នៅព្រឹកថ្ងៃទី១៤ ខែធ្នូ ឆ្នាំ២០២១ សិស្សមានជីវភាពខ្វះខាតចំនួន២០០នាក់ មកពីបណ្ដាក្រុងស្រុក ក្នុងខេត្តសៀមរាប ទទួលអំណោយកង់ ម្នាក់មួយគ្រឿង ក្រោមការឧបត្ថម្ភរបស់មូនិធិពិភពលោកដ៏ស្រស់ត្រកាល តាមរយៈអង្គការឡុតទុសវើល (Lotus World) សហការជាមួយមន្ទីរសង្គមកិច្ច អតីតយុទ្ធជន និងយុវនីតិសម្បទា ខេត្តសៀមរាប និងអង្គការដៃគូ ស្ថិតក្នុងភូមិជ័យ សង្កាត់ទឹកវិល ក្រុងសៀមរាប ខេត្តសៀម។
មានសង្ឃដីកាក្នុងឱកាសនោះ ព្រះភិក្ខុនី សាន់ មូន ប្រធានអង្គការឡុតទុសវើល បានរំលឹកថា សម្រាប់ខេត្តសៀមរាប ក្នុងរយៈពេល៥ឆ្នាំ ចាប់ពីឆ្នាំ២០១៦ មូលនិធិពិភពលោកដ៏ស្រស់ត្រកាល ដឹកនាំដោយ ព្រះតេជគុណ ឆង់ យ៉ បានជួយសាងសង់ផ្ទះចំនួន ៣ខ្នងជូនគ្រួសារក្រីក្រ និងឧបត្ថម្ភជាកង់សរុបជាង ១,៧០០គ្រឿង សម្រាប់ចែកជូនដល់សិស្សានុសិស្សមានជីវភាពខ្វះខាតក្នុងខេត្ត។ ជាគ្នានេះ គោលបំណងនៃអំណោយគិតមកដល់បច្ចុប្បន្ននេះ គឺដើម្បីលើកកម្ពស់ការសិក្សារបស់សិស្សចាប់ពីកម្រិតបឋមសិក្សា រហូតដល់មធ្យមសិក្សា ក៏ដូចជាជួយសម្រួលការធ្វើដំណើរ ចំពោះសិស្សដែលរស់នៅឆ្ងាយពីសាលារៀន។ ក្នុងនោះដែរ ការជ្រើសរើសសិស្សក្រីក្រនាពេលនេះ ទទួលបានការវាយតម្លៃពី មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត អង្គការឡុតទុសវើល និងអង្គការដៃគូមួយចំនួនទៀត។
ក្នុងនាមមន្ទីរជំនាញ លោក អោ ម៉ៅ ប្រធានមន្ទីរសង្គមកិច្ច អតីតយុទ្ធជន និងយុវនីតិសម្បទាខេត្ត លើកឡើងថា ដោយសារវិបត្តិសកលនៃជំងឺកូវីដ-១៩ ជីវភាពប្រជាពលរដ្ឋក្នុងខេត្ត រងផលប៉ះពាល់ជាបន្តបន្ទាប់ ជាមួយនោះសិស្សានុសិស្សរងផលប៉ះពាល់យ៉ាងខ្លាំង ដោយសារសាលារៀនត្រូវបានផ្អាកដំណើរការ។ ដោយមានការគិតគូរខ្ពស់ និងឈ្លាសវៃរបស់ប្រមុខរាជរដ្ឋាភិបាល សម្ដេចតេជោ ហ៊ុន សែន សម្រាប់ប្រជាពលរដ្ឋនៅទូទាំងប្រទេស ក៏ដូចជាខេត្តសៀមរាប កុមារមានអាយុចាប់ពី ៥ឆ្នាំ រហូតដល់មនុស្សពេញវ័យ បានទទួលការចាក់វ៉ាក់សាំងការពារជំងឺកូវីដ-១៩ ដោយឥតគិតថ្លៃ ក្នុងចំនួនអតិបរមា ដែលឈានទៅដល់ការបើកប្រទេស និងជំរុញឱ្យវិស័យនានានៅទូទាំងប្រទេស មានសកម្មភាពឡើងវិញ។
ឆ្លៀតក្នុងឱកាសនោះ លោក អោ ម៉ៅ ក៏បានថ្លែងអំណរគុណដល់អង្គការឡុតទុសវើល រួមនិងសប្បុរសជននានា ដែលបានចូលរួមយ៉ាងសកម្មជាមួយរាជរដ្ឋាភិបាល ក្នុងការជួយលើកកម្ពស់ជីវភាពប្រជាពលរដ្ឋ និងការអប់រំរបស់សិស្សានុសិស្សក្នុងខេត្តសៀមរាប។
គួរជម្រាបថា សកម្មភាពមនុស្សធម៌របស់អង្គការឡុតទុសវើល ផ្ដោតទៅលើ ការចិញ្ចឹមកុមារនៅក្នុងមណ្ឌល បណ្តុះបណ្តាលកុមារក្នុងសហគមន៌និងផ្តល់ស្បៀងជាប្រចាំដល់កុមារក្រីក្រក្នុងសហគមន៌គោលដៅ សាងសង់លំនៅឋាន បណ្ណាល័យ សាលារៀន និង សហការជាមួយមូលនិធិពិភពលោកដ៏ស្រស់ត្រកាល ចែកកង់ជូនសិស្សក្រីក្រជារៀងរាល់ឆ្នាំ។
រូបភាព និងអត្ថបទ៖ លោក សេង ផល្លី