ឯកឧត្ដម ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិវាយតម្លៃទីក្រុងស្អាត បានប្រកាសថា រាជធានីភ្នំពេញទទួលបានជ័យលាភីលេខ១ ខណៈខេត្តសៀមរាប ទទួលបានជ័យលាភីលេខ២ និង ខេត្តកែប ទទួលបានជ័យលាភីលេខ៣ សម្រាប់កម្មវិធីប្រកួតប្រជែង «ទីក្រុងដែលមានពិធីបុណ្យឆ្លងឆ្នាំសាកលល្អជាងគេប្រចាំឆ្នាំ – Best Countdown City of the Year» លើកទី១ ដោយមានបេក្ខភាពទាំង២៥រាជធានី-ខេត្ត បានដាក់ពាក្យចូលរួមប្រកួតប្រជែង ហើយការផ្ដល់ពិន្ទុនៃការប្រកួតនេះទៀតសោធ គឺត្រូវបានធ្វើឡើងដោយភ្ញៀវជាតិ-អន្តរជាតិ និងសាធារណជន ដែលបានចូលរួមបោះឆ្នោតតាមប្រព័ន្ធ Online គាំទ្រទីក្រុងដែលខ្លួនពេញចិត្តជាងគេបំផុត ក្នុងការរៀបចំពិធីបុណ្យចូលឆ្នាំសកល ។
ការប្រកាសជ័យលាភីទីក្រុងដែលបានរៀបចំពិធីបុណ្យឆ្លងឆ្នាំសាកលល្អជាងគេបំផុត (Best Countdown City of the Year) នេះ ត្រូវបានធ្វើឡើងក្នុងពិធីអបអរសាទរទិវាជាតិទីក្រុងស្អាតលើកទី៧ ឆ្នាំ២០១៩ ក្រោមប្រធានបទ «ទីក្រុងស្អាត៖ ទីក្រុងផ្តល់ភាពកក់ក្តៅ» អមជាមួយពិធីប្រគល់ជ័យលាភីរង្វាន់ «សម្តេចតេជោនាយករដ្ឋមន្ត្រី សម្រាប់ធុរកិច្ចបៃតងក្នុងវិស័យទេសចរណ៍» លើកទី៣ នៅសណ្ឋាគាររ៉េស៊ីដង់សុខាភ្នំពេញ នាថ្ងៃទី២៥ ខែកុម្ភៈ ឆ្នាំ២០១៩ ៕
អត្ថបទ៖ លោក លីវ សាន្ត
