កាលពីចុងសប្តាហ៍ថ្មីៗនេះ សាលាអាយឃីដ យូស៊ីម៉ាស់កម្ពុជា សហការជាមួយសាលាអាយឃីដ យូស៊ីម៉ាស់សាខាខេត្តសៀមរាប បានរៀបចំប្រឡងកម្រិតអន្តរជាតិលើកទី៤ នៅសណ្ឋាគារបុរីអង្គរ ក្នុងក្រុងសៀមរាប ដោយមានសិស្សានុសិស្សសាលាអាយឃីដយូស៊ីម៉ាស់ មកពីសាខាខេត្តបាត់ដំបង និងខេត្តសៀមរាប សរុបចំនួន៩០៩នាក់ ស្របទៅតាមកម្រិតសិក្សារបស់ពួកគេ ចាប់ពីថ្នាក់ដំបូង (Foundation) រហូតដល់កម្រិតហៃអ័រ អេA. ដើម្បីវាស់ស្ទង់ការសិក្សារបស់សិស្សគ្រប់កម្រិត ដែលបានសិក្សាតាមកម្មវិធីយូស៊ីម៉ាស ហើយការប្រឡងនេះ បានធ្វើឡើងដូចគ្នានៅតាមបណ្តាប្រទេសចំនួន៨០ ក្នុងសកលលោក។
លោក ប៊ែរណាត វង្ស នាយកប្រតិបត្តកម្មវិធីយូស៊ីម៉ាស និងជាទីប្រឹក្សាអប់រំកម្មវិធីយូស៊ីម៉ាសអន្តរជាតិម៉ាឡេស៊ីបានមានប្រសាសន៍ថា កម្មវិធីបង្រៀនរបស់យូស៊ីម៉ាស ជាកម្មវិធីអប់រំមួយមានលក្ខណៈប្លែកពីគេ លំដាប់អន្តរជាតិអាយអេសអូផ្នែកអភិវឌ្ឍន៍ខួរក្បាលពីប្រទេសម៉ាឡេស៊ី និងជាកម្មវិធីក្រៅម៉ោងសិក្សាចំណេះដឹងទូទៅ ដោយបង្រៀនតាមរយៈការប្រើគណនាលេខរហ័សបំផុត ។
លោក ប៊ែរណាត វង្ស មានប្រសាសន៍ទៀតថា កម្មវិធីនេះ មិនគ្រាន់តែធ្វើឱ្យកុមារពូកែគណនាលេខរហ័សប៉ុណ្ណោះទេ ថែមទាំងឱ្យកុមារមានខួរក្បាលវៃឆ្លាតទាំងសងខាង និងធ្វើឱ្យកុមារពូកែផ្តោតអារម្មណ៍ ពូកែអង្កេតស្តាប់ ចាំ និងមានគំនិតប៉ិនប្រសព្វច្នៃប្រឌិត មានសមត្ថភាពពូកែដោះស្រាយបញ្ហាខណៈបច្ចប្បន្ន យូស៊ីម៉ាសកម្ពុជា មានសាខាចំនួន៤៤កន្លែងនិងសិស្សកើនឡើងពី១០.៦០០នាក់ នឹងបន្តបើកសាខាច្រើនកន្លែងទៀតនៅទូទាំងប្រទេសនាពេលខាងមុខ។
លោក ប៊ែរណាត វង្ស មានប្រសាសន៍បន្ថែមទៀតថា នៅចុងឆ្នាំ២០១៩នេះ អាយឃីដយូស៊ីម៉ាសកម្ពុជាកម្ពុជា នឹងរៀបចំព្រឹត្តិការណ៍ធំមួយ គឺធ្វើជាម្ចាស់ផ្ទះរៀបចំកម្មវិធីប្រឡងលំដាប់អន្តរជាតិលើកទី២៤នៅរាជធានីភ្នំពេញ ដែលរំពឹងថានឹងមានសិស្សានុសិស្សរាប់ពាន់នាក់ មកពី៤០ទៅ៥០ប្រទេសចូលរួម ដោយឡែកសម្រាប់កម្ពុជា ក៏រំពឹងថា នឹងមានសិស្សពី៣ពាន់ទៅ៤ពាន់នាក់ចូលរួមប្រកួតប្រជែងផងដែរ។
គួររំលឹកថា កាលពីថ្ងៃទី០៩-១០ ខែធ្នូ ឆ្នាំ២០១៨ កន្លងទៅនេះ សិស្សសាលាអាយឃីដសាខាខេត្តសៀមរាប ចំនួន៨រូបក្នុងនោះស្រីមួយរូប បានទៅចូលរួមប្រឡងកម្រិតអន្តរជាតិ នៅប្រទេសម៉ាឡេស៊ី ក្នុងចំណោសិស្សជាង៣ពាន់នាក់មកពី៨០ប្រទេស ហើយក្នុងសម័យប្រឡងអន្តរជាតិនោះ ពួកគាត់ទាំង៨នាក់ ទទួលបានវិញ្ញាបនបត្រកម្រិតអន្តរជាតិ ល្អបំផុត និងទទួលបានពានរង្វាន់ជើងឯកអន្តរជាតិកម្រិតលេខ១ ចំនួន៤នាក់ និង កម្រិតលេខ២ចំនួន៣នាក់ ហើយ ពិសេសជាងគេនោះ គឺឈ្មោះខេត ឆេងហ័ង ភេទប្រុស ឈ្នះពានរង្វាន់ជ័យលាភីជើងឯកផុតលេខលើឆាកអន្តរជាតិ ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
