លេាកវរៈសេនីយ៍ឯក ទេព ពុំសែន អធិការនគរបាលស្រុកពួក បានឲ្យដឹងថា កាលពីវេលាម៉ោង១៨និង៣០នាទី ថ្ងៃទី២៣ ខែកុម្ភៈ ឆ្នាំ២០១៩នេះ មានករណីគ្រោះថ្នាក់ចរាចរណ៍មួយបានកើតឡើង រវាងរថយន្តនិងម៉ូតូ នៅលើផ្លូវជាតិលេខ៦ ត្រង់ចំណុចផ្លូវបំបែកចូលវត្តពួក ក្នុងភូមិពួកចាស់ ឃុំពួក ស្រុកពួក ខេត្តសៀមរាប បណ្ដាលឲ្យក្មេងប្រុសម្នាក់ស្លាប់ និងបុរសម្នាក់រងរបួស ដោយសារអ្នកបើកបរម៉ូតូបត់ឆ្វេងខ្ខះការប្រុងប្រុងប្រយ័ត្ន និងអ្នកបើកបររថយន្តបើកបរក្នុងល្បឿនលឿន ។
លេាក ទេព ពុំសែន បានឲ្យដឹងទៀតថា ករណីគ្រេាះថ្នាក់ចរាចរណ៍នេះគឺ រថយន្តម៉ាក តូយ៉ូតា កាម៉ារីឆ្លាម ផលិតឆ្នាំ១៩៩៨ ព៌ណស្លែរ ពាក់ផ្លាកលេខភ្នំពេញ 2M-5806 បើកបរដោយឈ្មោះ សោម សារ៉ាន់ ភេទប្រុស អាយុ៤៩ឆ្នាំ រស់នៅភូមិជ្រៃ ឃុំជ្រៃ ស្រុកថ្មគោល ខេត្តបាត់ដំបង មុខរបរលក់ដូរ បានបើកបរក្នុងទិសដៅពីកើតទៅលិច បានបុកម៉ូតូម៉ាកហុងដាឌ្រីម ផលិតឆ្នាំ២០១៣ ព៌ណខ្មៅ ពាក់ផ្លាកលេខឧត្តមានជ័យ 1B-0654 បើកបរដោយឈ្មោះ ខៀវ សារឿនភេទប្រុស អាយុ៥៨ឆ្នាំ រស់នៅភូមិគោកថ្មី ឃុំដូនកែវ ស្រុកពួក ខេត្តសៀមរាប មុខរបរកសិករ ( រងរបួស ) ដឹកឈ្មោះ ដន វណ្ណឌី ភេទប្រុស អាយុ១១ឆ្នាំ មុខរបរសិស្ស ( ស្លាប់ពេលបញ្ជូនដល់មន្ទីពេទ្យ ) ត្រូវជាចៅ នៅភូមិជាមួយគ្នា ក្នុងទិសដៅពីកើតទៅលិច ហើយបត់ឆ្វេង។
លេាក ទេព ពុំសែន បានឲ្យដឹងទៀតថា ក្រោយពេលកើតហេតុ អ្នកបើកបររថយន្តបើកគេចពីកន្លែងកើតហេតុទៅទិសខាងជើងបានចំងាយ៨គីឡូម៉ែត្រ ទើបសមត្ថកិច្ចនគរបាលឃាត់បានទាំងរថយន្តនិងអ្នកបើកបរ ហើយក្រោយពេលកើតហេតុ កម្លាំងនគរបាលផ្នែកជំនាញបានធ្វើការវាស់វែង និងដកហូតវត្ថុតាង យកមករក្សារទុកនៅអធិការដ្ឋាននគរបាលស្រុកពួក និងបានប្រគល់សាកសពជូនក្រុមគ្រួរសារយកទៅធ្វើបុណ្យតាមប្រពៃណី ៕
អត្ថបទ និង រូបថត : លោក ថាច់ ពិសុទ្ធ
កែសម្រួលអត្ថបទ : លោក លីវ សាន្ត
