តាមសេចក្ដីជូនជំណឹងរបស់មន្ទីរពេទ្យកុមារអង្គរ បានឲ្យដឹងថា មន្ទីរពេទ្យកុមារអង្គរ នឹងទទួលស្វាគមន៍វត្តមានវិចិត្រករខាងគំនូរ និង ធ្វើជាម្ចាស់ផ្ទះនៃតាំងពិព័រណ៌គំនូរ របស់កុមារា ចននី ចៅ អាយុ១១ឆ្នាំ ជាជនជាតិសិង្ហបុរី នៅមជ្ឈមណ្ឌលទស្សនកិច្ចរប់សមន្ទីរពេទ្យកុមារអង្គរក្រោមប្រធានបទ « ពរជ័យ » ដើម្បីប្រមូលថវិកាជួយព្យាបាលកុមារក្រីក្រកម្ពុជា ហើយត្រូវប្រារព្ធពិធីសម្ពោធជាផ្លូវការ នៅថ្ងៃទី០៧ ខែមីនា ឆ្នាំ២០១៩ វេលាម៉ោង ៥និង៣០នាទីល្ងាច ដែលការតាំងបង្ហាញនេះ នឹងមានរយៈពេលពេញមួយខែ ។
រូបគំនូររបស់កុមារា ចននី ចៅ នេះ គឺការប្រើប្រាស់ពណ៌ស្រស់ៗ ប្រកបដោយភាពរស់រវើករបស់កុមារា ចននី ដែលជាប់ពាក់ព័ន្ធនឹងសុភមង្គម និងជីវិត ដែលមនុស្សគ្រប់រូបត្រូវការ ។
ការតាំងពិព័រណ៍ដែលមានឈ្មោះថា ពរជ័យ នេះ គឺជាបង្ហាញពីគំនិតនៃការចែករំលែកចំពោះអ្នកដែលខ្វះខាត និងជាការជូនពរជ័យដល់អ្នកដទៃ ចំណែកផ្ទាំងគំនូររបស់ ចននី នឹងត្រូវដាក់លក់ ហើយថវិកាដែលទទួលបាន នឹងឧបត្ថម្ភដល់មន្ទីរពេទ្យកុមារអង្គរទាំងស្រុង ៕
អត្ថបទ និង រូបថត ៖ លោក ម៉ាត់ អារីហ្វីន
កែសម្រួលអត្ថបទ ៖ លោក លីវ សាន្ត
