កិច្ចប្រជុំផ្សព្វផ្សាយសេចក្តីសម្រេចរបស់ក្រសួងសុខាភិបាល ស្តីពីនីតិវិធីប្រតិបត្តិស្តង់ដារ (SOPs) ដើម្បីគ្រប់គ្រងអ្នកដំណើរមកដល់អាកាសយានដ្ឋាន អន្តរជាតិនៅកម្ពុជា ដោយអនុលោមតាមការរស់នៅតាមគន្លងប្រក្រតីភាពថ្មីក្នុងបរិបទ នៃជំងឺកូវីដ-១៩ ដែលជាឧបសម្ព័ន្ធនៃសេចក្តីសម្រេច។ ការដាក់ឱ្យប្រើនីតិវិធីប្រតិបត្តិស្តង់ដារ (SOPs) ដើម្បីគ្រប់គ្រងអ្នកដំណើរ ដែលមកដល់អាកាសយានដ្ឋានអន្តរជាតិនៅកម្ពុជា ខណ:ដែលរាជរដ្ឋាភិបាលកម្ពុជា ត្រៀមបើកព្រំដែនប្រទេសឡើងវិញ ក្នុងការទទួលភ្ញៀវទេសចរវ៉ាក់សាំពេញលេញនៅដើមខែមករា ឆ្នាំ២០២២ខាងមុខ។ កិច្ចប្រជុំនេះធ្វើឡើង នារសៀលថ្ងៃទី១៥ ខែធ្នូ ឆ្នាំ២០២១ នៅសាលប្រជុំធំ សាលាខេត្តសៀមរាប។
លោក ពៅ ពិសិដ្ធ អភិបាលរងខេត្តសៀមរាប មានប្រសាសន៍ថា រដ្ឋបាលខេត្ត បានត្រៀមលក្ខណៈក្នុងការទទួលភ្ញៀវទេសចរវ៉ាក់សាំងនេះប្រកបដោយការគិតគូរខ្ពស់ ក្នុងនោះរដ្ឋបាលខេត្តបានបើកការប្រជុំក្រុមការងារ និងចុះត្រួតពិនិត្យជាក់ស្តែងនៅអាកាសយានដ្ឋានអន្តរជាតិសៀមរាបច្រើនរួចមកហើយ។ ដើម្បីធានាឱ្យមានសន្តិភាព ក្នុងការគ្រប់គ្រងអ្នកដំណើរដែលមកដល់អាកាសយានដ្ឋានអន្តរជាតិ នៅក្នុងព្រះរាជាណាចក្រកម្ពុជានាពេលខាងមុខនេះ និងយោងតាមសេចក្តីសម្រេចលេខ៥០៤សខល ចុះថ្ងៃទី១៦ ខែវិច្ឆិកា ឆ្នាំ២០២១ ស្តីពីការកែសម្រួលលក្ខខណ្ឌធ្វើដំណើរ ការអនុវត្តវិធានការសុខាភិបាល និងការធ្វើចត្តាឡីស័ក នៅកម្ពុជាសម្រាប់អ្នកដំណើរចូលមកកម្ពុជា ស្របតាមគន្លងប្រក្រតីភាពថ្មី ក្រុមការងារបច្ចេកទេសក្រសួងសុខាភិបាល សហការជាមួយក្រុមការងារអនុគណ:កម្មការគ្រប់គ្រងច្រកទ្វារចេញ-ចូលប្រទេស និងការធ្វើចត្តាឡីស័ក និងអនុគណ:កម្មការបច្ចេកទេស និងព្យាបាល ព្រមទាំងអនុគណ:កម្មការពាក់ព័ន្ធ បានរៀបចំជានីតិវិធីប្រតិបត្តិស្តង់ដានេះឡើង ដើម្បីដាក់ឱ្យអនុវត្ត។
