កាលពីថ្ងៃទី២៦ ខែវិច្ឆិកា ឆ្នាំ២០២១មន្សិលមិញនេះ ឯកឧត្ដម ជុំ សុភមករា អគ្គនាយករងនៃអាជ្ញាធរជាតិអប្សរា បានបង្ហាញពីគម្រោងផែនការរបស់អាជ្ញាធរជាតិអប្សរា អំពីការរៀបចំពិធីរំលឹកគុណអង្គរ ក្នុងរយៈពេល៣ថ្ងៃ ចាប់ពីថ្ងៃទី១៤ដល់ថ្ងៃទី១៦ខែធ្នូឆ្នាំ២០២១ខាងមុខនេះ ក្នុងគោលបំណងដើម្បីរំលឹកគុណដល់បុព្វការីជន ព្រះមហាក្សត្រជំនាន់មុនៗ ដែលបានកសាងសំណង់ប្រាសាទជាច្រើនក្នុងរមណីយដ្ឋានអង្គរ ដែលមានសារៈប្រយោជន៍សម្រាប់សង្គមជាតិរហូតដល់បច្ចុប្បន្ន ព្រោះថាប្រាសាទអង្គរវត្ដ គឺជាវប្បធម៌រស់ ហើយក៍ជាផលប្រយោជន៍មួយខ្លាំងជាងអណ្ដូងប្រេងកាតដែលបូមមិនចេះរីងស្ងួត ពោលប្រាសាទអង្គរវត្ដបានផ្ដល់អត្ថប្រយោជន៍ជាច្រើនដល់ប្រជាពលរដ្ឋខ្មែរទូទាំងប្រទេសក៍ដូចជានៅលើពិភពលោក ។
ឯកឧត្ដម ជុំ សុភមករា ឲ្យដឹងទៀតថា ព្រឹត្តិការណ៍នេះ ក៏ដើម្បីបង្ហាញពីការងារ និងសមិទ្ធផលការងារទូទៅដែលអាជ្ញាធរជាតិអប្សរាសម្រេចបាន ក្នុងបំណងដើម្បីកិច្ចការអភិរក្សប្រាសាទ ដែលជាមរតកដ៏សំខាន់សម្រាប់ប្រជាជាតិយើង។ ឯកឧត្ដម បានបន្ដថា ព្រឹត្តិការណ៍នេះ ក៏នឹងបើកឱកាសដល់សាធារណជន អាចចុះឈ្មោះ ដើម្បីទស្សនកិច្ចស្វែងយល់នៅតាមការដ្ឋានការងារជួសជុលប្រាសាទនានា ដែលអាជ្ញាធរជាតិអប្សរាកំពុងដំណើរការផងដែរ។
ឯកឧត្ដម ជុំ សុភមករា បានបញ្ជាក់បន្ថែមថា នៅក្នុងពិធីរំលឹកគុណអង្គរនេះ ក៍មានការរៀបចំឱ្យមានការរៀបចំបង្ហាញពីវិធីសាសនា ការបង្ហោះខ្លែង សម្ដែងសិល្បៈ ល្ខោនបាសាក់ ល្ខោនស្បែងធំ វប្បធម៌ចាក់សាក់ និងមានការតាំងពិព័ណ៌ស្នារដៃផ្សេងៗ ដែលកូនខ្មែរបានធ្វើកន្លងមក ជាការដាស់ស្មារតីឱ្យកូនខ្មែរចេះស្រឡាញ់ពីវប្បធម៌សិល្បៈរបស់ខ្លួន ដែលបានបន្សល់ទុកតាំងពីដូនតាមក ព្រោះថាកូនខ្មែរសម័យនេះ ពេលទំនេរសំឡឹងមើលតែទូរស័ព្ទនោះទេ ពោលកូនខ្មែរមួយចំនួនមិនសូវចាប់អារម្មណ៍ពីវប្បធម៌របស់ខ្លួនឡើយ។
ឯកឧត្ដម ហង់ ពៅ អគ្គនាយក នៃអាជ្ញាធរជាតិអប្សរា មានប្រសាសន៍ដែរថា មុននឹងមានព្រឹត្តិការណ៍រំលឹកថាគុណអង្គរនេះក៏មានកម្មវិធីដាច់ដោយឡែកមួយទៀតដែលរៀបចំឡើងដោយវិស័យឯកជន ក្នុងរយៈពេល២ថ្ងៃ ពីថ្ងៃទី១២ ដល់ថ្ងៃទី១៣ ខែធ្នូ ដូចជាពិធីសាសនា និងការសម្ដែងសិល្បៈ នៅទីតាំងដូចគ្នាជាមួយកម្មវិធីរបស់អាជ្ញាធរជាតិអប្សរាផងដែរ ដូច្នេះក្នុងឱកាសនេះ ថ្នាក់ដឹកនាំអាជ្ញាធរជាតិអប្សរា ជឿជាក់ថា សាធារណជននឹងចូលរួមព្រឹត្តិការណ៍ខាងលើនេះឱ្យបានច្រើនកុះករ និងចូលរួមថែរក្សាសុខភាពខ្លួនឯងឱ្យបានគ្រប់ៗគ្នា គឺត្រូវរៀនរស់ក្នុងបរិបទថ្មីនៃជំងឺកូវីដ-១៩ ទាំងអស់គ្នា ៕
អត្ថបទ និង រូបថត ៖ លោក ឈិត សាវី
កែសម្រួលអត្ថបទ ៖ លោក លីវ សាន្ត
