លោក ពៅ ពិសិដ្ឋ អភិបាលរងខេត្តសៀមរាប មានប្រសាសន៍ថា ក្នុងនាមអាជ្ញាធរខេត្តសៀមរាប សូមគាំទ្រចំពោះការតាំងពិព័រណ៍ស្នាដៃសិស្ស ដែលស្រឡាញ់ចូលចិត្តវិស័យវិទ្យាសាស្ត្រ និងបច្ចេកវិទ្យា សម្រាប់សិស្សានុសិស្សវិទ្យាល័យ ហ៊ុន សែន វត្តស្វាយ ព្រោះកម្មវិធីវិទ្យាសាស្ត្រនេះ ពិតជាមានសារៈសំខាន់ណាស់ ខណៈពេលដែលប្រទេសកម្ពុជា បានធ្វើសមាហរណកម្មខ្លួន ចូលក្នុងតំបន់ និងពិភពលោក ហើយកំពុងដើរតួនាទីយ៉ាងសកម្ម ក្នុងឋានៈជាសមាជិក ស្មើភាពនិងស្មើសិទ្ធិ ក្នុងកម្រិតតំបន់ និងពិភពលោក។
លោក ពៅ ពិសិដ្ឋ មានប្រសាសន៍ទៀតថា ប្រការសំខាន់នោះ គឺទាមទារឲ្យមានការអភិវឌ្ឍធនធានមនុស្ស សំដៅលើការកសាងសមត្ថភាព ទាំងចំណេះដឹង ចំណេះធ្វើ សហគ្រិនភាពជំនាញ ការច្នៃប្រឌិត លើគ្រប់វិស័យ ពិសេសផ្នែកវិទ្យាសាស្ត្រ នឹងបច្ចេកវិទ្យា សមត្ថភាពស្រាវជ្រាវ របកគំហើញថ្មីៗ និងការអភិវឌ្ឍ ប្រកបដោយគុណភាព សមត្ថភាពនិងគុណធម៌ ដែលជាគន្លឹះ សម្រាប់ទ្រទ្រង់កំណើន សេដ្ឋកិច្ចជាតិ និងភាពប្រគួតប្រជែងរបស់ប្រទេស ទាំងពេលបច្ចុប្បន្ន និងសម្រាប់អនាគត ។
លោក ពៅ ពិសិដ្ឋ មានប្រសាសន៍យ៉ាងនេះ ក្នុងឱកាសរៀបចំការតាំងពិព័រណ៍ស្នាដៃសិស្ស នៅក្នុងបវិវេណវិទ្យាល័យ ហ៊ុន សែន វត្តស្វាយ កាលពីថ្ងៃទី ២៣ ខែកុម្ភៈ ឆ្នាំ២០១៩ ។
លោក ភិន សុវណ្ណរិទ្ធ នាយកវិទ្យាល័យ ហ៊ុន សែន វត្តស្វាយ បានឲ្យដឹងថា នេះជាឆ្នាំទី៣ហើយ ដែលសាលាបានរៀបចំកម្មវិធីនេះឡើង ក្នុងគោលបំណងសំខាន់គឺ បំផុស ជំរុញលើកទឹក ចិត្តសិស្សានុសិស្ស ឲ្យស្រឡាញ់ ចូលចិត្តអំពីវិទ្យាសាស្ត្រ បច្ចេកវិទ្យា ឆ្លើយតបទៅនឹងតម្រូវការចំពោះមុខ ក្នុងទិសដៅ អភិវឌ្ឍន៍សង្គម សេដ្ឋកិច្ច នាពេលបច្ចុប្បន្ន និងទៅអនាគត។
គួររំលឹកថា ក្នុងឆ្នាំសិក្សាកន្លងទៅ ក្រុមវិទ្យាសាស្ត្រវិស្វកម្មនៃវិទ្យាល័យហ៊ុនសែន វត្តស្វាយ ធ្លាប់បានទៅចូលរួមក្នុងកម្មវិធីនានា ដូចជា ការតាំងពិពរ័ណ៍ស្នាដៃវិទ្យាសាស្ត្រ ឬ Stem ប្រទេសម៉ាឡេស៊ី ចំនួន៤លើក , ការតាំងពិពរ័ណ៍ស្នាដៃអន្តរជាតិនៅខេត្តCheng quinng ប្រទេសចិនបានមួយលើក , ការតាំងពិព័រណ៍នៅសាលាតិចណូ៣លើក និងការចូលរួមការតាំងពិព័រណ៍ក្នុងសន្និបាតអប់រំប្រចាំខេត្តចំនួន៣លើក ៕
អត្ថបទ និង រូបថត : លោក ជា ស្រស់
កែសម្រួលអត្ថបទ : លោក លីវ សាន្ត
