ឯកឧត្ដមឧត្តមសេនីយ៍ឯក ហែម ថេង អគ្គនាយករង នៃអគ្គនាយកកដ្ឋានអន្តោប្រវេសន៍ ក្រសួងមហាផ្ទៃ បានបញ្ជាក់ថា ចំពោះជនអន្តោប្រវេសន៍អាចប្រឈមការឃាត់ខ្លួនបណ្ដេញចេញពីកម្ពុជា ប្រសិនបើមិនមកដាក់ពាក្យសុំប្រកាស និងសុំប័ណ្ណស្នាក់នៅអចិន្ត្រៃយ៍នោះទេ ហើយក្នុងអំឡុងពេល៣ខែទៀត គិតត្រឹមថ្ងៃទី៣០ ខែមិថុនា ឆ្នាំ២០១៩ ខាងមុខនេះ គឺបញ្ចប់ឱសានវាទផ្សព្វផ្សាយអនុក្រឹត្រលេខ ១២៩ អនក្រ.បក ចុះថ្ងៃទី១៥ ខែសីហា ឆ្នាំ២០១៧ របស់ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន ស្តីពីការលុបចោល និងដកហូតឯកសារ រដ្ឋបាលកម្ពុជា មិនប្រក្រតី ដែលជនបរទេសកំពុងកាន់កាប់ប្រើប្រាស់ដោយខុសច្បាប់ ។
ឯកឧត្ដម ហែម ថេង បានបញ្ជាក់ទៀតថា នៅក្រោយបញ្ចប់ឱសានវាទនាថ្ងៃទី៣០ ខែមិថុនា ឆ្នាំ២០១៩ ខាងមុខនេះ ប្រសិនបើជនបរទេសអន្តោប្រវេសន៍ នៅតែបន្តប្រើប្រាស់អត្តសញ្ញាណប័ណ្ណសញ្ជាតិខ្មែរ ឬឯកសារពាក់ព័ន្ធផ្សេងៗទៀតនោះ គឺជាបទល្មើសក្លែងឯកសារ ដែលអាចប្រឈមនឹងជាប់ពន្ធនាគារមិនខានឡើយ ដោយសារតែនៅមុនថ្ងៃឱសានវាទ រាល់ឯកសារទាំងឡាយ បានវាយបញ្ចូលតារាងឧបសម្ព័ន្ធ និងត្រូវនិរាករណ៍ចោលទាំងស្រុងហើយ ។
ឯកឧត្ដម ហែម ថេង មានប្រសាសន៍យ៉ាងនេះ នៅក្នុងកិច្ចប្រជុំដើម្បីពន្លឿនផ្សព្វផ្សាយអនុវត្តអនុក្រឹត្រលេខ ១២៩ អនក្រ.បក ចុះថ្ងៃទី១៥ ខែសីហា ឆ្នាំ២០១៧ របស់ប្រមុខរាជរដ្ឋាភិបាលកម្ពុជា ស្តីពីការលុបចោល និងដកហូតឯកសាររដ្ឋបាលកម្ពុជា មិនប្រក្រតី ដែលជនបរទេសកំពុងកាន់កាប់ប្រើប្រាស់ នាព្រឹកថ្ងៃទី២៧ ខែកុម្ភៈ ឆ្នាំ២០១៩ នៅស្នងការដ្ឋាននគរបាលខេត្តសៀមរាប ។
ឯកឧត្ដមឧត្តមសេនីយ៍ឯក ហែម ថេង បានបញ្ជាក់បន្ថែមទៀតថា ការអនុវត្តនូវការងារទាំងអស់នេះ គឺជាជម្រើសដ៏ល្អសម្រាប់ជនអន្តោប្រវេសន៍ ដែលចង់រស់នៅលើទឹកដីនៃប្រទេសកម្ពុជា ក្នុងការផ្តល់នូវសិទ្ធិស្របច្បាប់ ដែលមានការទទួលស្គាស់ដោយនីតិរដ្ឋ ដោយបានផ្តល់នូវអត្ថប្រយោជន៍ដល់ជនអន្តោប្រវេសន៍ នូវភាពងាយស្រួលក្នុងការធ្វើដំណើរទៅវិញទៅមក នៅក្នុងប័ណ្ណមានឈីប ដែលបានបញ្ចូលនូវសហមាជិកគ្រួសាររបស់ពួកគាត់ កូនៗរបស់គាត់ មានសិទ្ធិរៀនសូត្របានខ្ពង់ខ្ពស់ អាចទៅលេងប្រទេសខ្លួន ដោយធ្វើការប្តូរនូវប័ណ្ណអន្តោប្រវេសន៍ ជាពិសេសនោះ ក្រោយពីការចុះសញ្ជាតិរួចហើយ ពួកគាត់អាចរៀនអក្សរខ្មែរ និងស្វែងយល់ពីវប្បធម៌ខ្មែរបាន ។
