ប្រជាពលរដ្ឋរស់នៅសង្កាត់ក្របីរៀល ក្រុងសៀមរាប ជិត៣០០នាក់ បានធ្វើទស្សនាកិច្ចមើលការតាំងពិពណ៌ ស្តីពីការអភិវឌ្ឍ និងសមិទ្ធផលការងារនានា ក្នុងរមណីយដ្ឋានអង្គរ។ គោលបំណងសំខាន់ គឺដើម្បីសិក្សាស្វែងយល់ និងបានឃើញពីការរៀបចំ ការអភិវឌ្ឍ ព្រមទាំងបានឃើញសមិទ្ធផលការងារនានា ដែលបានរៀបចំឡើងដោយអាជ្ញាធរជាតិអប្សរា។ ការធ្វើទស្សនាកិច្ចនេះ គឺស្របពេលដែលអាជ្ញាធរជាតិអប្សរា កំពុងរៀបចំព្រឹត្តិការណ៍រំលឹកគុណអង្គរ ដែលមានរយ:ពេលបីថ្ងៃ ពីថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២១។
អ្នកស្រី វន់ ស្រីរ័ត្ន ពលរដ្ឋរស់នៅសង្កាត់ក្របីរៀល បានបង្ហាញការពេញចិត្តជាខ្លាំង ចំពោះការអភិវឌ្ឍរបស់អាជ្ញាធរជាតិអប្សរា ដូចជាផ្លូវថ្នល់ សួនច្បារ និងស្ដង់លក់ដូរជាដើម។ល។ អ្នកស្រីថា ការរៀបចំនេះពិតជាស្អាតប្លែកយ៉ាងខ្លាំង ដែលធ្វើឱ្យអ្នកស្រីចម្លែកចិត្ត ដែលខុសប្លែកពីពេលមុនៗ។ លើសពីនេះ អ្នកស្រី វន់ ស្រីរ័ត្ន បានកោតសរសើរចំពោះសមិទ្ធផលនានា ដែលរៀបចំឡើងដោយអាជ្ញាធរជាតិអប្សរា ដើម្បីឱ្យប្រជាពលរដ្ឋជិតឆ្ងាយ មកទស្សនារមណីយដ្ឋានអង្គរឱ្យបានគ្រប់ៗគ្នាផងដែរ។
ចំណែកលោក ឌូ នាម មេភូមិប្រម៉ា សង្កាត់ក្របីរៀល ក៏បានកោតសរសើរ និងត្រេតអរក្រៃលែងចំពោះសមិទ្ធផលនានាក្នុងរមណីយដ្ឋានអង្គរនេះ។ លោកមេភូមិបានប្រៀបធៀបពីមុនដែលលោកធ្លាប់មកលេង គឺផ្លូវមិនសូវល្អ អ្នកលក់ដូរគ្មានសណ្ដាប់ធ្នាប់។ល។ តែបច្ចុប្បន្ន អាជ្ញាធរជាតិអប្សរា រៀបចំបានល្អ ទាំងផ្លូវថ្នល់ សួនច្បារ និងស្ដង់លក់ដូរ ក៏ដូចជាកិច្ចការអភិរក្សជួសជុលប្រាសាទជាដើម។ ជាមួយនឹងស្ដង់ពិព័រណ៍សមិទ្ធផលការងារប្រចាំឆ្នាំរបស់អាជ្ញាធរជាតិអប្សរា លោក ឌូ នាម យល់ឃើញថា បង្កការងាយស្រួលដល់លោក និងពលរដ្ឋដទៃទៀត អាចដឹងពីសមិទ្ធផលជាច្រើនរបស់អាជ្ញាធរជាតិអប្សរា ដូចជាការជួសជុលប្រាសាទ និងប្រភេទដើមឈើមួយចំនួនដែលមានក្នុងឧទ្យានជាតិនេះជាដើម។ល។
ជាមួយគ្នានេះ លោកមេភូមិ សំណូមពរឱ្យប្រជាពលរដ្ឋទាំងអស់ ដែលមកទស្សនារមណីយដ្ឋានអង្គរ ត្រូវចូលរួមថែរក្សា ដោយមិនត្រូវប៉ះពាល់ថ្ម ឬដើមឈើ និងជួយត្រូវថែរក្សាអនាម័យ បរិស្ថាន ឱ្យបានគ្រប់ៗគ្នា ដើម្បីផលប្រយោជន៍សង្គមជាតិយើង៕
អត្ថបទ និងរូបភាព៖ លោក បូ សាវី
កែសម្រួល៖ លីវ សុខុន
