កាលពីរសៀលថ្ងៃទី២៦ ខែកុម្ភៈ ឆ្នាំ២០១៩ ម្សិលមិញនេះ លោកជំទាវ ទាង អេង ទៀសីហាអនុប្រធានគណៈកម្មាធិការសាខា និង សហការី នៃគណៈកម្មាធិការសាខាកាកបាទក្រហមកម្ពុជាខេត្តសៀមរាប ចុះសាកសួរសុខទុក្ខ ជនត្រូវចោទ ជនជាប់ចោទ និងពិរុទ្ធជន ជាស្ត្រីមានកូនតូច និងស្ត្រីមានផ្ទៃពោះ ចំនួន១៥នាក់ ដែលកំពុងជាប់ឃុំនៅក្នុងពន្ធនាគារខេត្តសៀមរាប ក្នុងគោលបំណងលើកកម្ពស់ការយកចិត្តទុកដាក់ចំពោះសុខភាពមាតា ទារក និងកុមារ ក្នុងឱកាសអបអរសាទរទិវាជាតិសុខភាពមាតា ទារក និង កុមារ សំខាន់គឺការចូលរួមចំណែកគាំទ្រ “ឥស្សរជនឆ្នើមថ្នាក់ជាតិនៃផែនការសកម្មភាពរួមអគ្គលេខាធិការអង្គការសហប្រជាជាតិដើម្បីសុខភាពស្ត្រីនិងកុមារ”កាកបាទក្រហមកម្ពុជា ដែលមានសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលតែងតែគិតគូរខ្ពស់ចំពោះសុខភាពបងប្អូនជា ស្ដ្រី និងកុមារ ។
លោកជំទាវ ទាង អេង ទៀសីហា មានប្រសាសន៍ថា ក្នុងឱកាសដែលបងប្អូន ដែលជាជនត្រូវចោទ ជនជាប់ចោទ និងពិរុទ្ធជន ដែលកំពុងជាប់ឃុំនៅក្នុងពន្ធនាគារខេត្តនាពេលនេះ សូមចេះថែរក្សាសុខភាពខ្លួនឯង និងកូនតូចៗ ពិសេសត្រូវគោរពឲ្យបានខ្ជាប់ខ្ជួននូវបទបញ្ជាក្នុងពន្ធនាគារ និង ការណែនាំរបស់អ្នកគ្រប់គ្រង ដើម្បីប្រែក្លាយខ្លួនទៅជាពលរដ្ឋល្អ នៅពេលត្រឡប់ទៅសហគមន៍វិញ ហើយនៅពេលដែលបានវិលត្រឡប់នៅកាន់សហគមន៍ខ្លួនវិញនោះ ក៏ត្រូវបញ្ជូនកូនៗរបស់ខ្លួន ឲ្យបានចូលសិក្សារៀនសូត្រ ពីព្រោះថា កូនៗទាំងនេះហើយដែលជាសសរស្តម្ភដ៏រឹងមាំ នៃសង្គមជាតិ ជាអ្នកបន្តការអភិវឌ្ឍន៍ប្រទេសជាតិ និង សង្គមគ្រួសារទៅអនាគត ។
ក្នុងឱកាសនោះដែរ លោកជំទាវ ទាង អេង ទៀ សីហា និង សហការី បានចែកអំណោយមនុស្សធម៌ដែលជាអំណោយរបស់សាខាកាកបាទក្រហមកម្ពុជាខេត្តសៀមរាប ជូនដល់ស្ត្រីមានកូនតូច និង ស្ត្រីមានផ្ទៃពោះ ដែលក្នុងម្នាក់ៗទទួលបាន មុង១ , ភួយ១ , សារុង១ , ក្រមា១ , ទឹកដោះគោ៣កំប៉ុង , ស្ករស១គីឡូក្រាម , ត្រីខ១យួរ , មី១កេស , សាប៊ូក្រអូប ២ដុំ , សម្ភារទារក១កញ្ចប់ និងថវិកាចំនួន ៥ម៉ឺនរៀល ៕
អត្ថបទ និង រូបថត ៖ លោក អ៊ិន សីហរិទ្ធ
កែសម្រួលអត្ថបទ ៖ លោក លីវ សាន្ត