ពាក់ព័ន្ធនឹងបញ្ហានេះ លោកស្រី យូ សុភា អភិបាលរងខេត្តសៀមរាប បានស្នើឲ្យអាជ្ញាធរពាក់ព័ន្ធ និងសមត្ថកិច្ច ជួយសហការគ្នាផ្សព្វផ្សាយឲ្យបានទូលំទូលាយចំពោះជនបរទេសអន្តោប្រវេសន៍ ដែលកំពុងកាន់កាប់ប្រើប្រាស់ និងនៅសេសសល់ ដើម្បីឲ្យមកដាក់ពាក្យសុំប្រកាស និងសុំប័ណ្ណស្នាក់នៅអចិន្ត្រៃយ៍ ក្នុងការអនុវត្តអនុក្រឹត្រលេខ ១២៩ អនក្រ.បក ចុះថ្ងៃទី១៥ ខែសីហា ឆ្នាំ២០១៧ ស្តីពីការលុបចោល និងដកហូតឯកសារ រដ្ឋបាលកម្ពុជា មិនប្រក្រតី។
សូមបញ្ជាក់ថា ដើម្បីឲ្យការអនុវត្តការងារមានភាពរលូន និងទទួលបានភាពជោគជ័យ រាជរដ្ឋាភិបាលកម្ពុជា បានបង្កើតនូវក្រុមការងារអន្តរក្រសួង ដែលមានការចូលរួមចំនួន៤ក្រសួង គឺ
ទី១-ក្រសួងការបរទេស មានការត្រួតពិនិត្យពីច្បាប់ជាតិ និងអន្តរជាតិ
ទី២-ក្រសួងយុត្តិធម៌ ដែលមានស្ថាប័នតុលា
ទី៣-ក្រុមប្រឹក្សាអ្នកច្បាប់ នៃទីស្តីការគណៈរដ្ឋមន្ត្រី
និងទី៤-ក្រសួងមហាផ្ទៃ គឺអគ្គនាយកដ្ឋានអន្តោប្រវេសន៍ ដោយមានអគ្គនាយករងនៃអគ្គនាយកដ្ឋានអន្តោប្រវេសន៍ជាអ្នកដឹកនាំ មានភារកិច្ចអនុវត្តចំនួន៤ករណី ។
ភារកិច្ចអនុវត្តចំនួន៤ករណី មានជាអាទិ៍ ៖
ទី១-ការបញ្ជូល និងអនុវត្តលើចំណុចខ្វះខាត ដែលមានចាប់តាំងពីឆ្នាំ២០០២ នៃរយៈពេលដ៏យូរនេះ
ទី២- ជាអ្នកកាន់ឯកសារមិនប្រក្រតី មានន័យថា ការធ្វើឯកសារដែលមិនទាន់សមស្របទៅតាមច្បាប់
ទី៣- អ្នកកាន់ឯកសារអត្តសញ្ញាណកម្ម
និងទី៤- គឺអ្នកស្នាក់នៅយូរ ដែលអ្នកទាំង៤ជំពូកនេះ ត្រូវមកអនុវត្តន៍ច្បាប់ តាមអនុក្រឹត្រ លេខ ១២៩ អនក្រ.បក ស្តីពីការលុបចោល និងដកហូតឯកសារ រដ្ឋបាលកម្ពុជា មិនប្រក្រតី ដែលជនបរទេសកំពុងកាន់កាប់ និងប្រើប្រាស់ក្នុងព្រះរាជាណាចក្រកម្ពុជា ៕
អត្ថបទ និង រូបថត : លោក យូ វង្ស
កែសម្រួលអត្ថបទ : លោក លីវ សាន្ត
