ថ្លែងក្នុងអង្គសិក្ខាសាលាស្តីពី ការជំរុញទីក្រុងសៀមរាប ជាទីក្រុងគ្មានផ្សែងបារី នាព្រឹកថ្ងៃទី២៧ ខែកុម្ហៈ ឆ្នាំ២០១៩នេះ លោក ពៅ ពិសិដ្ឋ អភិបាលរងខេត្តសៀមរាប បានមាន ប្រសាសន៍ថា រយៈកាលកន្លងមក រដ្ឋបាលក្រុងសៀមរាបបានបង្កើតគណៈកម្មការទីក្រុងគ្មានផ្សែងបារី ហើយបានរៀបចំសិក្ខាសាលា និងវគ្គបណ្តុះបណ្តាលជាច្រើន ស្តីពីការអនុវត្តច្បាប់ ស្តីពីការត្រួតពិនិត្យផលិតផលថ្នាំជក់ដល់សង្កាត់ទាំង១២ ក្នុងក្រុងសៀមរាប , មន្ទីរ អង្គភាពនានា រួមទាំងម្ចាស់ឬអ្នកគ្រប់គ្រងនៃកន្លែងធ្វើការ និង កន្លែងសាធារណៈ មានដូចជាសណ្ឋាគារ , ផ្ទះសំណាក់ , ភោជនីយ ដ្ឋាន , អាហារដ្ឋាន , វត្តអារាម , សាលារៀន និងភាគីពាក់ព័ន្ធផ្សេងទៀត ដែលជាក់ស្តែងសង្កាត់ទាំង១២ របស់ក្រុងសៀមរាប ភាគច្រើនបានដាក់បញ្ចូលគំរោងទីក្រុងគ្មានផ្សែងបារីក្នុងផែនការសង្កាត់ តាំងពីឆ្នាំ២០១៧ ប៉ុន្តែទោះបីជាអាជ្ញាធរបានខិតខំប្រឹងប្រែងយ៉ាងណាក៏ដោយ ក៏ការអនុវត្តបរិស្ថានគ្មានផ្សែងបារីនៅមានកម្រិត ។
លោក ពៅ ពិសិដ្ឋ មានប្រសាសន៍ទៀតថា ដើម្បីធ្វើឲ្យប្រសើរឡើងដល់ការអនុវត្តច្បាប់ស្តីពីការត្រួតពិនិត្យផលិតផលថ្នាំជក់ ថ្មីៗនេះរដ្ឋបាលក្រុងសៀមរាប បានរៀបចំយុទ្ធនាការជិះកង់ដើម្បីក្រុងសៀមរាបគ្មានផ្សែងបារី និងដំឡើងស្លាកសញ្ញាទូទាំងក្រុងសៀមរាប ស្តីអំពីសារព្រមានសុខភាពលើកញ្ចប់បារី ការអនុវត្តបរិស្ថានគ្មានផ្សែងបារី ការហាមផ្សាយពាណិជ្ជកម្មផលិតផលថ្នាំជក់គ្រប់ទំរង់ និងផលប៉ះពាល់នៃការជក់បារី និងការស្រូបផ្សែងបារីពីគេ ។
លោក ពៅ ពិសិដ្ឋ មានប្រសាសន៍បន្ថែមទៀតថា យោងតាមលទ្ធផលនៃការអង្កេតការអនុវត្តច្បាប់ ស្តីពីការអនុវត្តច្បាប់ ស្តីពីការត្រួតពិនិត្យផលិតផលថ្នាំជក់ នៅខែធ្នូ ឆ្នាំ២០១៨ ក្នុងខេត្តសៀមរាប បានឲ្យដឹងថា មានកន្លែងធ្វើការនិងកន្លែងសាធារណៈចំនួន៤២ភាគរយប៉ុណ្ណោះ ខណៈដែល ៤០ ភាគរយ នៃប៉ុស្តិ៍នគរបាលរដ្ឋបាល , ២៥ភាគរយនៃសាលាសង្កាត់ , ១១ភាគរយនៃគ្រឹះស្ថានសាសនា មានកន្ទុយបារីនៅក្នុងអគារនិងបរិវេណ ៕
អត្ថបទ និង រូបថត : លោក អ៊ិន សីហរិទ្ធ
កែសម្រួលអត្ថបទ : លោក លីវ សាន្ត
