ផ្លូវមួយខ្សែចាប់ពីចំណុចកែងរង្វង់មូលកូនដំរីកំណាត់ផ្លូវស្វាយធំរហូតដល់ផ្លូវកែងភូមិព្រះដាកទៅស្រុកបន្ទាយស្រីប្រវែងជាង ១៤គីឡូម៉ែត្រ និងទទឹង ៧ម៉ែត្រត្រូវបានអាជ្ញាធរជាតិអប្សរា កំពុងធ្វើការជួសជុល ។ ផ្លូវមួយខ្សែនេះដើមឡើយ គឺជាប្រភេទផ្លូវដី ហើយបន្តបន្ទាបមកបានកែប្រែជាផ្លូវគ្រួសក្រហមតាមរយៈគម្រោង ទីភ្នាក់ងារអភិវឌ្ឍន៍ និងសហប្រតិបត្តិការកូរ៉េ ហៅកាត់ថា KOICA។
នៅឆ្នាំ២០០៩ ក្រោមជំនួយឥតសំណងរបស់សាធារណរដ្ឋកូរ៉េ តាមរយៈ KOICA ដដែល បានអភិវឌ្ឍន៍ពីផ្លូវគ្រួសក្រហមទៅជាផ្លូវក្រាលកៅស៊ូ DBSTវិញ ដើម្បីងាយស្រួលដល់ភ្ញៀវទេសចរ និងប្រជាពលរដ្ឋធ្វើដំណើរឆ្លងកាត់បានប្រសើជាងមុន ។ ប៉ុន្មានឆ្នាំចុងក្រោយនេះដោយសាររងគ្រោះទឹកជំនន់ និងទឹកភ្លៀងជន់លិចផងជាច្រើឆ្នាំមក ត្រូវបានរងការខូចខាតយ៉ាងធ្ងន់ធ្ងរស្ទើរទាំងស្រុង នាពេលកន្លងមក។ ក្នុងគម្រោងជួសជុល និងកែលម្អផ្លូវស្វាយធំនេះ ជាប្រភេទអ៊ុតបេតុងកៅស៊ូ AC បានចាប់ផ្តើមជួសជុលចាប់តាំងពីពាក់កណ្ដាលខែមករា ឆ្នាំ២០១៩មក ដោយគ្រោងនឹងបញ្ចប់នាពេលឆាប់ៗខាងមុខ ។
ស្ថិតក្នុងរយៈពេលជួសជុលនេះ អាជ្ញាធរជាតិអប្សរា សុំការ យោគយល់ខ្ពស់ពីសំណាក់ប្រជាពលរដ្ឋចំពោះការកកស្ទះនៅលើកំណាត់ផ្លូវមួយនេះ ខណៈពេលក្រុមការងារកំពុងដំណើរជួសជុល។ ដើម្បីសម្រួលចរាចរណ៍កុំឱ្យមានការកកស្ទះនេះដែរ មន្ត្រីនាយកដ្ឋានទ្រទ្រង់បច្ចេកទេស និងគម្រោងអន្តរវិស័យ នៃអាជ្ញាធរជាតិអប្សរា បានប្រាប់ឲ្យដឹងថាក្រុមការងារបានរៀបចំដាក់ស្លាកសញ្ញាបញ្ជៀសចរាចរណ៍នៅតាមគោលដៅនីមួយៗ និងសុំឱ្យពលរដ្ឋមានការប្រុងប្រយ័ត្នក្នុងពេលធ្វើដំណើរផងដែរ ។ សូមជម្រាបជូនថា ផ្លូវដែលកំពុងជួសជុលនេះមានសារសំខាន់ណាស់ ក្នុងការធ្វើចរាចរណ៍ឆ្លងកាត់របស់ភ្ញៀវទេសចរជាតិ និងអន្តរជាតិ ប្រជាពលរដ្ឋដឹកជញ្ជូនភោគផលគ្រប់ប្រភេទពីជនបទទៅទីក្រុងពីទីក្រុងទៅជនបទវិញ ។
អត្ថបទ និងរូបភាព លោកម៉ាត់ អារីហ្វីន
កែសម្រួលដោយ លីវ សុខុន !!!