លោក បន្តថា មន្ត្រីអាកាសចរណ៍ស៊ីវិល ត្រូវប្រមូល និងផ្ដល់ព័ត៌មានជើងហោះហើរ និងទិន្នន័យអ្នកដំណើរ (Flight Manifest) ដល់ផ្នែកពាក់ព័ន្ធនោះ ដើម្បីឲ្យក្រុមការងារអាចត្រៀមចាត់ចែងក្រុមគ្រូពេទ្យយកសំណាក ដើម្បីធ្វើតេស្ដរហ័សរកអង់ទីហ្សែនកូវីដ-១៩ រថយន្តសម្រាប់ដឹកអ្នកដំណើរដែលគ្មានប័ណ្ណ ឬវិញ្ញាបនបត្រចាក់វ៉ាក់សាំងកូវីដ-១៩ បញ្ជាក់ពីការចាក់វ៉ាក់សាំងកូវីដ-១៩ ពេញលេញទៅកាន់កន្លែងធ្វើចត្តាឡីស័ក ដែលបានកំណត់ ដោយក្រសួងសុខាភិបាល ឬអាជ្ញាធរមានសមត្ថកិច្ចជាដើម។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប បានលើកឡើងថា ចំពោះអ្នកដំណើរត្រូវតែត្រៀមរួចជាស្រេចនូវឯកសារ ដើម្បីបង្ហាញដល់អាជ្ញាធរពាក់ព័ន្ធ។ សម្រាប់អ្នកដំណើរជាជនជាតិខ្មែរ និងជនបរទេសដែលមានលិខិតឆ្លងដែនបណ្ណ ឬវិញ្ញាបនបត្រចាក់វ៉ាក់សាំងកូវីដ-១៩ ដែលបញ្ជាក់ពីការចាក់វ៉ាក់សាំងកូរីដ-១៩ ពេញលេញហើយ ឬវិញ្ញាបនបត្របញ្ជាក់ថាគ្មានជំងឺកូវីដ-១៩ (តេស្ត PCR) ក្នុងរយ:ពេល ៧២ម៉ោង មុនពេលមកដល់កម្ពុជា ដែលត្រូវបានទទួលស្គាល់ដោយអាជ្ញាធរសុខាភិបាល នៃប្រទេសសាមីខ្លួន ឬប្រទេសសំណាក់ចុងក្រោយ មុនចាកចេញមកកាន់កម្ពុជា គឺត្រូវមានសេចក្តីប្រកាសសុខភាពរបស់អ្នកដំណើរជាមុន (Health Declaration of Travelers) សលាកប័ត្រចូល-ចេញ (Arrival / Departure Card) លិខិតរាយការណ៍របស់គយ (Customs Declaration) ឯកសារពាក់ព័ន្ធផ្សេងទៀត ដែលតម្រូវដោយអាជ្ញាធរកម្ពុជាជាដើម។
លោកវេជ្ជបណ្ឌិត បន្ថែមថា លើសពីនេះ អ្នកដំណើរជាជនបរទេសត្រូវបានលើកទឹកចិត្តឱ្យមានបណ្ណសន្យារ៉ាប់រងសុខភាពសម្រាប់ព្យាបាលជំងឺកូវីដ-១៩ (COVID-19 Health Insurance Policy) ដែលនៅកម្ពុជា អាចទិញពីការធានារ៉ាប់រងរួមគ្នា (Insurance consortium) តំណាងដោយក្រុមហ៊ុនធានារ៉ាប់រងហ្វតតេ តាមរយៈគេហទំព័រ https://www.forteinsurance.com/covid 19-insurance/ ឯកសារកក់សណ្ឋាគារសម្រាប់ការធ្វើចត្តាឡីស័ក រយ:ពេល ១៤ថ្ងៃ (សម្រាប់អ្នកដំណើរជា ជនបរទេស មិនបានចាក់វ៉ាក់សាំងកូដ-១៩ ពេញលេញ) ក្នុងដំណើរការនៃការបើកព្រំដែនឡើងវិញរបស់កម្ពុជា ប្រព័ន្ធបណ្ណធ្វើដំណើរឌីជីថល (Digital Travel Pass) អាចនឹងត្រូវបានរៀបចំ និងដាក់ឱ្យដំណើរការ សម្រាប់ធ្វើការផ្លាស់ប្ដូរ ក្នុងក្របខណ្ឌយន្តការអន្តរជាតិ ឬ ទ្វេរភាគី និងផ្តល់ភាពងាយស្រួលដល់អ្នកដំណើរទាំងជនជាតិខ្មែរ និងបរទេស៕
អត្ថបទ និងរូបភាព៖ លោក ស៊ាន សុផាត
កែសម្រួល៖ លីវ សុខុន
