លោកស្រី SOM TIDAJAKRANG ប្រធានវិទ្យុជាតិខេត្តសុរិន្ទ និង ជាប្រធានក្រុមការងារវិទ្យុជាតិខេត្តសុរិន្ទ នៃព្រះរាជាណាចក្រថៃឡងដ៍ បានមានប្រសាសន៍ថា បន្ទាប់ពីបានដំណើរការផ្សាយរួមគ្នារវាងវិទ្យុជាតិខេត្តសុរិន្ទ នៃប្រទេសថៃ និង វិទ្យុFMជាតិប្រាសាទតាមាន់ ខេត្តឧត្ដរមានជ័យ អស់រយៈពេល៣ឆ្នាំកន្លងមកនេះ ដូច្នេះនៅក្នុងអំឡុងខែមីនា ឆ្នាំ២០១៩នេះ លោកស្រីនឹងរៀបចំឲ្យដំណើរការផ្សាយផ្ទាល់ជាមួយគ្នារវាងវិទ្យុជាតិខេត្តសុរិន្ទ នៃប្រទេសថៃ និងវិទ្យុFMជាតិនគរភ្នំខេត្តសៀមរាប នៃប្រទេសកម្ពុជា ព្រោះផ្អែកតាមការពិនិត្យទៅលើឧបករណ៍ និង សម្ភារដែលបម្រើឲ្យការងារផ្សាព្វផ្សាយរបស់វិទ្យុFMជាតិនគរភ្នំខេត្តសៀមរាប អាចកំណត់បានថា នឹងដំណើរការបានជាប្រក្រតី ប៉ុន្តែចំណុចសំខាន់ដែលត្រូវពិភាក្សារួមគ្នានោះ គឺអ្នកសម្របសម្រួលរបស់វិទ្យុFMជាតិនគរភ្នំ មិនទាន់មានអ្នកចេះភាសាថៃ ដើម្បីពន្យល់ ឬក៏អត្ថាធិប្បាយប្រាប់ប្រជាជនថៃ ឲ្យពួកគាត់បានយល់ដឹងពីអ្វីដែលយើងបាននឹងកំពុងផ្សាយ ។
លោកស្រី SOM TIDAJAKRANG មានប្រសាសន៍យ៉ាងនេះ ក្នុងឱកាសដឹកនាំក្រុមការងារ ចូលជួបសំណេះសំណាល និង ពិភាក្សាការងារជាមួយថ្នាក់ដឹកនាំមន្ទីរព័ត៌មានខេត្តសៀមរាប នាព្រឹកថ្ងៃទី២៦ ខែកុម្ភៈ ឆ្នាំ២០១៩ ព្រឹកមិញនេះ នៅ មន្ទីរព័ត៌មានខេត្តសៀមរាប ។
លោកស្រី SOM TIDAJAKRANG មានប្រសាសន៍ទៀតថា ក្នុងដំណើរទស្សកិច្ចមកកាន់ខេត្តសៀមរាបនាពេលនេះ ទាំងរូបលោកស្រី និង ក្រុមការងារទាំងអស់នៃវិទ្យុជាតិខេត្តសុរិន្ទ ពិតជាសប្បាយរីករាយខ្លាំងណាស់ ចំពោះបដិសណ្ឋាកិច្ចរបស់ថ្នាក់ដឹកនាំ និងមន្ត្រីរាជការនៃមន្ទីរព័ត៌មានខេត្តសៀមរាប ពិសេសការរីកចម្រើនរបស់ខេត្តសៀមរាបនិយាយរួម និង និយាយដោយឡែក ការរីកចម្រើនរបស់ប្រព័ន្ធផ្សព្វផ្សាយនៃមន្ទីរព័ត៌មានខេត្តសៀមរាប ក្នុងនោះមានវិទ្យុនិងទូរទស្សន៍ ដែលមានកម្មវិធីផ្សាយល្អៗ ហើយអ្វីដែលគួរឲ្យចាប់អារម្មណ៍នោះ គឺកិច្ចសហការរបស់មន្ត្រីវិទ្យុនិងទូរទស្សន៍ ដែលរួមគ្នាផលិតកម្មវិធីមួយចំនួន ដូចជាកម្មវិធីរួមគ្នាដើម្បីសង្គម , កម្មវិធីយើងធ្វើបាន , កម្មវិធីសំឡេងយុវវ័យ និង កម្មវិធីសន្ទនាមតិ ដែលជាកម្មវិធីល្អៗ និង មានប្រយោជន៍ដល់ការរស់នៅរបស់ប្រជាពលរដ្ឋ ។
ជាការឆ្លើយតប លោក លីវ សុខុន ប្រធានមន្ទីរព័ត៌មានខេត្តសៀមរាប បានសម្ដែងនូវក្ដីសប្បាយរីករាយ ចំពោះវត្តមានរបស់ក្រុមការងារវិទ្យុជាតិខេត្តសុរិន្ទ នៃប្រទេសថៃ នៅលើទឹកដីនៃខេត្តសៀមរាប ដែលដំណើរទស្សនកិច្ចនេះ កាន់តែបង្ហាញនូវភាពស្និទ្ធស្នាល សាមគ្គីភាព និងកិច្ចសហប្រតិបត្តិការណ៍ នៃប្រជាជន និង ប្រទេសយើងទាំងពីរ ពិសេសភាពជិតស្និទ្ធរបស់ប្រព័ន្ធផ្សព្វផ្សាយនៃប្រទេសទាំងពីរ ស្របតាមអនុស្សារណៈយោគយល់គ្នា រវាងក្រសួងព័ត៌មាននៃប្រទេសកម្ពុជា និងក្រសួងព័ត៌មាននៃប្រទេសថៃ ស្តីពីសហប្រតិបត្តិការផ្សព្វផ្សាយវិទ្យុប្រទេសទាំងពីរកម្ពុជា-ថៃ នៅតាមខេត្តដែលមានព្រំដែនជាប់គ្នា ដើម្បីផ្លាស់ប្តូរព័ត៌មានឲ្យគ្នាទៅវិញទៅមកអំពីការអប់រំ វប្បធម៌ ទំនៀមទម្លាប់ ប្រពៃណី និងអំពីជីវភាពរស់នៅក្នុងសង្គម ។ល ។ នៃប្រទេសទាំងពីរ ។
លោក លីវ សុខុន មានប្រសាសន៍ទៀតថា លោកសូមគាំទ្រចំពោះការសន្ទនាផ្សាយផ្ទាល់រវាងវិទ្យុជាតិខេត្តសុរិន្ទ និងវិទ្យុFMជាតិនគរភ្នំខេត្តសៀមរាប តាមរយៈប្រព័ន្ធបណ្តាញ Twin Radio នៅក្នុងអំឡុងខែមីនា ឆ្នាំ២០១៩នេះ ប៉ុន្តែអ្វីដែលនៅសេសសល់ យើងនឹងធ្វើការពិភាក្សា និង ដោះស្រាយរួមគ្នា ដើម្បីធ្វើឲ្យដំណើរការផ្សាយរបស់វិទ្យុយើងទាំងពីរ ប្រព្រឹត្តទៅដភាពរលូន ដូច្នេះសង្ឃឹមថា នៅក្នុងអំឡុងពេលនៃការផ្សាយផ្ទាល់រួមគ្នានៃវិទ្យុរបស់យើងទាំងពីរ នឹងធ្វើឲ្យប្រជាជននៃប្រទេសទាំងពីរ កាន់តែមានការយល់ដឹងចិត្តគ្នាទៅវិញទៅមក អំពីវប្បធម៌ ទំនៀមទម្លាប់ ប្រពៃណី និង ជីវភាពរស់នៅប្រចាំថ្ងៃ ៕
អត្ថបទ ៖ លោក លីវ សាន្ត
រូបថត ៖ សហការី
