មន្ត្រីរដ្ឋបាលខេត្តសៀមរាប នាព្រឹកថ្ងៃទី២៥ ខែកុម្ភៈ ឆ្នាំ២០១៩ នេះបានឲ្យដឹងថា រដ្ឋបាលខេត្តបាននឹងកំពុងយកចិត្តទុកដាក់ខ្ពស់ និងជាការងារអាទិភាព ចំពោះការស្វែងរកទីតាំងចាក់សំរាមថ្មី តាមរយៈកិច្ចសហប្រតិបត្តិការជាមួយ កយកា (KOICA) ដែលបានសិក្សាគម្រោងរួចរាល់ហើយ ចំណែកជាមួយធនាគារពិភពលោក គឺខេត្តកំពុងចាត់មន្ត្រីចុះសិក្សាយ៉ាងយូររយៈពេល ៦ខែ។
បើតាមការបញ្ជាក់របស់មន្ត្រីរដ្ឋបាលខេត្តសៀមរាប ការសិក្សាក្រោយនេះ នឹងស្វែងរកទីតាំងចាក់សំរាម ដែលកាត់បន្ថយផលប៉ះពាល់ជាអតិបរមា និងការប្រើប្រាស់បច្ចេកទេសក្នុងការកែច្នៃសំរាម ទៅជាថាមពល និងជីសរីរាង្គជាដើម។ ពាក់ព័ន្ធជាមួយក្រុមហ៊ុន ប្រមូលសំរាមទាំងអស់ក្នុងខេត្តសៀមរាប រដ្ឋបាលខេត្ត បានធ្វើការណែនាំឲ្យក្រុមហ៊ុនប្រមូលសំរាមទាំងនោះ ដោះស្រាយនូវបញ្ហាសេវាប្រមូលសំរាមរបស់ក្រុមហ៊ុន។ ហើយរដ្ឋបាលខេត្ត និងរដ្ឋបាលក្រុងក្នុងនាមភាគីអនុវត្តកិច្ចសន្យា បានពិនិត្យទៅលើការអនុវត្តកិច្ចសន្យារបស់ក្រុមហ៊ុន ទាំងសេវាប្រមូលសំរាមមិនឲ្យមានការយឺតយូរ ឬអាក់ខាន ការដឹកជញ្ជូនដោយបញ្ចៀសការហូរទឹក ឬធ្លាក់សំរាមរាយប៉ាយ និងការញែកសំរាមជាដើម។
បើទោះបីជាយ៉ាងនេះក្តី កាលពីពេលថ្មីៗកន្លងមកនេះ មានការរិះគន់ពីសំណាក់ប្រជាពលរដ្ឋ អំពីករណីទឹកស្អុយហូរចេញពីរថយន្តដឹកសំរាមមកលើផ្លូវ បណ្តាលឲ្យមានគ្រោះថ្នាក់ដល់ប្រជាពលរដ្ឋដែលធ្វើដំណើរ និងករណីទីតាំងញែកសំរាម ដែលបង្កឲ្យមានក្លិនស្អុយប៉ះពាល់ដល់សុខភាពប្រជាពលរដ្ឋ ដែលរស់នៅក្បែរខាង។
ការរិះគន់នេះ ត្រូវបានរដ្ឋបាលខេត្តសៀមរាប អះអាងថា អាជ្ញាធរតែងតែហៅក្រុមហ៊ុនមកធ្វើការណែនាំបន្ថែម អំពីការដឹកជញ្ជូនសំរាមមិនឲ្យធ្លាក់រាយប៉ាយ និងស្រក់ទឹក ព្រមទាំងការបើកបរដោយការយកចិត្តទុកដាក់ គោរពច្បាប់ចរាចរ ជៀសវាងគ្រោះថ្នាក់ជាយថាហេតុ។
រដ្ឋបាលខេត្ត ក៏បានថ្លែងអំណរគុណចំពោះការចូលរួមផ្តល់ព័ត៌មានរបស់បងប្អូន និងសំណូមពរឲ្យបងប្អូនចូលរួមផ្តល់ព័ត៌មានមករដ្ឋបាលខេត្ត ឬរដ្ឋបាលក្រុង ស្រុក ឬអាជ្ញាធរមូលដ្ឋាន ដោយផ្ទាល់ និងឲ្យបានឆាប់ ដើម្បីមានវិធានដោះស្រាយ ដែលជាផ្នែកមួយយ៉ាងសកម្មមិនអាចខ្វះបានសម្រាប់ការចូលរួមអភិវឌ្ឍន៍ខេត្តដែលជាប៉ូលទេសចរណ៍ដ៏សំខាន់មួយនេះ៕
អត្ថបទ និង រូបថត : លោក ជា ស្រស់ និងលោក ខេងឧត្តម
