦ ម៉ែត្រ មានពីរបន្ទប់ ដំបូលប្រក់ស័ង្កសីភ្លីក្បឿង ជញ្ជាំងស្មាតបត ក្រាលការ៉ូផុតពីដីកម្ពស់០,៥០ ម៉ែត្រ សង់លើដីផ្ទាល់ខ្លួនគាត់ទំហំ ២០ម៉ែត្រ x ៤០ម៉ែត្រ ចំណាយថវិកាសាងសង់សរុប៣.៨០០ ដុល្លារអាមេរិក ឧបត្ថម្ភដោយឯកឧត្តម ធា ស៊ីវត្ថាសមាជិកក្រុមប្រឹក្សាខេត្តនិងលោកជំទាវ ហោ សាយ័ន្ត សមាជិកាគណៈកម្មាធិការសាខាកាកបាទក្រហមកម្ពុជាខេត្តសៀមរាបជូនដល់គ្រួសារក្រីក្រនៅភូមិរលំទូក ឃុំស្វាយលើ ស្រុកស្វាយលើ ក្រោមការផ្ដួចផ្ដើមដោយឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ។
លោក ស៊ុ សំអន នាយកប្រតិបត្តិសាខាកាកបាទក្រហមកម្ពុជាខេត្តសៀមរាប បានឲ្យដឹងថា ផ្ទះមនុស្សធម៌១ខ្នងនេះ ត្រូវបានប្រគល់ជូនអ្នកមីង ឈ្មោះ សារ សួន អាយុ៤០ឆ្នាំ ជាស្ត្រីម៉េម៉ាយ មានកូន៤នាក់រស់នៅក្នុងបន្ទុក ក្នុងនោះកូនចំនួន៣នាក់កំពុងសិក្សា និងកូនម្នាក់បានឈប់រៀនដើម្បីជួយធ្វើស្រែឱ្យម្តាយ ខណៈប្ដីរបស់គាត់បានមរណភាពនៅថ្ងៃទី២៩ខែធ្នូឆ្នាំ២០២០ ដោយសារមានជំងឺរបេងឆ្អឺងខ្នងរ៉ាំរ៉ៃ ប៉ះពាល់ជើងទាំងពីរមិនអាចដើរបាន អង្គុយមិនកើត ដេកនៅតែនឹងកន្ទេលតាំងពីខែមីនាឆ្នាំ២០២០ ខណៈផ្ទះនេះបានសាងសង់រួចតាំងពីអំឡុងខែតុលាឆ្នាំ២០២០មកម្លេះ ក្នុងអំឡុងពេលដែលប្តីស្ត្រីនេះនៅមានជីវិត តែដោយសារ ជួប វិបត្តិ នៃជំងឺកូវីដ-១៩ ទើបមានការយឺតយ៉ាវក្នុងការធ្វើពិធីប្រគល់ជូន ។
មានប្រសាសន៍សំណេះសំណាលនាឱកាសនោះ លោកជំទាវ ទាង អេង ទៀសីហា អនុប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប បានពាំនាំនូវការផ្ដាំផ្ញើសួរសុខទុក្ខពីសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាឯកឧត្តម ទៀ សីហា ប្រធានគណៈកម្មាធិការសាខាកាកបាទក្រហមកម្ពុជាខេត្ត ដែលតែងតែយកចិត្តទុកដាក់ គិតគូរចំពោះសុខទុក្ខប្រជាពលរដ្ឋគ្រប់រូប មិនប្រកាន់វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ដូចដែលលើកឡើងថា “កាកបាទក្រហមកម្ពុជា មានគ្រប់ទីកន្លែង សម្រាប់គ្រប់ៗគ្នា-មិនទុកនរណាម្នាក់ចោល” ហើយអ្វីដែលយើងទាំងអស់គ្នាមិនអាចបំភ្លេចបាន និងចងចំាជានិច្ចនោះ គឺ ទីណាមានការលំបាក ទីនោះតែងតែមាន កាក បាទក្រហមកម្ពុជា ឬ ទុក្ខលំបាករបស់បងប្អូន គឺជាទុក្ខលំបាករបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ។
ជាមួយគ្នានេះដែរលោកជំទាវ បានណែនាំដល់អាជ្ញាធរស្រុក សូមចាត់ចែងសម្របសម្រួលដើម្បីឱ្យកុមារា ធី ធឿន ជាកូនទី២ រៀនបានថ្នាក់ទី៧ ហើយបានឈប់រៀនដើម្បីជួយធ្វើស្រែឱ្យម្តាយ ឱ្យគាត់បានបន្តការសិក្សាឡើងវិញយ៉ាង ហោចណាស់ក៏ចប់ថ្នាក់ទី៩ ឬចប់ទី១២ កាន់តែប្រសើរ ព្រោះគាត់ជាកូនប្រុសជាជន្ទល់គ្រួសារទៅថ្ងៃមុខ ព្រមទាំងជំរុញលើកទឹកចិត្តដល់កុមារារូបនេះ ឱ្យខិតខំប្រឹងប្រែងរៀនសូត្រ ដើម្បីទទួលបានចំណេះដឹងជួយទ្រទ្រង់ដល់ជីវភាពគ្រួសារនិងជួយក្នុងសហគមន៍យើងនាពេលអនាគត និងបានអំពាវនាវដល់បងប្អូនប្រជាពលរដ្ឋទាំងអស់ ត្រូវយកចិត្តទុកដាក់អនុវត្តបានត្រឹមត្រូវនូវការណែនាំរបស់ក្រសួងសុខាភិបាល និងវិធានការ៣កុំនិង៣ការពាររបស់សម្តេចតេជោ សែន នាយករដ្ឋមន្ត្រី ដើម្បីការពារ ទប់ស្កាត់ និង បង្ការការចម្លងជំងឺកូវីដ១៩ ។
សូមជំរាបថា៖អំណោយមនុស្សធម៌របស់សាខាកាកបាទក្រហមកម្ពុជាខេត្តសៀមរាប បន្ថែមសម្រាប់គ្រួសារទទួលបានផ្ទះ រួមមាន៖ឃីត២ កញ្ចប់ , កន្ទេល២ , អង្ករ៦០គីឡូក្រាម , មី១កេស , ត្រីខ១យួរ , អាវយឺត៤ , សម្ភារៈផ្ទះបាយមួយចំនួន និងថវិកា៤សែនរៀល និង ប្រតិភូអមដំណើរបានឧបត្ថម្ភបន្ថែមនូវថវិកាផ្ទាល់ខ្លួនមួយចំនួនទៀតដែរ រីឯលោកតា លោកយាយ ដែលអញ្ជើញចូលរួមក្នុងពិធីប្រគល់ផ្ទះមនុស្សធម៌ទី ៧៨នេះ ចំនួន៤០នាក់ ម្នាក់ៗទទួលបាន៖ អង្ករ ៣០គីឡូក្រាម មី១កេស ត្រីខ១យួរទឹកត្រី១យួរ ឃីត១កញ្ចប់ អាវយឺត២ និងថវិកា៧ម៉ឺនរៀល ៕
អត្ថបទ និង រូបថត ៖ លោក យូ វង្ស
កែសម្រួលអត្ថបទ ៖ លោក លីវ សាន្ត
