ថ្លែងនៅក្នុងសន្និសិទសារព័ត៌មាន ស្តីពីការរៀបចំព្រឹត្តិការណ៍ «សបា្តហ៍បារាំង» ជាលើកទី២នៅក្រុងសៀមរាប កាលពីរសៀលថ្ងៃទី២៦ ខែកុម្ភៈ ឆ្នាំ២០១៩ ម្សិលមិញនេះ លោក ហួត តារា សមាជិកគណៈកម្មាធិការរៀបចំសប្តាហ៍បារាំង បានថ្លែងថា ស្ថានទូតបារាំងប្រចាំកម្ពុជា នឹងរៀបចំព្រឹត្តិការណ៍ «សបា្តហ៍បារាំង» ជាលើកទី២ នៅក្រុងសៀមរាបចាប់ពីថ្ងៃទី០៧ដល់ថ្ងៃទី១០ ខែមីនា ឆ្នាំ២០១៩នេះ ដើម្បីផ្សព្វផ្សាយអំពីជំនាញរបស់ក្រុមហ៊ុនបារាំងនៅកម្ពុជា និងបង្ហាញពីវប្បធម៌ សិល្បៈ សិប្បកម្មខ្មែរ ឱ្យសាធារណជនក្នុងស្រុក និងភ្ញៀវអន្តរជាតិនានាបានស្គាល់ ហើយក៏ជាចំណែកមួយក្នុងការធ្វើឱ្យចំណងមិត្តភាពនៃប្រទេសទាំងពីរកាន់តែល្អប្រសើរផងដែរ ហើយនឹងត្រូវបើកសម្ពោធជាផ្លូវការដោយលោកជំទាវ អេវ៉ា ង្វៀន ប៊ិញ ឯកអគ្គរដ្ឋទូតបារាំងប្រចាំកម្ពុជា ។
លោក ហួត តារា មានប្រសាសន៍ទៀតថា ព្រឹត្តិការណ៍នេះ រៀបចំឡើងដោយសភាពាណិជ្ជកម្ម និងឧស្សាហកម្មបារាំង-កម្ពុជា ដែលមានការគាំទ្រពីស្ថានទូតបារាំងប្រចាំកម្ពុជា ដោយមានការសាងសង់ឡើងនូវ«ភូមិបារាំងមួយ» នៅក្នុងបរិវេណមហាសណ្ឋាគារអង្គរ (Raffles Grand Hôtel d’Angkor) ហើយនៅក្នុងរយៈពេល៤ថ្ងៃចាប់ពីម៉ោង៣រសៀលដល់ម៉ោង៩យប់ នៅក្នុងព្រឹត្តិការណ៍នេះ មានក្រុមហ៊ុន និងអង្គការបារាំងនានាប្រមាណចំនួន៧០នឹងធ្វើការបង្ហាញជូនដល់ពលរដ្ឋខេត្តសៀមរាប និងភ្ញៀវទេសចរ អំពីចំណេះធ្វើរបស់សហគ្រិនបារាំង លាយផ្សំជាមួយចំណេះធ្វើ សិប្បកម្ម ប្រពៃណី និងវត្ថុធាតុដើមរបស់ខ្មែរ ជាដើម។
លោក ហួត តារា មានប្រសាសន៍បន្ថែមទៀតថា ក្រៅពីនេះ កម្មវិធីជាច្រើនទៀតនឹងត្រូវបង្ហាញដល់សាធារណជន ដូចជា វប្បធម៌បារាំង កម្ពុជាការបង្ហាញម៉ូតសម្លៀកបំពាក់ចៃ្នដោយផលិតករក្នុងស្រុក ការប្រាព្ធទិវាសិទ្ធិនារីអន្តរជាតិ៨មីនា ការដាក់បញ្ចាំងភាពយន្តអប់រំផ្សេងៗ ការសម្តែងរបាំសហសម័យដោយក្រុមសិល្ប:ខ្មែរ ការប្រួតប្រជែងចម្លាក់សូន្យរូប ជាពិសេសផ្តល់ឱកាសឱ្យអ្នកពាណិជ្ជករកម្ពុជា បារាំងបាន ជួបទំនាក់ទំនងគ្នា ៕
អត្ថបទ និង រូបថត : លោក ឃុត សៅ
កែសម្រួលអត្ថបទ : លោក លីវ សាន្ត
