នៅថ្ងៃទី២៦ ខែកុម្ភៈ ឆ្នាំ២០១៩នេះ ផ្លូវក្រាលកៅស៊ូ ប្រភេទឌីប៊ីអេសធី(DBST) ដំណាក់កាលទី៣ ប្រវែង៦៥០ម៉ែត្រ ស្ថិតនៅភូមិកន្ត្រក សង្កាត់ស្វាយដង្គុំ ក្រុង សៀមរាប ត្រូវបានស្ថាបនាបន្តហើយ បន្ទាប់ពីទទួលថវិកាពីក្រសួងហិរញ្ញវត្ថុ ដើម្បីជួយដល់ការអភិវឌ្ឍក្នុងក្រុង និងសម្រួលដល់ការធ្វើចរាចរណ៍របស់ប្រជាពលរដ្ឋ ដែលស្ថិតនៅក្នុង៣សង្កាត់ក្នុងក្រុងសៀមរាប។
លោក លឹម ឡាវុធ អនុប្រធានការិយាល័យសាធារណការ ទទួលបន្ទុកការដ្ឋាន នៃមន្ទីរសាធារណការ និងដឹកជញ្ជូនខេត្តសៀមរាប ឲ្យដឹងថា ផ្លូវក្រាលកៅស៊ូ ប្រភេទឌីប៊ីអេសធី(DBST) ដំណាក់កាលទី៣នេះ គឺជាគម្រោងឆ្នាំ២០១៨ របស់ក្រសួងសាធារណការ និងដឹកជញ្ជូន ដែលទទួលថវិកាពីក្រសួងហិរញ្ញវត្ថុ។ ផ្លូវមួយខ្សែនេះ មានសារសំខាន់ណាស់ សម្រាប់ជួយដល់ការអភិវឌ្ឍក្នុងក្រុងសៀមរាប នឹងជួយសម្រួលការធ្វើដំណើររបស់ប្រជាពលរដ្ឋ ក្នុងសង្កាត់ស្រងែ សង្កាត់សំបួរ និងសង្កាត់ស្វាយដង្គុំ។ ចំពោះ ផ្លូវលេខ២៦៧ មានប្រវែងសរុប១៩គីឡូម៉ែត្រ ដែលនាពេលអនាគតផ្លូវមួយខ្សែនេះនឹងតភ្ជាប់ទៅដល់ស្រុកពួក ។
បើតាមការបញ្ជាក់ពីលោក យន់ ជា អនុប្រធានការិយាល័យសាធារណការ ទទួលបន្ទុកការដ្ឋានដែរនោះ បាននិយាយថា ផ្លូវក្រាលកៅស៊ូ ប្រភេទឌីប៊ីអេសធី(DBST)នេះ ត្រូវបានស្ថាបនាជា៣ដំណាក់កាល ដែលដំណាក់កាលទី១ចាប់ពីចំណុចផ្លូវក្រវ៉ាត់ក្រុងមានប្រវែង ១៧០ម៉ែត្រ, ដំណាក់កាលទី២ ប្រវែង ១៥០០ម៉ែត្រ និងដំណាក់កាលទី៣ ដែលបញ្ចប់នៅចំណុចផ្សារកន្ត្រក មានប្រវែង៦៥០ម៉ែត្រ។ ចំពោះកម្រាស់ផ្លូវកៅស៊ូនេះ មាន៦ស្រទាប់ ក្នុងនោះមានក្រាលកៅស៊ូ២ជាន់ ចំពោះវត្ថុធាតុដើមយកមកស្ថាបនាផ្លូវ ត្រូវបានឆ្លងកាត់មន្ទីរពិសោធត្រឹមត្រូវ ដែលធានានូវគុណភាព ដោយឡែកចំពោះថ្មយកមកក្រាលនេះដែរ គឺត្រូវចាំបាច់លាងសម្អាតដី ចៀសវាងកំណកដីនៅលើកៅស៊ូនៃស្រទាប់នីមួយៗ ដែលប៉ះពាល់ដល់គុណភាពផ្លូវ ហើយការស្ថាបនាត្រូវចំណាយពេលជិតមួយខែទើបរួចរាល់ វាអាស្រ័យទៅនឹងស្ថានភាពអាកាសធាតុ និងចរាចរណ៍របស់ប្រជាពលរដ្ឋ។
ឆ្លើយបទៅនឹង មតិរិះគន់របស់ប្រជាពលរដ្ឋ ក៏ដូចជាមតិនៅតាមបណ្ដាញសង្គមហ្វេសប៊ុក លើកឡើងថា ផ្លូវដែលស្ថាបនាដោយមន្ទីរសាធារណការ និងដឹកជញ្ជូនខេត្តសៀមរាបមួយខ្សែនេះ ខុសបច្ចេកទេស ក្រាលកៅស៊ូស្ដើង ឬយកកៅស៊ូទៅស្រោចលើដីនោះមិនមែនជាកាពិតឡើយ លោក យន់ ជា បានបញ្ជាក់ថា សកម្មភាពដែលប្រជាពលរដ្ឋបានឃើញនោះ គឺគ្រាន់តែជាការក្រាលគ្រឹះដោយគ្រួសថ្មក្រហម និងក្រាលកៅស៊ូទ្រនាប់ការពារទឹកជ្រាប ជំហានដំបូងប៉ុណ្ណោះ ដើម្បីរង់ចាំគ្រួសថ្មក្រហម និងសាច់កៅស៊ូស្អិតខាំជាប់គ្នា ទើបក្រុមបច្ចេកទេសវាយតម្លៃ និងធ្វើការចាក់ថ្ម និងក្រាលកៅស៊ូជាបន្តបន្ទាប់។ ហេតុដូច្នេះសូមបងប្អូនប្រជាពលរដ្ឋ កុំមានការយល់ច្រឡំបន្តទៀត។
សូមជម្រាបដែរថា ជាមួយនឹងការស្ថាបនាផ្លូវដំណាក់កាលទី៣នេះ មន្ទីរសាធារណការ និងដឹកជញ្ជូនខេត្តសៀមរាប ក៏បានរៀបចំដាក់លូមូល ប្រភេទបេតុងអាមេផងដែរ ដែលមានមុខកាត់០.៨ម៉ែត្រ បណ្ដោយ ២ម៉ែត្រនៅតាមសងខាងផ្លូវ ដើម្បីបង្ហូរទឹកដក់នៅលើផ្លូវ និងសម្រាប់តភ្ជាប់បង្ហូរទឹកសម្អុយពីលំនៅដ្ឋានរបស់ប្រជាពលរដ្ឋ។
អត្ថបទ និង រូបថត : លោក សេង ផល្លី និងលោក អ៊ុន ណារាជ្រ
