កាលពីព្រឹកថ្ងៃទី២៧ ខែកុម្ភៈ ឆ្នាំ២០១៩ម្សិលមិញនេះ ក្រុមការងារថែរក្សាបរិស្ថានអនាម័យ នៃរដ្ឋបាលក្រុងសៀមរាប ដឹកនាំដោយលោក ពៅ សារ៉ាវុធ អភិបាលស្តីទីក្រុងសៀមរាប សហការជាមួយរដ្ឋបាលស្រុកប្រាសាទបាគង បានធ្វើទិវាបរិស្ថានប្រចាំខែកុម្ភៈ ដើម្បីអបអរសាទរខេត្តសៀមរាបយើង បានទទួលជ័យលាភីទីក្រុងដែលបានរៀបចំពិធីបុណ្យឆ្លងឆ្នាំសកល ល្អជាងគេប្រចាំឆ្នាំ ២០១៨-២០១៩ នៃ «ទិវាជាតិទីក្រុងស្អាត» លើកទី៧ និង ជ័យលាភីបង្គន់សាធារណៈកម្ពុជាលើកទី១ ក្រោមអធិបតីដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជណាចក្រកម្ពុជា កាលពីពេលថ្មីៗកន្លងទៅនេះ។
ការធ្វើទិវាបរិស្ថាននេះ ក៏ជាការរួមចំណែកមួយ ឆ្លើយតបនឹងរបៀបវារៈនៃការអភិវឌ្ឍប្រកបដោយចីរភាពឆ្នាំ២០៣០ របស់អង្គការសហប្រជាជាតិ ដែលតម្រូវឲ្យយើងទាំងអស់គ្នា ចាំបាច់ត្រូវរួមគ្នាអភិវឌ្ឍទីក្រុងឱ្យកាន់តែមានចីរភាព ស័ក្តិសមនឹងពាក្យស្លោក ‘ទីក្រុងស្អាត ទីក្រុងផ្តល់ភាពកក់ក្តៅ” ដល់ប្រជាពលរដ្ឋ និងភ្ញៀវទេសចរជាតិ និងអន្តរជាតិ ។
ការសម្អាតបរិស្ថាននេះ ត្រូវបានធ្វើឡើងនៅតាមដងផ្លូវសម្តេចវិបុលបញ្ញា សុខ អាន ស្ថិតក្នុងភូមិធ្លកអណ្តូង សង្កាត់ស្លក្រាមក្រុងសៀមរាប រហូតដល់រង្វង់មូលព្រៃគុយ ឃុំអំពិល ស្រុកប្រាសាទបាគង ដោយមានមន្ត្រីរាជការក្រុង ស្រុក , បងប្អូនប្រជាការពារ , លោកគ្រូ អ្នកគ្រូ និង សិស្សានុសិស្ស សរុបចំនួនប្រមាណ ២.០០០នាក់ រួមទាំងក្រុមហ៊ុនប្រមូលសំរាមចំនួន៤ ផងដែរ ៕
អត្ថបទ និង រូបថត ៖ លោក គឿន វេត
កែសម្រួលអត្ថបទ ៖ លោក លីវ សាន្ត
