អគារបណ្ណាល័យ និងអគាររោងជាង ស្ថិតនៅក្នុងវិទ្យាល័យចំណេះទូទៅ និងបច្ចេកទេសពួក ស្ថិតក្នុងឃុំពួក ស្រុកពួក ជាអំណោយរបស់សប្បុរសជននៅប្រទេសស្វីស តាមរយៈលោក អង់រីកូ សាលា ដែលចំណាយអស់ថវិកាចំនួន ៥០.៥០០ដុល្លារអាមេរិក ត្រូវបានសម្ពោធដាក់ឲ្យប្រើប្រាស់ជាផ្លូវការហើយ នាព្រឹកថ្ងៃទី២៨ ខែកុម្ភ: ឆ្នាំ២០១៩នេះ ក្រោមអធិបតីភាពឯកឧត្តមអ្នកឧកញ៉ា សៀង ណាំ អ្នកតំណាងរាស្ត្រមណ្ឌលសៀមរាប និង លោក អង់រីកូ សាលា សប្បុរសជនមកពីប្រទេសស្វីស ។
លោក អង់រីកូ សាលា មានប្រសាសន៍ថា គិតមកដល់ឆ្នាំ២០១៩នេះ លោកបាននាំមកនូវថវិការបស់សប្បរសជននៃប្រទេសស្វីស មានចំនួនទឹកប្រាក់សរុប ៣.៦៩១.៦៨២ ដុល្លារអាមេរិកហើយ ដើម្បីជួយអភិវឌ្ឍន៍ខេត្តសៀមរាប លើវិស័យអប់រំក្នុងរយៈពេល២០ឆ្នាំកន្លងមកនេះ ក្នុងនោះបានសាសសង់អណ្តូងទឹក ជូនប្រជាពលរដ្ឋ ចំនួន៩៤១អណ្តូង , មណ្ឌលសុខភាពចំនួន១៦កន្លែង , អគារសម្ភពចំនួន៩ខ្នង , អគារសាលារៀន និងប័ណ្ណាល័យចំនួន៥៦ខ្នងផងដែរ។
មានប្រសាសន៍ក្នុងឱកាសនោះ ឯកឧត្តមអ្នកឧកញ៉ា សៀង ណាំ បានថ្លែងអំណរគុណចំពោះលោក អង់រីកូ សាលា និងប្រជាជនស្វីស ដែលបានចំណាយថវិកាផ្ទាល់ខ្លួន ក្នុងការជួយដល់ប្រជាជនកម្ពុជានៅខេត្តសៀមរាបនេះ ដោយយល់ឃើញពីភាពលំបាករបស់បងប្អូនប្រជាពលរដ្ឋមានការខ្វះខាតនៅវិស័យអប់រំ សុខាភិបាល ទឹកស្អាត សម្រាប់ប្រើប្រាស់ប្រចាំថ្ងៃនោះ ដើម្បីចូលរួមចំណែកជួយសម្រួលដល់រាជរដ្ឋាភិបាល ក៏ជាសង្គមជាតិប្រកបទៅដោយសុខសន្តិភាព ជាពិសេសវិស័យអប់រំនៅកម្ពុជា សម្រាប់ក្មួយៗសិស្សានុសិស្ស ដែលជាទំពាំងស្នងឬស្សីជាដើម ។
ឯកឧត្តម សៀង ណាំ មានប្រសាសន៍ទៀតថា សមិទ្ធផលទាំំងនេះ គឺជាការចូលរួមចំណែកមួយដ៏សំខាន់មួយ ជាមួយរាជរដ្ឋាភិបាលកម្ពុជា ក្នុងការអភិវឌ្ឍនៅតាមតំបន់ជនបទនៃសៀមរាបនេះ ដូច្នេះសូមឱ្យសិស្សានុសិស្សទាំងអស់ ត្រូវខិតខំរៀនសូត្រ ដើម្បីឆ្លើយតបបានជាមួយនឹងទឹកចិត្តសប្បុរសជន ដែលបានជួយ ៕
អត្ថបទ និង រូបថត ៖ លោក ស៊ាន សុផាត
កែសម្រួលអត្ថបទ ៖ លោក លីវ សាន្ត
