សៀមរាប៖ មន្ត្រីជាន់ខ្ពស់នៃរាជរដ្ឋាភិបាលកម្ពុជា បានលើកឡើងថា បើទោះបីជាបច្ចុប្បន្ន រាជរដ្ឋាភិបាលបានខិតខំយកចិត្តទុកដាក់ បង្កើតនូវយន្តការជាច្រើនក្នុងការគ្រប់គ្រង និងផ្តល់សេវាដល់មុខសញ្ញាកុមារទូទៅ និងកុមាររងគ្រោះយ៉ាងណាក៏ដោយ ក៏នៅមានកុមារមួយចំនួនកំពុងរស់នៅក្នុងស្ថានភាពលំបាក រងគ្រោះ ដែលត្រូវការការគាំទ្រ និងអន្តរាគមន៍ បន្ថែមទៀតជាចាំបាច់។
ថ្លែងនៅក្នុងពិធីបើកកិច្ចប្រជុំប្រចាំឆ្នាំ របស់ក្រុមប្រឹក្សាជាតិកម្ពុជាដើម្បីកុមារ នាព្រឹកថ្ងៃទី១៤ ខែធ្នូ ឆ្នាំ២០២១ នៅក្រុងសៀមរាប ឯកឧត្តម វង សូត រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា បានលើកឡើងថា បន្ទាប់ពីកម្ពុជាបានផ្តល់សច្ចាប័នលើអនុសញ្ញាស្តីពីសិទ្ធិកុមារ នៅឆ្នាំ១៩៩២មក រាជរដ្ឋាភិបាលកម្ពុជា បានបង្កើតគោលនយោបាយ ច្បាប់ ផែនការ យុទ្ធសាស្ត្រ ផែនការសកម្មភាពជាតិ យន្តការថ្នាក់ជាតិ និងក្រោមជាតិជាច្រើន ដើម្បីសម្របសម្រួល និងពិនិត្យតាមដានវឌ្ឍនភាព និងបញ្ហាប្រឈមទៅ លើកុមារ ដើម្បីធានាថាកុមារត្រូវបានការពារដោយច្បាប់ និងលិខិតបទដ្ឋាន គតិយុត្តនានាដែលបាននិងកំពុងអនុវត្តជាធរមាន។
ជាមួយគ្នានេះដែរ រាជរដ្ឋាភិបាលបានដាក់ចេញនូវគោលនយោបាយជាតិស្តីពីប្រព័ន្ធកិច្ច ការពារកុមារ ដោយផ្តោតលើសសរស្តម្ភជាយុទ្ធសាស្ត្រសំខាន់ៗចំនួន ៣ គឺ (១).ការបង្ការទប់ស្កាត់ (២).ការអន្តរាគមន៍ (៣).ការផ្តល់សេវាឆ្លើយតប ដែលសសរស្ដម្ភនីមួយៗបានកំណត់នូវសកម្មភាពជាក់លាក់សម្រាប់ក្រសួង ស្ថាប័នពាក់ព័ន្ធ ដែលបំពេញការងារក្នុងការលើកកម្ពស់សិទ្ធិកុមារ យក ទៅអនុវត្តប្រកបដោយប្រសិទ្ធភាព និងទទួលបានជោគជ័យ ឆ្លើយតបនឹង ការប្តេជ្ញាចិត្តរបស់រាជរដ្ឋាភិបាល ក្នុងការអនុវត្តកិច្ចការពារកុមារ ដែលមាន លក្ខណៈជាប្រព័ន្ធនៅកម្ពុជា។
ទន្ទឹមនឹងការដាក់ចេញនូវវិធានការខាងលើនោះ រាជរដ្ឋាភិបាលក៏ បានដាក់ចេញនូវកម្មវិធីជំនួយសង្គម ក្នុងគោលដៅជួយសម្រួលការ លំបាកផ្នែកជីវភាពក្នុងស្ថានភាពនៃការរីករាលដាលជំងឺកូវីដ-១៩ ក៏ដូចជា ការគិតគូរពីសុខទុក្ខប្រជាជន ពិសេសកុមារ និងប្រជាជនក្រីក្រក្នុងការ ដោះស្រាយបញ្ហាប្រឈមនានា តាមរយៈកម្មវិធីឧបត្ថម្ភសាច់ប្រាក់ចំនួន ០៣ រយមមាន កម្មវិធីឧបត្ថម្ភសាច់ប្រាក់ជូនស្ត្រីមានផ្ទៃពោះ និងកុមារអាយុ ក្រោម ២ឆ្នាំ ដែលបានអនុវត្តក្នុងខែមិថុនា ឆ្នាំ២០១៩ មកទល់ពេលនេះ ស្ត្រីមានផ្ទៃពោះ និងកុមារប្រមាណជាង ២៤ ម៉ឺននាក់ បានទទួលសេវានេះ ។
