ដើម្បីចូលរួមអបអរសាទរទិវាជាតិសុខភាពមាតា ទារក និងកុមារ នៅព្រឹកថ្ងៃទី ២៦ ខែ កុម្ភះ ឆ្នាំ ២០១៩ គណៈប្រតិភូ គណៈកម្មាធិការសាខាកាកបាទក្រហមកម្ពុជាខេត្តសៀមរាប ដឹកនាំដោយ លោកជំទាវ ទាង អេង ទៀ សីហា អនុប្រធានគណៈកម្មាធិការ សាខា និងលោកជំទាវជាសហការី បានអញ្ជើញចុះជួបសំណេះសំណាលសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហមកម្ពុជា ខេត្តសៀមរាប ផ្ដល់ជូនមាតា ដែលទើបនឹងសម្រាលកូនតូច ចំនួន ៥៩នាក់ នៅមណ្ឌលសុខភាពព្រៃជ្រូក និង សសរស្តម្ភ ស្រុកពួក ខេត្តសៀមរាប ក្នុងគោល បំណងលើកកម្ពស់ និង យកចិត្តទុកដាក់ចំពោះសុខភាពមាតា ទារក និងកុមារ។
តាមសេចក្តីរាយការណ៍របស់ប្រធានមណ្ឌលសុខភាពទាំងពីរ បានបង្ហាញថា ក្រោយពីការផ្សព្វផ្សាយរបស់រាជរដ្ឋាភិបាល និង ក្រសួង សុខាភិបាល ក៏ដូចការណែនាំផ្ទាល់របស់ក្រុមគ្រូពេទ្យ ក៏ដូចអាជ្ញាធរមូលដ្ឋាន បានធ្វើឱ្យបងប្អូនប្រជាពលរដ្ឋ កាន់តែបានយល់ដឹង ច្បាស់ និង ចូលមកទទួលសេវាព្យាបាល នៅតាមមណ្ឌលសុខភាព សំខាន់បានចូលមកធ្វើការពិនិត្យផ្ទៃពោះ ពិគ្រោះជម្ងឺទូទៅ និង ទទួលការចាក់វ៉ាក់សាំង និង សម្រាលកូននៅក្នុងមណ្ឌលសុខភាព មានចំនួនកើនឡើង ហើយបច្ចុប្បន្នប្រជាពលរដ្ឋមានផ្ទៃពោះ មិនបានបង្កើតកូនដោយឆ្មបបុរាណតាមភូមិទៀតឡើយ ដោយពួកគាត់បានយល់ច្បាស់គ្រប់ៗគ្នា ។
បន្ទាប់ពីមានការផ្សព្វផ្សាយ និងគោលនយោបាយគាំទ្រ ដល់សុខុមាលប្រជាពលរដ្ឋ នៅតាមមូលដ្ឋាន របស់រាជរដ្ឋាភិបាល និងក្រសួងសុខាភិបាល ក្រុមគ្រូពេទ្យ ក៏ដូចអាជ្ញាធរមូលដ្ឋាន បានធ្វើការផ្សព្វផ្សាយយ៉ាងទូលំទូលាយ ទៅដល់ប្រជាពលរដ្ឋ ជាពិសេសស្ត្រីមានផ្ទៃពោះ នៅក្នុងតំបន់នេះ ឲ្យមានការយល់ដឹង និងបានមកពិនិត្យផ្ទៃពោះ ពិគ្រោះជម្ងឺទូទៅ ទទួលការចាក់វ៉ាក់សាំង មុនសម្រាលទារក និង សម្រាលកូននៅក្នុងមណ្ឌលសុខភាព ដែលនាំមាតា និងទារកធានាបានសុវត្ថិភាពខ្ពស់ក្នុងពេលសម្រាល និងក្រោយពេលសម្រាល។
មានប្រសាសន៍សំណេះសំណាល ជាមួយបងប្អូនស្ត្រីទាំងពីរមណ្ឌលសុខភាពនោះ លោកជំទាវ ទាង អេង ទៀ សីហា ក៏បាន ធ្វើការកោតសរសើរពីកិច្ចខិតខំប្រឹងប្រែងរបស់ក្រុមគ្រូពេទ្យ ក្នុងការបម្រើសេវាព្យាបាលជម្ងឺទូទៅជូនប្រជាពលរដ្ឋក្នុងមូលដ្ឋាន ជាពិសេសការសម្រាលទារក នៅក្នុងមណ្ឌលសុខភាព ធានាបានសុវត្ថិភាពខ្ពស់ ដែលធ្វើឲ្យប្រជាពលរដ្ឋ មានទំនុកចិត្តជឿជាក់លើសេវាសុខាភិបាលជាតិ ។
