ក្នុងរយៈពេល២០ឆ្នាំមកនេះ លោក អង់រីកូ សាលា (ENRICO SALA) ជាជនជាតិស្វីស បានរៃអង្គាសថវិកាពីសប្បុរសជននៅប្រទេសស្វីស មកជួយដល់ប្រជាពលរដ្ឋប្រទេសកម្ពុជា តាមរយៈឯកឧត្តមអ្នកឧកញ៉ា សៀង ណាំ ចាប់តាំងពីឆ្នាំ១៩៩៩មកម្លេះ ដោយផ្តោតសំខាន់ទៅលើ វិស័យអប់រំ សុខាភិបាល ទឹកស្អាត ជាដើម។
ថ្លែងនៅក្នុងពិធីសម្ពោធដាក់ឱ្យប្រើប្រាស់ ជាផ្លូវការអគារសិក្សា១ខ្នង ៥បន្ទប់ នៅវិទ្យាល័យ ហ៊ុន សែន សៀមរាប ដែលជាអំណោយរបស់ប្រជាជនស្វីស នៅព្រឹកថ្ងៃទី២៥ខែកុម្ភះឆ្នាំ២០១៩នេះ លោក អង់រីកូ សាលា (ENRICO SALA) បានបញ្ជាក់ថា គិតមកដល់ឆ្នាំ២០១៩នេះ លោកបាននាំមកថវិកាពីសប្បុរសជននៅប្រទេសស្វីស មកជួយដល់ប្រជាជនកម្ពុជាជាពិសេស នៅខេត្តសៀមរាបនេះ មានចំនួនសរុប ៣,៦៩១,៦៨២ដុល្លាអាមេរិក ក្នុងនោះ សាងសង់អណ្តូងទឹកជូនប្រជាពលរដ្ឋ បានចំនួន ៩៤១អណ្តូង មណ្ឌលសុខភាពចំនួន ១៦កន្លែង អគារសម្ភពចំនួន៩ខ្នង អគារសាលារៀន និងបណ្ណាល័យចំនួន៥៦ខ្នង។
ឯកឧត្តម អ្នកឧកញ៉ា សៀង ណាំ អ្នកតំណាងរាស្ត្រខេត្តសៀមរាប បានមានប្រសាសន៍ថ្លែងអំណរគុណចំពោះលោក អង់រីកូ សាលា (ENRICO SALA) និងប្រជាជនស្វីសដែលបានចំណាយថវិកាផ្ទាល់ខ្លួនក្នុងការជួយដល់ប្រជាជនកម្ពុជានៅខេត្តសៀមរាបនេះ។
ព័ត៌មានជាតិ ថ្មីៗ
ឯកឧត្តម ក៍បានចាត់ទុកសមិទ្ធផលទាំងនេះ ជាទឹកចិត្តមិនអាចកាត់ថ្លៃបាន និងបានចូលរួមចំណែកមួយដ៍សំខាន់ជាមួយរាជរដ្ឋាភិបាលកម្ពុជា ក្នុងការអភិវឌ្ឍនៅតាមតំបន់ជនបទនៃសៀមរាបនេះ។ ជាមួយគ្នានេះឯកឧត្តម អ្នកឧកញ៉ា សៀង ណាំ ក៍បានជម្រុញឱ្យសិស្សានុសិស្សទាំងអស់ត្រូវខិតខំរៀនសូត្រ ដើម្បីឆ្លើយតបបានជាមួយ និងទឹកចិត្តសប្បុរសជនបានជួយផងដែរ៕
អត្ថបទ និង រូបថត : លោក ទ្រា ពន្លឺ