២- កម្មវិធីឧបត្ថម្ភសាច់ប្រាក់ជូនគ្រួសារក្រីក្រ និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ បានប្រកាសដាក់ឱ្យអនុវត្តនៅថ្ងៃ ទី២៤ ខែមិថុនា ឆ្នាំ២០២០ មកទល់ពេលនេះ មានអ្នកទទួលផលជាង ៧៤ ម៉ឺនគ្រួសារ ។
៣- កម្មវិធីជំនួយសង្គមជាសាច់ប្រាក់ក្រោយពេលបិទខ្ទប់សម្រាប់ ប្រជាពលរដ្ឋ និងគ្រួសារប្រជាពលរដ្ឋមានការលំបាកផ្នែកជីវភាព ប្រជាពលរដ្ឋ និងគ្រួសារប្រជាពលរដ្ឋដែលមានអ្នកឆ្លង និងស្លាប់ដោយជំងឺ កូវីដ-១៩ ដោយបានចំណាយថវិកាសរុបចំនួន ៣២ ពាន់លានរៀល។
ឯកឧត្តមបន្តថា ទោះបីមានការយកចិត្តទុកដាក់ពីរាជរដ្ឋាភិបាល ដោយបានបង្កើត នូវយន្តការជាច្រើនក្នុងការគ្រប់គ្រង និងផ្តល់សេវាដល់មុខសញ្ញាកុមារទូទៅ និងកុមាររងគ្រោះយ៉ាងណាក៏ដោយ ក៏នៅមានកុមារមួយចំនួនកំពុងរស់នៅក្នុងស្ថានភាពលំបាក រងគ្រោះ ដែលត្រូវការការគាំទ្រ និងអន្តរាគមន៍ បន្ថែមទៀតជាចាំបាច់។ បច្ចុប្បន្ន ការអន្តរាគមន៍ចំពោះកុមាររងគ្រោះ របស់យើងនៅមានលក្ខណៈដាច់ដោយដុំ មិនទាន់មានក្របខ័ណ្ឌការងារ និង ប្រព័ន្ធគ្រប់គ្រងច្បាស់លាស់នៅឡើយ ដែលទាមទារធ្វើការកែលម្អ និងបន្ស៊ី គ្នាដើម្បីឱ្យក្លាយជាយន្តការគ្រប់គ្រងច្បាស់លាស់ សំដៅផ្លាស់ប្តូរព័ត៌មាន និងមានវិធានការទាន់ពេលវេលា សមស្របតាមគោលនយោបាយជាតិ ស្តីពីប្រព័ន្ធកិច្ចការពារកុមារដែលបានគ្រោងទុក។
ករណីនេះ ក្នុងនាមជាប្រធានក្រុមប្រឹក្សាជាតិកម្ពុជាដើម្បីកុមារ ផងដែរនោះ ឯកឧត្តម វង សូត្រ បានយល់ថា ដើម្បីដោះស្រាយបញ្ហាកិច្ចការពារកុមារពី ការរំលោភបំពានគ្រប់រូបភាពស្របទៅតាមបទដ្ឋានជាតិ អន្តរជាតិឱ្យបាន កាន់តែប្រសើរនោះ ទាមទារឱ្យមានការចូលរួមពីគ្រប់ក្រសួង ស្ថាប័ន អង្គការជាតិ អន្តរជាតិ និងដៃគូពាក់ព័ន្ធទាំងអស់ រួមគ្នាដោះស្រាយតាម មុខសញ្ញានីមួយៗប្រកបដោយស្មារតីទទួលខុសត្រូវ ជាពិសេស រួមគ្នា ជំរុញការអនុវត្តគោលនយោបាយជាតិស្តីពីប្រព័ន្ធកិច្ចការពារកុមារ និង ផែនការសកម្មភាពឱ្យទទួលបានជោគជ័យ ក្នុងពាក្យស្លោក “ធ្វើសកម្មភាព ផ្សេងៗគ្នា ដើម្បីឆ្ពោះទៅសម្រេចគោលបំណងរួមតែមួយ”៕
អត្ថបទនិង វីដេអូ ៖ លោក ជា ស្រស់ និង លោក ឈិត សាវី