ឆ្លៀតក្នុងឱកាសនោះ លោកជំទាវ ទាង អេង ទៀ សីហា បានជម្រាបជូននូវអនុសាសន៍៥ចំណុច របស់សម្ដេចកិត្តិព្រឹទ្ធបណ្ឌិត ប៊ុនរានី ហ៊ុន សែន ប្រធានកាកបាទក្រហមកម្ពុជា ជូនដល់បងប្អូនស្ត្រីយល់ដឹង ដើម្បីទទួលបានសុវត្ថិភាពមុននិងក្រោយសម្រាល៖
១. សូមឲ្យស្ដ្រីមានគភ៌ទាំងអស់ អញ្ជើញទៅពិនិត្យសុខភាព ពិគ្រោះយោបល់ជាមួយគ្រូពេទ្យ ឆ្មបជំនាញ នៅមណ្ឌលសុខភាព ឬមន្ទីរពេទ្យដែលនៅជិះផ្ទះ តាមកាលកំណត់
និងទទួលយកសេវាបង្ការ ព្យាបាលទាំងអស់ ឲ្យបានទៀងទាត់តាមការណែនាំ របស់គ្រូពេទ្យជំនាញ ។
២. សូមទៅសម្រាលកូន នៅមណ្ឌលសុខភាព ឬមន្ទីរពេទ្យ ដែលមានគ្រូពេទ្យឆ្មបជំនាញ ទទួលការបណ្ដុះបណ្ដាលត្រឹមត្រូវ។
៣. សូមអញ្ជើញទៅពិនិត្យសុខភាព ក្រោយពេលសម្រាល ទាំងមាតា និងទារក និងទទួលថ្នាំបង្ការចំនួន១១មុខ តាមការណែនាំ និងការកំណត់របស់គ្រូពេទ្យ ។
៤. សូមបំបៅទារកដោយទឹកដោះម្ដាយ តែមួយមុខគត់ ចាប់ពីពេលទារកប្រសូត្រភ្លាម រហូតដល់ទារកមានអាយុ៦ខែ និងផ្ដល់អាហារបន្ថែមគ្រប់មុខ គ្រប់ជីវជាតិ (បបរខាប់គ្រប់គ្រឿង)
រួមជាមួយនឹងការបំបៅទឹកដោះម្ដាយ រហូតដល់កុមារមានអាយុយ៉ាងតិច២ឆ្នាំ។
៥. សូមប្រញាប់យកទារកទៅមន្ទីរពេទ្យភ្លាម នៅពេលឃើញសញ្ញាគ្រោះថ្នាក់ណាមួយ នៃជំងឺរលាកផ្លូវដង្ហើម ជំងឺរាក ឬជំងឺឆ្លងដទៃទៀត និងយកទារក ឬកុមារតូចដែលមានរាងកាយស្គម ឬមិនឡើងទម្ងន់សោះ ទៅពិគ្រោះយោបល់ និងទទួលការព្យាបាល នៅមន្ទីរពេទ្យ។
ក្នុងដំណើរចុះសួរសុខទុក្ខនេះ លោកជំទាវបាននាំយកអំណោយមនុស្សធម៌ ជូនដល់មាតា ទើបនឹងសម្រាលទារករួចទាំង៥៩នាក់ ក្នុងនោះមណ្ឌលសុខភាពព្រៃជ្រូក ៣៤នាក់ មណ្ឌលសុខភាពសសរស្តម្ភ ២៥នាក់ ក្នុងម្នាក់ៗ ទទួលបាន ៖ មុង១, ភួយ១, សារុង១, ក្រម៉ា១, មី១កេស, ត្រីខ១យួរ, ទឹកដោះគោ០៣កំប៉ុង, ស្ករស០១គីឡូ, សាប៊ូក្រអូប ៣ដុំ និងថវិកាចំនួន ៥ ម៉ឺនរៀល ផងដែរ ៕
អត្ថបទ និង រូបថត : លោក ម៉ី សុខារិទ្ធ
កែសម្រួលអត្ថបទ : លោក សេង ផល្លី
