សៀមរាប៖ នៅព្រឹកថ្ងៃទី១៤ ខែធ្នូ ឆ្នាំ២០២១នេះ មន្ទីរទំនាក់ទំនងជាមួយរដ្ឋសភា ព្រឹទ្ធសភា និងអធិការកិច្ចខេត្តសៀមរាប បានរៀបចំពិធីផ្សព្វផ្សាយច្បាប់ ក្នុងគោលបំណង ដើម្បីបង្កើនការយល់ដឹងអំពីច្បាប់ និងសិទ្ធិ របស់ខ្លួន នៃការកាត់បន្ថយបទល្មើស ធានាបាននូវការការពារសិទ្ធិនៃកម្មសិទ្ធ និងសិទ្ធិផ្សេងៗទៀតលើអចលនវត្ថុ ដើម្បីរួមចំណែកក្នុងការលើកកម្ពស់សន្តិសុខ សុវត្ថិភាព និងសុខុមាលភាពសង្គម ព្រមទាំងធ្វើឲ្យជីវភាពរស់នៅរបស់ប្រជាពលរដ្ឋក្នុងសហគមន៍ឲ្យបានល្អប្រសើរថែមទៀត។ កម្មវិធីនេះ បានប្រព្រឹត្តិទៅ ដោយមានវត្តមានលោក ម៉ក់ ប្រុស អភិបាលស្រុកសូទ្រនិគម ប្រធានមន្ទីរ អង្គភាពពាក់ព័ន្ធ ជុំវិញខេត្ត និងប្រជាពលរដ្ឋ សិស្សានុសិស្សប្រមាណជាង២០០នាក់ បានចូលរួម។
លោក ម៉ក់ ប្រុស អភិបាលស្រុកសូទ្រនិគម បានជម្រុញឲ្យបងប្អូនប្រជាពលរដ្ឋ មកចូលរួមស្តាប់នៅក្នុងកម្មវិធីផ្សព្វផ្សាយច្បាប់នេះ ដែលមានគោលដៅកំណត់អំពីរបបកម្មសិទ្ធិលើអចលនវត្ថុទាំងឡាយនៅក្នុងព្រះរាជាណាចក្រកម្ពុជា ក្នុងគោលបំណងធានាបាននូវការការពារសិទ្ធិនៃកម្មសិទ្ធិ និងសិទ្ធិផ្សេងៗទៀតលើអចលនវត្ថុស្របតាមបទប្បញ្ញត្តិនៃរដ្ឋធម្មនុញ្ញឆ្នាំ ១៩៩៣ នៃព្រះរាជាណាចក្រកម្ពុជាឲ្យច្រើន ដើម្បីទទួលបានក្នុងការយល់ដឹងអំពីច្បាប់ឲ្យបានទូលំទូលាយជាងនេះទៅទៀត។ លោក បានបន្តថា ការផ្សព្វផ្សាយច្បាប់នេះ វាមានសារ:សំខាន់ខ្លាំងណាស់សម្រាប់ប្រជាពលរដ្ឋទូទៅនៅក្នុងខេត្តសៀមរាប ក៏ដូចជាព្រះរាជាណាចក្រកម្ពុជាដែរ។ បច្ចុប្បន្ននេះ ប្រជាពលរដ្ឋរស់នៅត្រូវមានច្បាប់ជាគោលទៅលើការគ្រប់គ្រងដីធ្លីដែលអាចនាំឱ្យយើងទទួលបានកម្មសិទ្ធិស្របច្បាប់ជាចាំបាច់ ។
លោក ស៊ុន សុជាតិ អនុប្រធានមន្ទីររៀបចំដែនដីនគរូបនីយកម្មសំណង់ និងសុរិយោដីខេត្ត បានលើកឡើងថា ពាក់ព័ន្ធដីធ្លីកន្លងមក ដែលប្រជាបលរដ្ឋបានអាស្រ័យផលនោះ រដ្ឋក៏អាចផ្ដល់កម្មសិទ្ធិនៃទ្រព្យជាអចលនវត្ថុ ដែលជារបស់រដ្ឋក្នុងព្រំដែនជាក់លាក់ដែលបានកំណត់ដោយច្បាប់នេះ ដល់រូបវន្តបុគ្គលឬនីតិបុគ្គលដែលមានសញ្ជាតិជាខ្មែរ ។ រាល់ការផ្ទេរឬផ្លាស់ប្តូរសិទ្ធិនៃកម្មសិទ្ធិត្រូវធ្វើឡើងតាមវិធាននៃនីតិរួមនការលក់ ការបន្ត មរតក ការដូរ ឬប្រទានកម្ម ឬតាមសេចក្តីសំរេចរបស់តុលាការ ។
លោក បានបញ្ជាក់ទៀតថា យើងចាត់ទុកជាអចលនវត្ថុ តាមបែបនៃច្បាប់នេះ ដែលមានអចលនវត្ថុពីកំណើត អចលនវត្ថុពីភ័ព្វវាសនានិងអចលនវត្តតាមការកំណត់របស់ច្បាប់។ អចលនវត្ថុពីកំណើតមានដីធម្មជាតិដូចជា៖ ដីព្រៃឈើ ដីកាប់រាន ដីដាំដុះ ដីទុកទំនេរ ឬមិនអាចដាំដុះបានដូចជា៖ ដីលិចទឹកដោយទឹកនៅនឹងឬទឹកហូរ និងសំណង់ឬការរៀបចំទាំងឡាយដែលស្ថិតនៅជាប់មួយកន្លែងដែលកើតឡើងដោយអំពើរបស់មនុស្ស ហើយមិនអាចរំកិល ឬផ្លាស់ប្ដូរកន្លែងបាន ។
អចលនវត្ថុពីភ័ព្វវាសនាមានវត្ថុដែលជាប់នឹងដី ឬបញ្ចូលជាមួយសំណង់ទាំងឡាយដែលមិនអាចបំបែកចេញបានដោយមិនធ្វើឱ្យមានការខូចខាត ឬមិនដូរសភាពដើមដូចជា ដើមឈើ ឧបករណ៍តែងលំអជាដើម ។ គ្មានបុគ្គលណាមួយត្រូវបានគេដកហូតកម្មសិទ្ធិរបស់ខ្លួនបានទេ ប្រសិនបើការដកហូតនេះ៖ មិនមែនដើម្បីប្រយោជន៍សាធារណៈ ការដកហូតត្រូវធ្វើទៅតាមទម្រង់ និងនីតិវិធីបញ្ញត្តិដោយ ច្បាប់ និងបទបញ្ជា បន្ទាប់ពីបានផ្តល់សំណងជាមុនដោយសមរម្យ និងយុត្តិធម៌៕
អត្ថបទ និង វីដេអូ៖ លោក ស៊ាន សុផាត
