សៀមរាប៖ ប្រជាពលរដ្ឋក្រីក្រចំនូន ១០០គ្រួសារ ក្នុងភូមិប្រិយ៍ ឃុំប្រិយ៍ ស្រុកស្រីស្នំ ខេត្តសៀមរាប ទទួលបានអំណោយស្បៀងអាហារ ជាគ្រឿងឧបភោគបរិភោគ ពីអង្គការមនុស្សធម៌ចតុមុខរ៉ូតថារីក្លឹប រាជធានីភ្នំពេញ នាព្រឹកថ្ងៃទី២៦ ខែវិច្ឆិកា ឆ្នាំ២០២១នេះ។ កម្មវិធីបានប្រព្រឹត្តិទៅដោយមានការចូលរួមពីសំណាក់លោកស្រី ចាន់ សួយ អភិបាលរងស្រុកស្រីស្នំ លោកស្រី ឡេង ផល្លី ប្រធានចតុមុខក្លឹបរ៉ូតថារីភ្នំពេញ លោក ឡាយ សំអៀន នាយកធានាគារជាតិនៃកម្ពុជា សាខាខេត្តសៀមរាប និងក្រុមការងារយុវជនបក្សខេត្តចុះជួយមូលដ្ឋានស្រុកស្រីស្នំជាច្រើននាក់ផងដែរ។
នាឱកាសនោះ លោកស្រី ឡេង ផល្លី ប្រធានចតុមុខក្លឹបរ៉ូតថារីភ្នំពេញ បានមានប្រសាសន៍ថា ដោយបច្ចុប្បន្ននេះ យើងមើលឃើញពីភាពលំបាកក្នុងការរស់នៅរបស់បងប្អូនប្រជាពលរដ្ឋមិនថានៅប្រទេសកម្ពុជានោះទេ គឺបណ្តាប្រទេសទាំងអស់លើសកលលោកបាននឹងកំពុងជួបនៅវិបត្តិដោយសារការរាតត្បាតនៃជំងឺកូវីដ-១៩ ដូច្នេះហើយ យើងត្រូវចូលរួមចូលរួមចំណែកជាមួយរាជរដ្ឋភិបាល ដើម្បីជួយសម្រាលទុក្ខលំបាកដល់ប្រជាពលរដ្ឋក្រីក្រ ដែលងាយរងគ្រោះបំផុតនៅកម្ពុជា។ បើទោះបីកម្ពុជា មានអត្រាការឆ្លងមិនច្រើនដូចបណ្ដាប្រទេសនៅលើសលកលោកក៏ដោយ ប៉ុន្ដែយើងត្រូវតែបន្ដការប្រុងប្រយ័ត្នឲ្យបានខ្ពស់ និងអនុវត្ដឱ្យបានខ្ជាប់ខ្ជួនជានិច្ច តាមវិធានការការពារ ទប់ស្កាត់ ជំងឺកូវីដ-១៩ របស់ក្រសួងសុខាភិបាល គឺត្រូវរក្សាគម្លាត អនាម័យដៃស្អាត លាងជាមួយសាប៊ូ អាកុល ជែល កុំទៅទីប្រជុំជន និងតាមសាធារណៈដែលមានមនុស្សច្រើន បើមិនចាំបាច់ ព្រោះវាងាយឆ្លង និងអាចផ្ទុះឡើងនូវរលកទី២-ទី៣ទៀត ដែលបង្កហានិភ័យខ្ពស់ដល់អាយុជីវិត។
កន្លងមកក្រុមការងារ «ចតុមុខក្លឹបរ៉ូតថារី រាជធានីភ្នំពេញ» ក៏បាននាំយកនូវសម្ភារបរិក្ខារពេទ្យ សម្រាប់ប្រើប្រាស់ប្រយុទ្ធនឹងជំងឺកូវីដ-១៩ នៅតាមបណ្ដាក្រុមគ្រូពេទ្យជួរមុខនៃមន្ទីរពេទ្យធំៗ ដូចជាមន្ទីរពេទ្យ មិត្ដភាពខ្មែរ-សូវៀតជាដើម និងតាមមន្ទីរពេទ្យបង្អែកខេត្ដនានា រួមទាំងចុះជួយសម្រាលការលំបាក ដល់ប្រជាពលរដ្ឋដែលរស់នៅតាមតំបន់ផ្សេងៗទៀតជាច្រើនដែរ។
លោកស្រី ចាន់ សួយ អភិបាលរងស្រុកស្រីស្នំ បានថ្លែងអំណរអរគុណយ៉ាងជ្រាលជ្រៅចំពោះអង្គការ ចតុមុខក្លឹបរ៉ូតថារី រាជធានីភ្នំពេញ ដែលតែងតែមានបេសកកម្មធ្វើសកម្មភាពមនុស្សធម៌ជួយដល់សង្គមលើវិស័យអប់រំ មន្ទីរពេទ្យ ការគាំពារទារក និងមាតា ទឹកស្អាត សហគមន៍ក្រីក្រ និងក្មេងកំព្រាទុរគត៌ជន ជាក់ស្តែងនាពេលនេះ បាននាំយកនូវគ្រឿងឧបភោគ បរិភោគ ជូនដល់ប្រជាពលរដ្ឋមានជីវភាពខ្វះខាត ចំនួន១០០គ្រួសារ នៅភូមិខាងលើ ដែលអំណោយទាំងនោះរួមមាន៖ អង្ករ ២០ គីឡូក្រាម ទឹកត្រី ១យួរ ទឹកស៊ីអ៉ីវ ១យួរ ត្រីខ ១០កំប៉ុង ស្ករស ១គីឡូក្រាម មី ១កេស និងសម្ភារមួយចំនួនទៀត៕
អត្ថបទ និងរូបភាព៖ ស៊ាន សុផាត
